Read Western Dani 1 Mbinineegwaarak 7 Bible Online

1 Mbinineegwaarak 7 - Western Dani bible

1 Mbinineegwaarak 7

¹At Itakat apuri ineebe 4 ndaganabeegerak ti, Tola, Puwa, Yatup, Timoron aret.

²At Tola nen apuri ndaganabeegerak ti, Uti, Erepaya, Yeriyen, Yamayi, Yibatam, Tamuwen aret. At Tola paga wiganak ndarak ndegek lombok inoweewi it aret o. At Tola paga wiganak mendek nda'nogwe iinok, inendage liiru mbanggo logonet, at paga wiganak wim eeka inalilaakwi iinok, inendage liiru mbaneegwaarak ineebe ineenggi lingginik ti, dua puluh dua ribu enam ratus aret.

³At Uti nen aput Yitaraya ndareegerak. At Yitaraya nen apuri ndaganabeegerak ti, Mikayen, Obaya, Yowen, Yitiya, ineebe 5 aret me, it abok aret inoweewi inendage warak mban wonogogwaarak.

⁴It inakuwi inom, inapuri inom, ambik aret me, ndarak ndegek inendage liiru mbanak mugurok aap wim eeriyak li'luk eerak ineebe ineenggi lingginik ti, tiga puluh enam ribu aret.

⁵At Itakat paga wiganak ndarak ndegek wim wakaa'ngget inogogumbuk lombok kenok, it nda'nogwe iinok, inendage liiru mbanak nogo, inom inendage liiru mbanak ti, lambuk togon ineebe ineenggi lingginik ti, delapan puluh tujuh ribu aret.

⁶At Mbeniyamin apuri aap ineebe 3 ndaganabeegerak ti, Mbela, Mbeket, Yeriyayen aret.

⁷At Mbela apuri aap ineebe 5 ndaganabeegerak ti, Etobon, Uti, Utiyen, Yerimot, Iri aret. It ndarak ndegek inoweewi aret wonogogwaarak. It nda'nogwe iinok, inendage liiru mbanggo logonet, inawuri wakaa'ngget wim eeka ineebe ineenggi lingginik ti, dua puluh dua ribu tiga puluh empat aret me, inom liiru mbanogo pereegwaarak.

⁸At Mbeket apuri aap ndaganabeegerak ti, Temira, Yowat, Eliyetet, Eliyowenayi, Omiri, Yeremot, Abiya, Anatot, Alemet aret. It abok ti, at Mbeket apuri aret me,

⁹it nda'nogwe iinok, liiru mbanggo logonet, ndarak ndegek mugurok inoweewi inendage inom, inawuri wim eeka ineebe dua puluh ribu dua ratus inendage inom, liiru mbanogo pereegwaarak.

¹⁰At Yeriyayen nen aput aap Mbilakan ndareegerak. At Mbilakan nen apuri aap ndaganabeegerak ti, Yewuti, Mbeniyamin, Ekut, Kenaana, Tetan, Taritit, Akitakat aret.

¹¹At Yeriyayen apuri aap abok aret ti, it ndarak ndegek inoweewi aret wonogogwaarak. Ndi, inawuri wim eeka wakaa'ngget wim eeriyak inobam wonogogwaarak ineebe ineenggi lingginik ti, tujuh belas ribu dua ratus aret.

¹²It Tupim Kupim imbirak ti, aap endage It paga wiganak aret. Ndi, at Kutim perak, at Aket paga wiganak aret.

¹³At Natali nen apuri aap ndaganabeegerak ti, Yakatiyen, Ngguni, Yetet, Talum aret. It inowogolo ti, kwe Mbilaka aret.

¹⁴Aap Manate paga wiganak nogo ti, kwe at ayeloman awi Aram mendek wagangge nagagerik, aput Atiriyen ndake, ti'nuk, aagaluk aap Nggileyat ogoba Makit ndake, eereegerak.

¹⁵At Makit nen it Kupim Tupim imbirak inakuwi kolaawak nduk, kumi kwaariragagerak. At Makit iriluk endage Maaka aret. Aput peebi ndareegerak endage Telapeyat nogo, apuri aap ndaganabulik komologwe mban ndaganabeegerak.

¹⁶At Makit akwe Maaka nogo nen aagaluk wulaga ndake nagagerik, endage Pereti aret tooneegerak. At awuluk ti, endage Teret. Ndi, at Teret nen apuri Ulam Erekem imbirak ndaganabeegerak.

¹⁷At Ulam nen aput aap Mberan ndareegerak. At Manate ombooluk Makit aput Nggileyat paga nen wiganogo piyareegerak nogo ti aret.

¹⁸Ndi, at aap Nggileyat iriluk kwe Moleket nogo, aagalogwe Itikot, Abiyetet, Makala, aret ndaganabeegerak.

¹⁹At Temira nen apuri aap ndaganabeegerak ti, Akayan, Tekem, Liki, Aniyam aret.

²⁰At Eparayim paga wiganak ti, at aput Tutela ndake, at Tutela nen aput Mberet ndake, at Mberet nen aput Takat ndake, at Takat nen aput Elara ndake,

²¹at Elara nen aput Takat ndake, at Takat nen aput Tabat ndake, at Tabat nen aput Tutela ndake, eerit wundi wogogwaarak. It Etet Elat imbirak nen aakumi o Nggat nda'nogogwaarak mendek inaanggumi waawok nduk, eekwi iigak, inoorogo piyareegwaarak me,

²²it inogoba Eparayim nogo erabun ndoombunuk, le ari kagak, ne ambik aret wonage me, at oreewi nen iniki eyak wappi wagak eeko nogogwaarak.

²³Le ari wonagagerik, ti'nuk, akwe imbirak nogo yege mbareegi, kwe nogo abila a'nuk, aagaluk wulaga aret ndareegerak. Ndake mbareegi, “An naaganapuri ninom aaninggin ninoba agaarak me,” yinuk, endage Mberiya tooneegerak.

²⁴At apuluk kolaga endage Teera aret me, at nen o Mbet-Koron aginggwe inom, ogunggwe inom, wuke, o Uten-Teera inom wuke, eereegerak.

²⁵At Mberiya nogo nen aput aap Erepa ndake, Erepa nen aput aap Eretep ndake, Eretep nen aput aap Tela ndake, Tela nen aput aap Takan ndake,

²⁶Takan nen aput aap Laran ndake, Laran nen aput aap Amikut ndake, Amikut nen aput aap Elitama ndake,

²⁷Elitama nen aput aap Nun ndake, ndi, Nun nen aput aap Yotuwa ndake, eerit wundi wogogwaarak.

²⁸It inanggween inom, inawi yaga'lelo-yaga'lelo inom, ando ti, o Mbeten inom, enaagan-ambokan yaga'lelo mbuulogwe inom, oonegen lagi wage menggim pa'nggwe o Naaran inom, oonegen kilu yi nage menggim pa'nggwe kota Nggetet inom, enaagan-ambokan yaya'lelo mbuulogwe inom, kota Tikem inom, Tikem enaagan-ambokan yaga'lelo mbuulogwe-mbaalogwe inom, nok, kota Aya inom, enaagan-ambokan yaga'lelo-yaga'lelo inom, kuli unde wonogwe,

²⁹ndi, anebunu Manate wonogo menggam kuli pugu paga kota-kota Mbet-Teyan, Taanak, Megiro, Ndot, nogo inom, kota-kota ti, enaagan-ambokan yaga'lelo mbuulogwe-mbaalogwe abok aret inom, nogo kunduk unde wonogwe, eeko nogogwaarak. At Iterali aput Yutup apuri paga wiganak nogo, o kota-kota time wonogogwaarak.

³⁰At Atet nen apuri aap ndaganabeegerak nogo ti, Yimana, Yitawa, Yitiwi, Mberiya aret. Ndi, wologwe iniriluk kolaga ambit Tera aret ndareegerak.

³¹At Mberiya apuri aap ndaganabeegerak ti, at Kebet inom, at Mbiratayit ogoba Malikiyen inom, nogo aret o.

³²At Kebet nen apuri aap Yapelet, Tomet, Kotam, ndaganake nagagerik, iniri kolaga Tuwa aret ndareegerak.

³³At Yapelet apuri aap ndaganabeegerak ti, Patak, Mbimakap, Atiwat aret. At Yapelet apuri ti aret.

³⁴At Tomet apuri aap ndaganabeegerak ti, Aki, Oroga, Yekuba, Aram aret.

³⁵At Tomet awuluk Kelem nen apuri aap ndaganabeegerak ti, Topa, Yimana, Telet, Aman aret.

³⁶At Topa apuri aap ndaganabeegerak ti, Tuwa, Karenepet, Tiyuwan, Mberi, Yimara,

³⁷Mbetet, Kot, Tama, Tilata, Yitaran, Mbeera aret.

³⁸At Yetet nen apuri aap ndaganabeegerak ti, Yepune, Pitapa, Ara aret.

³⁹At Ula nen apuri aap ndaganabeegerak ti, Ara, Kaniyen, Iritaya aret.

⁴⁰It abok aret ti, at Atet paga nen wigannarit wundi wogogwaarak aret me, it ndarak lenok lombok inoweewi it ti aret. It apit aret wim eeka wakaa'ngget lombok mondok leenak aret wonogogwaarak. It nda'nogwe iinok, inendage liiru mbanak nogo paga aap wim eeka li'luk eerak ineebe ineenggi lingginik dua puluh enam ribu nogo, inom aret inendage liiru mbanogo pereegwaarak.