Read Western Dani 2 Mbinineegwaarak 13 Bible Online

2 Mbinineegwaarak 13 - Western Dani bible

2 Mbinineegwaarak 13

¹Aap Yerobeyam nogo Iterali inowe endagembogut logonet, wone lengganogo yorage kagak, tahun 17 eeppunuk, ambi age paga aap Abiya nogo it Yekura mendek inowe endagembogut age nagagerik,

²o Yerutalem logonet, it Yekura wone lengganogo yorage kagak, tahun kenagan eereegerak. At agalo nogo ti, aap Nggibeya mendek endage Uriyen apuluk kwe Mikaya aret. Ne ambi paga aap Abiya Yerobeyam imbirak wim nggagambunuk,

³aap Abiya awuri wim eeka wakaa'ngget ineebe empat ratus ribu koonogo kwippiige, ndi, aap Yerobeyam awuri wim eeka wakaa'ngget ineebe delapan ratus ribu koonogo kwippiige, eereegwaarak.

⁴Eeppunuk wonogwe iigak, aap Abiya o Eparayim nggelok-nggobok puut Temarayin paga lagi nanuk, wone eerogo wuppi wage logonet, “Kat Yerobeyam kawuri Iterali abok kinom yi wae. Wone an yokkirage yi, konenggo logonip o.

⁵At Aliku Iterali inogoba Ala nen at Ndawut apuri wiganak inom nen mban Iterali inoweewi inendagembogut logonet, wone yorogo logowak o, yinuk, wone koonogo pereegerak nogo lek age kero, mayu eerogo punuk nunggugwaarak nogo kat keenggo'lek ya?

⁶Togop aret koonogo pereegerak kwe, aap Ndawut aput Talomo inom eeke nagagerak Nebat aput Yerobeyam nogo nen ari logonet, Nogoba nen wone lengganogo yo'nirage logorak neebi o, ari nagagerik,

⁷aap iniki lek a'nggan wogonaka inom a'nuk, aap Talomo aput Erekabeyam awo tawe me iniki kwippunuk ko wakak yuurak meek kenok, Kat ninowe endagembogut logorak lek o, yinuk, inom ogookkologogwaarak.

⁸At Aliku ALA abu'me piinok wonage menggim aap Ndawut paga wiganak nen unde logowok nduk, eeppinaneegerak kagak, kat o yogondak tebenogo pinaniyak nduk koonggendak ya? Kawuri wim eeka ambik ineenggi lingginiyak meek aret wonogwe, ndi, at Yerobeyam nen kit alut eeko logorak Ala obaane'me mbuti emas paga tapi aagalogwe kinake ogobakkigirogo wokkiragagerak nogo porogo wonogwe, eekwi kwe,

⁹at Aliku ALA unde Karun apuri inom, it Lewi mendek inom, endekem wumbiige nagandik, inobaane'me it aakumi inawi alik me nen eeko mengga kwak Ala obaane'me kit alut eekwi nogo unde logowak nduk, aap ugun-ugun mippiige, ndi, it aap ugun nen, Nit ninogoba alut eekwi nogo unde logokit o, yinuk, tapi ngguunok awooluk inom, ndomba ngguunok 7 inom, wonok wogwe iinok, Ala lek kagak, Ala obaane'me kinagugi unde logowak nduk mippiige, eeke menggendak nogo lek a?

¹⁰Nit perak, Aliku ti, ninogoba Ala aret me, mbo pega'lek at mban alut eeko ogoorik o. Aliku ALA unde logonet, ake eekwi nogo ti, Karun apuri aret o. Ndi, yeenggwaarogwe nogo ti, it Lewi mendek aret.

¹¹Kubondendok inom, kiyoma inom, Aliku ALA ake warogo kani kunggwi, obari abe kaga nogo kani kunggwi, eyo ndoonak ake nggomoorak nogo paga Ala wonage mbaruwak nduk oroti koonogo pugwi, ndi owak mbuti emas paga ogobakkigirik nogo ko'lu-kii'me o kiyoma age kenok wuninogo pugwi, eeko menggaarak me, at Aliku ninogoba Ala nen, Eeko logonip o, yo'niragagerak nogo nit aret liirogon eeko monggoorak kwe, kit perak, at mbo pogotak nogo o.

¹²Nit Ala ninom ogwe niinok, at nen ninarum wonage yi kaanip o. Ninom wonage me, kit ninom wim perenggolaawok nduk, it aap at unde menggaarak nen oone nggwok eeka trompet nogo oone pu eerugun me, kit aap Iterali mendek yi wae. Kinombomini inogoba Ala kinom wim nambukwi kiinok, kineegin tiyak yigin mondok lek me, Aliku ALA kinom wim eeriyak mage o,” yinuk, wone eerogo wuppi wagagerak.

¹³At Yerobeyam awuri ando inom it Yekura mendek inaame ogwe, it ando Yekura mendek inambokan wanggeri nawak nduk nappiige, eereegerak me,

¹⁴it Yekura ina melarogon inambo'me na'nogo nogogwaarik, inambokan panggo agan, inaame panggo agan, wogwe iigo nogogwaarik, inoone nggwok paga Aliku ALA yogo mbareegwa, it Ala unde nogo nen oone nggwok eeka trompet nogo oone pu eekwi,

¹⁵ndi, it aap wim eeka Yekura mendek nen, “Ninawim, Wu!” yinuk, yogwe, eereegwaarak. “Ninawim, Wu!” awo yogwe iigak, Ala nen aap Abiya it aap Yekura inom inigen iigak, aap Yerobeyam awuri Iterali abok inom mappiyareegerak

¹⁶mbaganit nogwe me, it Yekura nen muguren nogo mbareegwa, Ala nen ineenggime piyareegerak.

¹⁷Piige mbareegi, aap Abiya awuri inom nen muguren nogo logonet, it Iterali aap wim eeka wakaa'ngget nogo mondok iya lombok ineebe lima ratus ribu inoorogo piinet nogogwaarak.

¹⁸Ti eereegwaarak nogo ti, it aap Yekura mendek nen inombomini inogoba Aliku Ala paga panggombunuk eereegwaarak me, ne ti eyom paga it Iterali tebenogo piinok, ineegin tiyak yereegerak.

¹⁹Aap Abiya nen Yerobeyam tigirok-mugurok eerit nage logonet, kota Mbeten inom, Yetana inom, Eporon inom, kota-kota ti, enaagan-ambokan mbuulogwe-mbaalogwe inom, abok aret tebenggolagagerak.

²⁰Tebenggolage nagagerik, at Abiya endagembogut wonage kagak, at Yerobeyam endage tiyanak wonagagi kwak logolik, endage lek aret agagerak wonage me, Aliku ALA nen warogo pege mbareegi, kambeegerak.

²¹Ndi, at Abiya perak, endage nggwok age, akuwi 14 wogonake, apuri aap 22 ndaganake, komologwe 16 ndaganake, eereegerak.

²²Ndi, at endagembogut logonet, eerit nage, wone lengganogo yorage, eeke nagagerak ando abok ti, aap Ala nen yoge kagak yoraga Iro liiru mbaneegerak wonage nogo paga inom mbanak wonage o.