Read Western Dani 2 Mbinineegwaarak 12 Bible Online

2 Mbinineegwaarak 12 - Western Dani bible

2 Mbinineegwaarak 12

¹It Iterali nen aap Erekabeyam inowe endagembogut mippogo mbareegwa, wone lengganogo yorage kagak, at abu'me piinok wonage me omaawi age, endage tiyak ari, eeke kagak, at inom, Iterali abok inom, eeko logorak Aliku ALA nen yoragagerak liiru mbanak nogo mbo pereegwaarak.

²Aliku ALA oone li'lak eeko logolik mbo pereegwaarak me, at Erekabeyam inowe endagembogut wonage kagak, tahun 4 eeppunuk, ambi age paga, it Metit mendek inowe endagembogut Titak nen o Yerutalem tebenikit nduk,

³wim eeka nggweendo seribu dua ratus inom, it aap kuda paga kwi'na'nuk nega enam puluh ribu inom, ineegin warak aap Libiya mendek, Tuki mendek, Kuti mendek, ineebe ambik ineenggi lingginiyak meek inom, o Metit nen aap Titak inom wogo nogogwaarik,

⁴o Yekura inawi kota-kota pak wurik wonage kagak, tebenggonet o Yerutalem panggoni wogogwaarak.

⁵Panggoni wogo mbareegwa, at Erekabeyam inom, it aakumi Yekura inoweewi inom, aap Titak inagabiti nen o Yerutalem kuwak eereegwaarak wonogwe me, aap Ala nen yoge kagak yoraga Temaya nogo inowagam nage nagagerik, yorage logonet, “At Aliku ALA nen yegerak nogo yokkira o. It an mbo panegaarak me, an kunduk, aap Titak eenggime aruwak nduk, mbo piyaagin, yegerak o.”

⁶Yorage mbareegi, it Iterali inoweewi inom, aap endagembogut inom, iniki tebeppatinuk yogo logonet, “At Aliku ALA nen eekwi ndak-ndak a'me nggelok eeppiige menggerak kogo o,” yogogwaarak.

⁷Ndi, it iniki tebeppakwi nogo Aliku ALA iige nagagerik, aap Temaya wone ambinom it yoraawak nduk, yoge logonet, “It nogo iniki tebeppakaarak me, o Yerutalem nanini nen eeppuurak koonggirak nogo aap Titak nen eeppege, ndi, ineebe an nen lek eerogo piige, eerigin lek inagap ndarogo teppiyaagin kwe,

⁸an noone konembunuk eekwi, ndi, it aakumi inambik inoweewi inendagembogut inoone konembunuk eekwi, eeko logonet, Yi op kagak eekoorak ilik, maluk kagak eekoorak a? yinuk, yelok kaawak nduk, at abu'me piyaagin o,” yinuk, yoreegerak.

⁹ Ndi, it Metit mendek inowe endagembogut Titak nogo o Yerutalem tebeni unggwage nagagerik, yi mendek ndi mendek onggo nggwok Aliku ALA awi wurik me wonage nogo abok aret wagangge, aap endagembogut awi o nggwok abe wurik me wonage nogo abok aret wagangge, eeke logonet, at Talomo nen mbuti emas paga yi nggeemu ndi nggeemu ogobakkigirogo pereegerak nogo inom wonok nagagerak.

¹⁰Wonok nage mbareegi, nggeemu ogobakkigirik wonok nagagerak nogo, obaane'me at endagembogut Erekabeyam nen mbuti tembaga paga ogobakkigirogo punuk, inowe endagembogut awi o nggwok abe wurik tungga paga arum menggaarak inoweewi nogo nggeemu ti, unde eeppiyareegerak.

¹¹Ndi, aap endagembogut nogo Aliku ALA awi wurik me unggwi nage kenok, it aap unde eeppiyareegerak nogo nen nggeemu nogo wonok, muluninuk unggwi nogo nagaatik, wundi wage kenok, muluninuk ame pi woraanuk, nggeemu nogo obaane'me wonage menggim nogome pi unggwagak eeko nogogwaarak.

¹²Aliku ALA nen aap Erekabeyam nogo iniki tebeppake, ndi, o Yekura time it ando obeelom eerit nogwe, eekwi iige nagagerik, anini aap Erekabeyam oba puurak mbake nogo tayok ari logonet, aaninggin oba pereegerak kwe, eebe perak, warulik teppereegerak.

¹³Ndi, aap endagembogut Erekabeyam nogo o Yerutalem endagembogut logonet, wone lengganogo yorage nagagerak paga at wone lengganogo yorage menggim nogome omaawi aret arit nagagerak. At ndarak kagak, tahun 41 paga endagembogut age nagagerik, it Iterali inanebunu lombok inawi kota-kota wonage kagak, at endage ki logowam Aliku ALA nen kota Yerutalem leenogo pereegim nogome wone lengganogo yorage kagak, tahun 17 eereegerak. At agalo ti, kwe Amon mendek endage Naama aret.

¹⁴At Erekabeyam nogo nen, “Aliku ALA mugurok nage logokit o,” yinuk, iniki nggaruk togon koonulik me, maluk aret eerit nage nagagerak.

¹⁵At Erekabeyam endagembogut a'nuk, wone lengganogo yorage logonet, aa'nduk nen nok, age yobok eerit nage nagagerak nogo abok aret, at Ala nen yoge kagak yoraga Temaya inom, abinggaanggo kaga aap Iro inom, nen aakumi nda'narit wundi wogogwaarak inendage liiru mbanak wonage nogo inom liiru mbanogo pereegwaarak nogo lek a? Aap Erekabeyam Yerobeyam imbirak wim mondok kunik aret eeko nogogwaarak.

¹⁶Eeko nogogwaarik, at Erekabeyam nogo ombomini kambunuk nogogwam inom yonggonggola nage mbareegi, eebe Ndawut agota paga kanggwi iinok piya unggwogo menggam pi unggwogogwaarak. Pi unggwogo mbareegwa, obaane'me aput Abiya inowe endagembogut agagerak.