Read Western Dani 2 Mbinineegwaarak 2 Bible Online

2 Mbinineegwaarak 2 - Western Dani bible

2 Mbinineegwaarak 2

¹At Talomo nen, “Aliku ALA endage ki logowak nduk, at awi wurogo pege, ndi, an nawi o nggwok abe wurogo pake, eerikit o,” yinuk, wone lengganogo pereegerak.

²Pege nagagerik, at nen aap ineebe tujuh puluh ribu nen yi mendek ndi mendek kaganggo logorak yorage, aap ineebe delapan puluh ribu nen puut paga yugum nggaganggo logorak yorage, ndi, aap ineebe tiga ribu enam ratus nen it aakumi ti, eekwi iigak, “Yogop ee'nip, ndogop ee'nip,” yorogo logowak nduk, mippiige, eereegerak.

³Eeppiige nagagerik, at Talomo nogo nen aap o Tirut mendek inowe endagembogut Kiram wonage me wone eerogo nappiige logonet, “Nogoba Ndawut nen, An logowam nawi o nggwok abe wurikit o, ari mbareegi, eyo nggabina mbanogo nappi wage nagagindak kwak, an togon eyo nggabina mbanogo nappani wa'nu o, yinuk, yokkigi o.

⁴It Iterali nen obari abe kaga kani kunggwi, ko'lu-kii'me oroti alik leenak nogo ndoonogo pugwi, ndi, kubondendok paga, o kiyoma paga, nogo 6 yippunuk, ko'lu nogo 7 yonggonggologo logorak paga, tut ngget penengge kenok eekwi paga, Aliku ninogoba Ala ninale'nggen nen laago lako logorak koonogo pugu nogo lakwi paga, ake warogo kani kunggwi, eeko logorak nogo ti, mondok-mondok eeko logorak wone koonak me, Aliku nogoba Ala endage ki logowak nduk, eeke, ndi, ti eeko logorak ake at awi wurogo pege, eerikit nduk, eeke agarik o.

⁵Yi kugi ndi kugi abu tebenak iigak, Aliku ninogoba Ala ti, abu nggwok ayuk warak lombok me, at awi an wuriyak ti, mondok nggwok abe lombok aret wurigin o.

⁶ Togop aret kwe, o mbogut paga inom, mbogut irimbaga kunduk inom, abok aret ti, nggwok aret wonage kwe, at logorak endak lek me, at logorak awi wurogo pege, ndi, an kunduk, Ta me? nduk, at logorak koonogo pege, eeriyak mbakop? Lek aret me, at enggaanom paga ake warogo kani kunggak yuurak nogo mban wurogo pikit o.

⁷Togop aret me, o yogondak yi paga aret kat nen aap mbuti emas paga, mbuti perak paga, mbuti tembaga paga, mbuti owak paga, yum maa'ngga anggup kunik paga, yum maa'ngga amu kunik paga, yum mbogut mili kunik paga, eenggi amburu eeke, ndi, yi mendek ndi mendek ayo wagangge, eeke menggerak abu eenu kero, nappi wage keenok, nogoba Ndawut nen it aap ineenggi amburu paga eeko menggaarak leenogo piyareegerak ninom o Yekura paga, o kota Yerutalem paga, wonogwe nogo, inom nen eeko logowak o.

⁸Ndi, nogoba kat wonage me time it aap kayeloman mini aap eyo muurogo mbangga ineenu wonogwe an neenu aret me, kat nen eyo puut Libanon mendek kilu-kilu inom, nggabina inom, ndiindi inom, mbanogo an wonage me yime nappi woraawak nduk, yorage keenok, an nayeloman mini nen kat kayeloman mini yeenggwa iraawak nduk, nappiya woraagin o.

⁹O an wuriyak ti, mondok nggwok iya lombok wurigin me, nayeloman mini nappiya wage neenok, inom nen eyo an nake ambik aret eerogo waganogo nappi wogo logowak o.

¹⁰It kayeloman mini nen eyo muurogo mbanogo nigakwi iigak, inambi nunggo logorak inake gandum ti, karun empat puluh ribu kuli yonggolak inom, waabuk negen jelai ti togon karun empat puluh ribu kuli yonggolak inom, anggur amburu ti, dua ribu nderom toolak inom, ndi, tayitun amburu ti, dua ribu nderom toolak inom, nappi woraagin o,” yinuk, wone eerogo nappiyareegerak.

¹¹Talomo nen wone eerogo nappereegerak nogo aap o Tirut inowe endagembogut Kiram nogo konengge nagagerik, wone onggo liiru mbanogo nappi wage logonet, “Aliku ALA nen at apuri inabuwa lombok mbake menggerak me, inarum logonok nduk, kendagembogut mippagareegerak o.”

¹²Ari nagagerik, ambinom yoge logonet, “Wulaga ambi iniki warak inom, iniki ngget inom, liippunuk, koongge logorak mendek inom, nogo mendek wonage menggi kwak, liippunuk, ndaruwak nduk, Ala nen aap endagembogut Ndawut eeppege mbareegi, Ndawut ndareegerak nogo nen Aliku ALA awi wurogo pege, ndi, kat kawi o nggwok abe wurogo pake, eeriyak kooneegindak me, at mbogut nggween wakkagagerak aakumi Iterali inogoba Aliku Ala endage alut eeke agarik o.

¹³Togop aret me, o yogondak aret aap eenggi amburu eeka endage Kuram-Abi nappi wagi o.

¹⁴Agalo ti, anebunu Ndan mendek, ndi, ogoba ti, o Tirut mendek aret me, at nogo nen mbuti emas paga, mbuti perak paga, mbuti tembaga paga, mbuti owak paga, yugum paga, eyo paga, yum maa'ngga anggup kunik paga, yum maa'ngga amu kunik paga, yum mbogut mili kunik paga, ligi yawenak abu abe laanak paga, eenggi amburu eeke, yi mendek ndi mendek inom ayo waganogo pege, Yi mendek ndi mendek ndogop eerogo pu o, yogwi iinok, eerogo pege, eeke menggerak me, kat kayeloman mini ineenggi amburu eeka inom, ndi, kogoba an nogoba Ndawut nogo ayeloman mini ineenggi amburu eeka kero, leenogo piyareegerak nogo inom, at inom aret eeke logorak op aret o.

¹⁵Ndi, gandum inom, waabuk negen jelai inom, tayitun amburu inom, anggur amburu inom, nogoba kat nen, Nappi woraakit, yagandak nogo nit kayeloman mini nappinani wage keenok, nonggo logonet,

¹⁶puut Libanon paga eyo kat uugwe mbakendak nogo ndak-ndak abok aret mbanogo pogo logomonggoorik, mbanak nogo keele maarogo niyo kole yenggenak laut paga punuk, wonok, o Yapo kiri wogwe niinok, kat nen wonok o Yerutalem pi namunggun o,” yinuk, eerogo nappi wagagerak.

¹⁷At Talomo ogoba Ndawut eeke nagagerak ndak-ndak at nen it aap nggiru o Iterali paga wonogwe nogo abok aret eenggi linggininake nagagerik, aap ineebe seratus lima puluh tiga ribu enam ratus aret wonogwe iyareegerak.

¹⁸Iige nagagerik, yi mendek ndi mendek kaganggo logorak ineebe tujuh puluh ribu aret leenogo piige, puut nggelok-nggobok paga yugum nggaganggo logorak ineebe delapan puluh ribu leenogo piige, ti eekwi inarum logonet, wone lengganogo yoragak eeko logorak ineebe tiga ribu enam ratus aret mippiige, eereegerak.