Read Western Dani 2 Mbinineegwaarak 19 Bible Online

2 Mbinineegwaarak 19 - Western Dani bible

2 Mbinineegwaarak 19

¹Aap Yekura inowe endagembogut Yotapat nogo iyokan o Yerutalem awi o nggwok abe wurik me nogome obeelom aret wage me,

²aap abinggaanggo kaga Kanani aput Yeku nogo nen at Yotapat nogo ka wundi nage nagagerik, at yoge logonet, “It aap maluk lombok eekwi nogo yeenggwaarage, ndi, it Aliku ALA ineebi mbakwi nogo kiniki kunik aganake, eeke menggendak ti, op aret mbaken? Ti eekendak paga Aliku ALA anini koba aret wonage o.

³Togop aret kwe, kat nen o yime kugigwe Atiyera ageyo yinit nogogwaarak nogo mbanogo mbo pege, ndi, Ala mban mugurok nage logokit o, yinuk, kiniki mondok nggaruk togon koongge, eekendak me, kiniki obeelom wonage keegi o,” yinuk, yoreegerak.

⁴At Yotapat nogo awi Yerutalem aret wonagagerak. Wonage logonet, it aakumi o Mberetiyeba nen nok, o Eparayim nggelok-nggobok kuli wonogwe nogo abok aret yungguk togon inombomini inogoba Aliku Ala owagam woraawak nduk, yoranet nege nagagerak.

⁵O Yekura kota-kota pak wurik me nogome abok aret aap inowak loonggo logowak nduk, mippiige nagagerik,

⁶it yorage, “Kit nen aakumi inowak loonggo logonet, aakumi inikilom kinombaruwak nduk, inowak loonggo logobok o. Ata, Aliku ALA inikilom mbaruwak nduk, eeko logomunggup o. Ndi, eeko logomonggotik, amburu mbanggwi kiigak, Aliku ALA enegen wokkinake logogin me, liippunuk eeko logomunggup o.

⁷At Aliku ninogoba Ala nen aakumi inowak loongge logonet ugun-ugun eeke, inetenggen maloppiinok eeke, Wu kolaakit mbakak eeke, eekeelik me, Aliku ALA kinagabiti mbako logonet, mondok liirogon inowak looninako logonip o,” yinuk, yoragagerak.

⁸Ndi, o Yerutalem logonet, eeko logorak Aliku ALA wone yugu liiru mbanak nogo maloppunuk eekwi, wone wakwi iinok amburu mbanogo yorogwe, eeko logowak nduk, it aap Lewi mendek ando inom, Ala unde ando inom, Iterali ndarak ndegek inarum logorak inoweewi ando inom, mippiyareegerak.

⁹Mippiige nagagerik, wone yorage logonet, “Kit Aliku ALA kinagabiti mbako logonet, mondok liippunuk kiniki abe koonak paga eeko logonip o.

¹⁰Kit kinoreewi o kota-kota nen kinowagam wogo logomenggaarik, Aap amiya wunakwi iinok nonggop eeko logowok o, yinuk, yokkirogwe, ndi, eeko logorak wone yugu liiru mbanak inom, Yogop ee'nu ndogop ee'nu, wone yugu inom, wone lengganak inom, eeko logorak wone inom, ti nonggop o? yinuk, yokkirogwe, eekwi iinok, kit inom, kinoreewi inom, Aliku ALA anini kinoba pinagakwak, Ndogop eeko logonip o, yinuk, yorogo logonet, Aliku ALA maluk eeppukwak liirogon aret yorogo logomunggup o. Liirogon yorogwe kiinok, kit maluk eerumunggup lek o.

¹¹At Aliku ALA ti, nonggop o? yokkirogwe iinok, onggo yorage logorak ti, aap Ala unde inowe Amariya mippege, ndi, Aap endagembogut ti, nonggop o? yokkirogwe iinok, onggo yorage logorak ti, inanebunu Yekura mendek inowe aap Itamayen aput Tebaya mippege, ndi, kit kinake wone wonok nugu logorak ti, it Lewi mendek aret mippiige, eekirak me, it aap iniki abe paga eekwi iinok, Aliku ALA inom aret logogin me, kinogogumbuk a'nuk, eeko logonip o,” yinuk, yoragagerak.