Read Western Dani 2 Mbinineegwaarak 20 Bible Online

2 Mbinineegwaarak 20 - Western Dani bible

2 Mbinineegwaarak 20

¹Ti'nuk, it Mowap mendek inom, Amon mendek inom, it Amon mendek inoreewi Mewunim mendek ambi aago inom, it abok aret at Yotapat inom wim namburuwok nduk, wogo mbareegwa,

²aap ando nen wone wonok at aap endagembogut Yotapat nogo yori wogo logonet, “Lek o. It aap wim eeka niyo Pili Age Menggim enebagan o Erom nen ineebe alik negen aago kat nogoba kinom wim eeruwok nduk, wagaarak yogondak o Kateton-Tamat wonogwe o.” O ti endage ambi, En-Nggeri aret.

³Ti yogo mbareegwa, at Yotapat nogo iniki abu lek age nagagerik, “Ninambe mage negen logonet, Aliku ALA yogwi niinok, yo'niraawak o,” yinuk, koongge nagagerik, it aakumi Yekura mendek abok aret yoragagerak.

⁴Yorage mbareegi, it aakumi Yekura mendek nen, “Aliku ALA nen yeenggwa niraawak nduk, nggino yori nawok o,” yinuk, o Yekura inawi kota-kota abok aret nen Aliku ALA ari kaawok nduk, o Yerutalem wogogwaarak.

⁵Wogo nogogwaarik, it aakumi o Yerutalem wonogwe nogo inom Aliku ALA awi wurik me oore'nggam ngget ogobakkigireegwam taati kuwak eeko mbareegwa, at Yotapat nogo inenggela'me mi'nage nagagerik,

⁶ari logonet, “Ninombomini inogoba Kaliku Ala o. Kat mbogut paga menggendak Ala nogo lek a? Mbogut paga logonet aakumi inanebunu lombok inabu'me piigo menggam abok aret kabu'me piinok, wone lengganogo yorage, aakumi tiyappiige, iya eeriyak mendek kat mban eeke, eeke keenok, aap ambi nen kat kimbirak wakkoorak mondok meek aret o.

⁷ Ninogoba Ala o. It kapuri Iterali inaame kaa'nduk a'nuk it aap inawi yime menggaarak nogo mugogo wumbiinok, o yi, kat kore Abarakam ombowologwe wiganak nen mondok-mondok unde logowak nduk, eeppiyareegindak nogo lek a?

⁸Unde eeppiige mbareegin, it nen o yime logonet kat kendage ki logowam kawi wurogo pagago nogogwaarik, yokkogo logonet,

⁹Ninomaluk onggo ninawim nen ninoori wogwe, andi at ambi oba agak age, mbi noogelo ninoba age, aaninggin-paaninggin ninoba age ti abok aret ee'ninake kagak, kat kendage ki logowam kawi wuriyak yi, enaame kenggaanom paga mi'ndak logonet, Nonggop eekkoloobok, kenok, ninoone nggwok paga yokkugwi niinok, karuk konengge logomenggendik, ninagap ndarumunggun o, yinuk, yokkereegwaarak o.

¹⁰ Yokkereegwaarak me, ninombomini o Metit nen wogoren wundi wage logonet, it aakumi Amon mendek inom, Mowap mendek inom, puut Teyit mendek inom, wonogwe me iname time, Unggwi nanuk, tebenogo piyoorak mage o, yorage mbareegin, inoorulik nomoppiigak wogogwaarak nogo inapuri wiganak nen o yogondak eeppinaniyak eekwi yi, iyet o.

¹¹Teppiyareegwaarak onggo negen nineyate kwak ninanggween unde eeppatinuk logorak wo'niragaginom yime nen mugogo wumbinaniyak eekwi yi, niyet o.

¹²Kat ninogoba Ala nogo lek a? It ineegin warak mondok alik negen aago ninoba kwi'nari unggwi woroorak eekwi yi, nit ninomaawi paga it eeppiyoorak meek me, kat nen aaninggin inoba kwippiyet o. Nit nen eeppiyoorak meek kenok, kat mban ninigen pekkeego o,” yinuk, tamban eereegerak.

¹³Tamban eeke mbareegi, it aap Yekura mendek inakuwi inom, inapuri wologwe-komologwe inom, elege-aabologwe inom, abok aret Aliku ALA enggaanom paga taati mi'ndak wonogwe me,

¹⁴aap Lewi mendek Atap paga wiganak Mataniya nen Yeyiyen ndake, at nen Mbenaya ndake, at nen Takariya ndake, eereegwaarak me, Takariya aput Yakatiyen nogo aakumi kuwak aago inenggela'me mi'ndak wonage me, at Aliku ALA Aberiniki at oba age mbareegi, it yorage logonet,

¹⁵ “Kat nowe kendagembogut Yotapat inom, kit o Yekura monggotak inom, o Yerutalem monggotak inom, at Aliku ALA nen wone yokkiragaarak yokkirage me, kinaruk logonip o. It aap wim eeka alik negen aago yi, kit kinom wim eerumunggup lek Ala nen aret it inom wim eerigin me, ineebe paga kinagabiti mbakwi, kinomanggen tayok ari, eeriyak mage o.

¹⁶Togop me, ko'lu nen o kobak nonggologo pereegim irip me nen karume Teruwen wambi nogo menggam puut Tit aanenggen me tu time lagi wogwe me, it kinom aabuk ariyak nduk, nogo logomonggotik,

¹⁷ kinom namburiyak kina koonogo punuk kiigak, Aliku ALA nen kineegin tiyappinagagin me, wim eeka'lek nu'lek puk aret logomunggup o. Kit Yekura mendek inom, Yerutalem mendek inom, yi wae. At Aliku ALA kinom aret logogin me, kinagabiti mbakwi, kinomanggen tayok ari, eeka'lek ko'lu aret kinom wim eeri namunggup o,” yinuk, yoragagerak.

¹⁸Yorage mbareegi, aap Yotapat endobanggun yindumbunuk, etenggen nggween paga wanduk yinuk, Aliku ALA alut eeke mbareegi, it aakumi Yekura mendek inom, Yerutalem mendek inom, abok aret Aliku ALA abu'me tebe yinuk, alut eereegwaarak.

¹⁹Alut eeko mbareegwa, it aap Kekat Kora mendek paga wiganak aap Lewi mendek ando mi'na'nuk, inoone nggwok lombok paga Iterali inogoba Aliku Ala alut eereegwaarak.

²⁰Ti'nuk, ko'lu kuubondendok it aakumi karume Tekowa nawok nduk, eeko mbareegwa, at Yotapat nen mi'na'nuk, wone yorage logonet, “Kit aakumi Yekura mendek inom, Yerutalem mendek inom, an wone yokkirage me, kinaruk logonip o. At Aliku kinogoba Ala kiniki oba panggombugwi kiinok, kiniki nu'lek eerogo pinagage, ndi, it aap Ala nen yorage kagak yoraga nen wone yokkirogo nogogwaarak nogo abet aret mbakwi kiinok, eeriyak mbakotak nogo a'me nggelok ari, eeke kaamunggup o,” yinuk, yoragagerak.

²¹Yorage nagagerik, it aakumi ti inom wone mbambunuk, at Yotapat nen it aap ineegin warak inambokan wogwe iigak, inaa'nduk a'nuk at Aliku ALA kikak naka'lek alik leenak mondok iya kenok, endage tiyappugwi, Aliku ALA endawi wakwi, eeko logonet, “Nit aakumi yi, Aliku ALA nen iniki kunik ee'ninake nogo Mondok-mondok aret ee'ninake logogin me, Wa lombok, yogo logowok o,” yinuk, yogo logowak nduk, aap mippiyareegerak.

²²Mippiyareegerak nogo logonet ndawi wakwi, endage tiyappugwi, eerit awo nogwe iigak, it o Yekura tebenggolaawok nduk, wogogwaarak aap Amon mendek inom, Mowap mendek inom, puut Teyit mendek inom, it mban-mban wat-wat yogo logonet, tebenogo pako logowak nduk, at Aliku ALA nen eeppiige mbareegi,

²³it aap Amon mendek inom, Mowap mendek inom, lambumbunuk, it aap o Puut Teyit mendek inoba kwi'na'nuk, ineebe lek eerogo inooppiinok, it Amon mendek Mowap mendek imbirak wat-wat yogo logonet, ineebe nogo tigitogon lek eerogo pateegwaarak.

²⁴Lek eerogo pateegwaarak wonogwe iigak, it wim eeka Yekura mendek nogo puut aanenggen me lagi nanuk, karume na'nogo menggam nen inigen wuriigo nogogwaarik, it inawim alik negen aago nogo ineebe ineenik ambi wonogwe lek tigitogon kambak nggween paga ngginik wonogwe iyareegwaarak.

²⁵Iigo nogogwaarik, at Yotapat awuri inom inawim inagugun waawok nduk, wambi nogo nogogwaarik, inamindik-inamendek inom, inambogoyum inom, ndi, yi mendek ndi mendek onggo iya mendek inom, ambik aret wonage kogo nogogwaarik, ne ambit paga kuwak eeppunuk wonok noorak meek age mbareegi, kuwak eekwi iigak, nogo kenagan yereegwaarak.

²⁶Nogo kenagan yinuk, ko'lu it abok aret o kobappaga endage, Alut Eeko Menggam, toonuwam taati kuwak eeppunuk, Aliku ALA alut eereegwaarak. Ti eereegwaarak kenok, o kobappaga ti endage, Alut Eeko Menggam o, yinuk, yogo nogogwaarak me, o yogondak yogwe wonogwe aret.

²⁷Eeko nogogwaarik, Aliku ALA nen inawim tebenogo piyareegerak ti paga inale'nggen nggwok eeginabeegerak me, at Yotapat nogo awuri Yekura mendek inom, Yerutalem mendek inom, wogoren iniyokan inale'nggen mbakak o Yerutalem unggwi wogogwaarak.

²⁸Unggwi wogo nogogwaarik, nggitat nggwok inom, mbuuluk inom, eekwi, ndi, oone nggwok eeka trompet nogo oone pu eekwi, eerit Aliku ALA awi wurik me ari nogogwaarak.

²⁹Yi o ndi o aap inendagembogut inabu'me piigo menggam aakumi abok aret Aliku ALA nen it aakumi Iterali inawim tebenogo piyareegerak nogo inaruk konenggo nogogwaarik, Ala inagabiti ambik ogogwaarak.

³⁰At Yotapat ogoba Ala nen at Yotapat iniki tayenak ugun logowak nduk, enaagan-ambokan awim wogwe iyo, non mbanogo piyareegerak me, at Yotapat abu'me piinok wonage menggim abolok lek obeelom aret wonagagerak.

³¹At Yotapat nogo it Yekura mendek inowe endagembogut logonet, wone lengganogo yorage nagagerak. At ndarak kagak, tahun 34 eeppunuk, ambi eeke paga it Yekura inowe endagembogut a'nuk, o Yerutalem logonet, wone lengganogo yorage kagak, tahun 25 aret eereegerak. At agalo ti, aap Tiliki apuluk kwe Atuba aret.

³²At ogoba Ata eerit nage nagagerak nogo, ambi mbo puulik Aliku ALA enegen kagak, obeelom mban eeke nagagerak kwe,

³³it aakumi puut-puut time kugi inake warogo wogorogo menggam eerak nogo perak, minogo mbo puulik teppereegerak paga it aakumi nen iniki nggaruk togon inombomini inogoba Ala oba panggombunuk, mugurok noolik o. Ata, Ala obaane'me alik mendek mugurok nogo nogogwaarak.

³⁴Aap Yotapat endagembogut logonet, aa'nduk nen nok, age yobok kuli eeke nagagerak nogo aap Kanani aput Yeku eeke nagagerak liiru mbangge logonet, inom liiru mbaneegerak. Ndi, at eeke nagagerak mbanak nogo ti, it Iterali inoweewi inendagembogut eeko nogogwaarak liiru mbanak nogo paga inom mbanak wonage o.

³⁵Ne ambi paga it Yekura inowe endagembogut Yotapat nen aap maluk eeke nagagerak Iterali inowe endagembogut Akatiya imbirak iniki ambit eeppunuk, wone mbanggo logonet,

³⁶“Yi mendek ndi mendek wonok negak yiiro ambik ogobakkigiruwok o,” yinuk, yiiro unggwi wage menggim o Etiyon-Nggebet time ogobakkigirogo pogo mbareegwa,

³⁷aap o Mareta mendek Ndorawa aput Eliyetet nen Yotapat owagam wage nagagerik, Ala yoge kagak wone yoge logonet, “Kat nen aap Akatiya kimbirak kiniki ambit eeppunuk, koonggotak me, ogobakkigirogo pogotak nogo Aliku ALA nen mondok yigirogo pigin o,” yinuk, yoreegerak. Ndi, wone yoreegerak nogo ndak-ndak yi yiiro ndi yiiro ogobakkigirik nogo, yi mendek ndi mendek wonok nega'lek kagak, taati aret mi-mi wambit nagagerak.