Read Western Dani 2 Mbinineegwaarak 1 Bible Online

2 Mbinineegwaarak 1 - Western Dani bible

2 Mbinineegwaarak 1

¹2 MBININEEGWAARAK WONE Aap Ndawut aput Talomo ti, ogoba Aliku Ala imbirak logonet, at abu iya lombok eeke logowak nduk, eeppereegerak me, endagembogut logonet, at abu'me piinok menggim ti, omaawi lombok aret eerogo pereegerak.

²It Iterali abok aret inom, aap ineebe seribu lombok eerak inoweewi inom, aap ineebe 100 lombok eerak inoweewi inom, aap wone owak loongga inom, aakumi Iterali aago inoweewi inom, it ndarak ndegek lombok inoweewi inom, abok aret at Talomo nen wone lengganogo yorage logonet,

³“An ninom puut Nggibeyon paga Ala ake warogo wogogo menggam nogome nawok o,” yorage nagagerik, it apit aret inom at Aliku ALA ayeloman Muta o karume logonet, Ala inom lambungge logowam ooliya wuriyak yoreegerak wureegim puut Nggibeyon nogome aret nogogwaarak.

⁴ At Ndawut nen, “Ala aloobut mbanak, o Yerutalem yime logowak o,” yinuk, at logorak ooliya wurogo pereegerak me, Ala aloobut mbanak o Kiriyat-Yeyarim paga wonage nogo wa nanuk, wonok, o Yerutalem pi wagagerak wonage kagak kwe,

⁵ aap Kut ombooluk, aap Uri aput Mbetalen nen mbuti tembaga paga ake warogo wogogak eereegerak nogo perak, o Nggibeyon Aliku ALA awooliya wurik me enaame time wonagagerak. Time wonage me, at Talomo inom, aakumi at inom nogogwaarak nogo inom, nen, “Aliku ALA yo'nirage kaawok o,” yinuk, time kuwak eereegwaarak.

⁶Kuwak eeppunuk, Talomo nen Aliku ALA enggaanom taati at ake warogo wogogo menggaarak mendek seribu kuli warogo wogogak mbuti tembaga paga eerak Aliku ALA inom lambungge menggim ooliya wurik enaame wonage nogo paga ake warogo kani kuneegerak.

⁷Kumbunuk, oonikiya ti eyom paga nogo yege wonage me, at Ala eebe aap Talomo nogo nikka wage nagagerik, yoge logonet, “Talomo wae. Kat nen, An nano mendek wo'niriyak, nombake kenok, wokkirikit nduk, nggino yo'niru o.”

⁸Yoge mbareegi, at Talomo nen Ala yoge logonet, “Nogoba Ndawut nogo abuwa mba'nuk, obeelom eeppit wundi wage logonet, endagembogut a'nuk, wone lengganogo yorage nagagim obaane'me an aret mippaneegindak o.

⁹ Togop aret me, o yogondak Kaliku nogoba Ala wae. Aakumi ambik lombok liirubu kwak wonogwe nogo, inowe nendagembogut logokit nduk, mippaneegindak me, wone abuk nggaruk togon koonogo nogoba Ndawut yoreegindak nogo eeke keyaakit nduk, eeru o.

¹⁰It kapuri aakumi woneemaluk wonogwe yi, ta nen inawone op mbangge logorak mbaken? An meek aret me, inarum logonet inawone mbangge logokit nduk, yogondak kat nen aret niniki warak lombok eerogo panege, wone yelok kenok, koongge logorak mendek eerogo panege, eeru o.”

¹¹Yoge mbareegi, Ala nen Talomo nogo yoge logonet, “Kat nen, Neenggi warak lombok eeppanege, yi mendek ndi mendek wo'nege, nendage tiyanak logorak eeppanege, Nawim inoorogo piyet o, yinuk, yo'nege, neenik nggorek logokit nduk, eeppanege, eeru o, yinuk, yo'nirulik, ata, it aakumi inowe kendagembogut logonok nduk mippagareegirak nogo, Inarum logonet, niniki warak lombok logonet, yorage, wone yelok kenok koongge, eeke logokit nduk, eeppanu o, yinuk, yo'negendak me,

¹²kat nggino yo'negendak ndak-ndak kiniki warak lombok eeppagage, wone yelok kenok koongge logorak mendek eeppagage, eerigin o. Ti eeppagage logonet, obaga lunogo eeppagarak nogo ti, keenggi warak eeppagage, yi mendek ndi mendek wokkege, kendage tiyappagage, eerigin ti aret o. Ti eerogo pagagin nogo ti, kat mi'naga'lek keegak inendagembogut mi'nogogwaarak inom, mi'ndak keegak logorak inom, ti, kat ndak-ndak ambi lek aret o,” yinuk, yoreegerak.

¹³Ti'nuk, Talomo nogo ake warogo wogogo menggam o Nggibeyon paga Ala inom lambungge menggim awooliya wurik enaame nogome nen o Yerutalem wage nagagerik, aakumi Iterali inarum logonet, wone lengganogo yorage nagagerak.

¹⁴ At Talomo nen nggweendo wim eeka ineebe seribu empat ratus inom, kuda wim eeka ti, dua belas ribu inom, kuwak eeppiige nagagerik, o kota-kota nggweendo wim eeka logorak wureegim nogome piige, at wonageme o Yerutalem piige, eereegerak.

¹⁵Aap endagembogut nogo nen yugum nggininik kwak wu mbuti perak inom, wu mbuti emas inom, o Yerutalem ambik aret eerogo pege, ndi, eyo ndoolu puut ogobak-ogobak ambik pit nagagi kwak, eyo nggabina ambik aret kuwak eerogo pege, eereegerak.

¹⁶ At Talomo ake kuda o Metit nen wonok iri wogwe, it at ake yi mendek ndi mendek kunggo menggaarak nogo o Kewe nen kuda kumbunuk, wonok iri wogwe, eeko nogogwaarak.

¹⁷Nggweendo wim eeka ogobakkigirik o Metit nen wogori wogogwaarak nogo ambiret onggo ti, mbuti perak aaninggin 7 pugwi, ndi, kuda ambiret onggo ti, mbuti perak aaninggin mbere negen pugwi, eeko nogogwaarak. It Iterali mendek nen nggweendo wim eeka ogobakkigirik inom, kuda inom, aap alik inoona kumbunuk, wonok wonogwe iinok, it aakumi Ket mendek inoweewi inendagembogut inom, aakumi Aram mendek inoweewi inendagembogut inom, nogo nen Iterali inoba kuni wogo nogogwaarak.