Read Western Dani 2 Mbinineegwaarak 11 Bible Online

2 Mbinineegwaarak 11 - Western Dani bible

2 Mbinineegwaarak 11

¹Aap Erekabeyam nogo o Yerutalem ari wage nagagerik, “An Talomo aput aret me, aakumi Iterali nabu'me piirogo logokit nen tebenogo piya naakit o,” yinuk, it Yekura mendek abok aret inom, it Mbeniyamin mendek inom, inawuri wim eeka kero mban ineebe seratus delapan puluh ribu aret kuwak eeginabeegerak.

²Kuwak eeginabeegerak kwe, at Aliku ALA nen aap Ala wone liirogon eeka Temaya wone yoreegerak yi aret.

³“Talomo aput it Yekura inowe endagembogut Erekabeyam inom, it aakumi Iterali mendek o Yekura paga wonogwe inom, o Mbeniyamin paga wonogwe inom, wone yoraanok nduk yokkiri o.

⁴Aliku ALA nen ari logonet, It aakumi Iterali ando ti, inoreewi it mendek aret me, inom wim namburi noorak abu mage o. Wone yi agaarak nogo ti, an nen aret eerogo piigirak me, inalitak lombok iname nawak, yegerak, yora nak o,” yinuk, yoreegerak nogo yora nage mbareegi, konembunuk, aap Yerobeyam inom wim eeri noolik Aliku ALA nen wone lengganogo yoragagerak ndak-ndak aret iname nogogwaarak.

⁵Aap Erekabeyam nogo o Yerutalem wonage logonet, “Wim ninoori wogwe iyo,” yinuk, o Yekura kota-kota paga yugum pak omaawi wurogo pit nagagerak nogo endage ti,

⁶Mbe'lekem, Etam, Tekowa,

⁷Mbet-Tut, Toko, Arulam,

⁸Nggat, Maret, Tip,

⁹Arorayim, Lakit, Ateka,

¹⁰Tora, Ayalon, Keboron aret. It Yekura wonogo menggam inom, it Mbeniyamin wonogo menggam inom, kota-kota yugum pak omaawi wurogo pit nagagerak nogo ti aret.

¹¹At nen o kota-kota ti, yugum pak wurik omaawi eerogo pit nage nagagerik, unde logowak nduk, it aap wim eeka inoweewi mippiinet nage, inambi nunggo logorak inom, tayitun amburu inom, anggur amburu toolak inom, wogoroorak koonogo pege,

¹²nggeemu inom, wooluwak inom, kota-kota ti paga abok aret li'luk eerogo pege, eereegerak. O kota-kota ti, omaawi lombok eerogo pege nagagerik, o Yekura inom, o Mbeniyamin inom, at aret unde eeppunuk, wonagagerak.

¹³ Aap Yerobeyam inom, at apuri inom, nen, “It aap ti, Ala unde logonet, Aliku ALA ake eeko logorak mage o,” yinuk, puut-puut paga kugi aanggo wako menggam inom, kambin eege, tapi aagalogwe eege, inogut eerogo punuk, alut eeko menggam inom, unde logorak aap at mippiyoorak mbareegerak mban mippiinet nagagerak paga Ala unde inom, Lewi mendek inom, o Iterali paga wonogogwaarak nogo abok aret aap Erekabeyam inom aruwak nduk, inaanggumi inagari'ngga nenet nugu menggam inom, iname inom, mbo punuk, o Yekura paga, o kota Yerutalem paga, wogogwaarak.

¹⁶Wogwe me, aakumi Iterali inanebunu lombok abok aret iniki mondok nggaruk togon Aliku Iterali inogoba Ala mugurok noorak mbareegwaarak nogo nen it inombomini inogoba Aliku Ala ake warogo wogogak yuwak nduk, it Lewi mendek o Yerutalem wogwe me, inom wogogwaarak.

¹⁷Wogo nogogwaarik, aap inowe endagembogut Erekabeyam abu'me piinok menggim o Yekura nogo omaawi eerogo pugwi, ndi, aap Ndawut endagembogut logonet, wone lengganogo yorage, aap Talomo endagembogut logonet, wone lengganogo yorage, eekwi iigak, inoone konembunuk, eeko nogogwa kwak, “Aap Talomo aput Erekabeyam ninarum logorak op aret o,” yinuk, oone konenggwi, eekwi iigak, tahun kenagan aret eereegerak.

¹⁸Aap Ndawut aput aap Yerimot apuluk kolaga endage Makalat. Kolaga ti, agalo Itayi ombooluk aap Elikiyap aput kwe endage Abikayin aagaluk me, aap Erekabeyam waganeegerak.

¹⁹Waganeegerak me, kwe nogo aagalogwe wologwe at obaane'me ndaganabeegerak inendage ti, Yewuti, Temariya, Takom aret.

²⁰Kwe Makalat nogo wagangge nagagerik, ti'nuk, aap Abatalom apuluk kwe Maaka waganeegerak me, aagalogwe at obaane'me ndaganabeegerak ti, Abiya, Atayi, Tita, Telomit aret.

²¹Ndi, Erekabeyam nogo akuwi abe wogo inom, luulu wogo inom, iniki kunik aganake nagagerak kwe, aap Abatalom apuluk kwe Maaka nogo perak, iniki kundugu lombok eeke nagagerak. At akuwi abe wogo ti, 18 wonogwe, akuwi luulu wogo ti, 60 wonogwe, apuri wologwe 28 wonogwe, ndi, komologwe 60 wonogwe, eerak aret wonogogwaarak.

²²At Erekabeyam nen, “Kwe Maaka aagaluk aap Abiya nogo an nobaane'me aap endagembogut logowak o,” mba'nuk, at oreewi inenggela'me nen it inowe nagawan logowak nduk, mippereegerak.

²³Mippege nagagerik, at iniki warak lombok logonet, apuri ando abok aret o Yekura paga, o Mbeniyamin paga, kota-kota omaawi eerogo pereegerak nogome piinet nage nagagerik, inambi noorak ambik lombok wogorage, ndi, inakuwi kolaawak nduk, ambik aret pipuk eerogo piige, eereegerak.