Read Western Dani 2 Mbinineegwaarak 14 Bible Online

2 Mbinineegwaarak 14 - Western Dani bible

2 Mbinineegwaarak 14

¹Aap Abiya nogo ombomini kambunuk nogogwam inom yonggonggola nage mbareegi, aap Ndawut agota paga kanggwi iinok, piya unggwogo menggam eebe pi unggwogo mbareegwa, obaane'me aput Ata endagembogut age nagagerik, wone lengganogo yorage kagak, o ti abolok lek obeelom mban wonagagerak. Wonage kagak, tahun 10 aret eereegerak.

²At Ata nen Aliku ogoba Ala enegen kagak abe koonak mban eeke nagagerak.

³Eeke logonet, Ala ake lek kugi inake kani kunggo menggam inom, puut-puut paga warogo wogogo menggam eerak inom, minogo mbo pege, it inalut eekwi kugi inogut yugum paga eerak nogo yanggunogo pit nage, kugigwe Atitoret ageyo arelen yinik nogo nggarik-nggarek eerogo pege, eeke nagagerik,

⁴it Yekura mendek nen inombomini inogoba Aliku Ala mugurok nogwe, ndi, eeko logorak Ala nen yoragagerak wone inom, “Yogop ee'nu ndogop ee'nu,” yugu inom, eekwi, eeko logowak nduk wone lengganogo yorage,

⁵o Yekura kota-kota abok aret puut-puut paga it inalut eekwi inake warogo wogorogo menggam inom, obari abe kaga kani kunggo menggam inom, minogo mbo pege, eereegerak paga at abu'me piinok wonage menggim wone ambi aga'lek obeelom aret wonagagerak.

⁶At Aliku ALA nen o ti abolok lek logowak nduk, eeppereegerak paga yi tahun ndi tahun eeke ti eyom paga inom wim eeri woroolik o ti obeelom aret wonagagerak me, at Ata nen o Yekura kota-kota pak wurogo pit nagagerak.

⁷Wurogo pit noorak yoragagerak nogo yi o. “At Aliku ninogoba Ala mugurok nogwe niinok, aakumi ninaagan-ambokan nen ambi eeppinanega'lek ugun logowok nduk, eeppinanege, ndi, at mugurok nogwe paga ninanggween wo'niragagerak nineenggime awo wonage, eeke me, o kota-kota yi, omaawi logowak nduk, yengget-wangget pak wurogo pugwi, nggayo tum logorak wurogo pugwi, tu unggwi wogo menggam tungga inom, wa'mbit inom, ogobakkigirogo pugwi, eeko logowok o,” yinuk, yorage mbareegi, ti aret eeko nogogwaarik, obeelom aret wonogogwaarak.

⁸Aap Ata awuri Yekura mendek ineegin warak inanggeemu kole inom, inawooluwak inom, li'luk eerak wonogogwaarak ti, ineebe tiga ratus ribu aret. Ndi, awuri Mbeniyamin mendek ineegin warak inanggeemu mbuulogwe inom, ineegin-inomaale inom, li'luk eerak wonogogwaarak ti, ineebe dua ratus delapan puluh ribu aret me, it abok aret wakaa'ngget wim kalu-kalu lombok aret wonogogwaarak.

⁹Wonogwe ti eyom paga aap Kuti mendek Tera awuri ineegin warak ineenggi lingginiyak meek inom, wim eeka nggweendo tiga ratus inom, aap Ata awuri inom wim eeruwok nduk, wundi wogo nogogwaarik, o Mareta ari wogogwaarak.

¹⁰Ari wa'nuk, ena koonogo pereegwaarak wonogwe me, aap Ata nogo awuri inom nen it inom wim eeruwok nduk, o Mareta koorok kobappaga Tepata nogome ena kooni nogogwaarak.

¹¹Ena koonogo punuk, Ata nen Aliku ogoba Ala yoge logonet, “Kaliku nogoba Ala o. Aap inomaawi ambik nen inomaawi lek nogo tebenogo piyoorak nduk, eekwi iinok, yeenggwaarage menggendak kat kokwak ambi wonogwe lek kalik aret me, niniki kat paga panggombunuk, kat kendage paga it aap ineegin warak ineenggi lingginiyak meek aago yi, ninom wim eerugun me, eekwi niigak, Kaliku ninogoba Ala yeenggwa nirage logot o. Kat Kaliku ninogoba Ala aret me, kat nen mbake logonet, Aap nggween paga mendek ambi nen an tebenogo paniyak op aret, mbariyak ti mage o,” yinuk, tamban eereegerak.

¹²Tamban eeke nagagerik, at Ata Yekura inom wim namburit nogwe iigak, at Aliku ALA aa'nduk a'nuk inoorogo pit nage mbareegi, it Kuti mendek kole mbaganit nogwe me,

¹³at Ata awuri ineegin warak inom nen muguren-magaren eerit o Nggerat ari nogogwaarak. At Aliku ALA aap Ata awuri ineegin warak inom a'nuk, it Kuti mendek mondok aan lebenogo inoorit nogo logonet, mondok iya tit inoorogo piinet nogogwaarak me, it melak yogo logonet, onggo inooriyak meek aret agagerak. Meek aret age kagak, inooppunuk, inagugun mondok iya lombok ko'nok wogogwaarak.

¹⁴Ko'nok iname wogo logonet, it aakumi o Nggerat enaagan-ambokan kota mbuulogwe-mbaalogwe abok aret Aliku ALA inaganak warogo piyareegerak wonogwe iigak, at Ata awuri inom nen inawi kota-kota ti, lek eerogo piinok, inayi mendek ndi mendek ambik lombok wonage me, inagugun kologwe,

¹⁵it aap kambin-ndomba inarum menggaarak inawooliyana wonogwe me, inoba kwi'na'nuk, inaanggumi ndomba inom, kambin inom, unta inom, inagugun negen kologwe, ee'nuk, iniyokan o Yerutalem wogogwaarak.