Read Western Dani 2 Mbinineegwaarak 22 Bible Online

2 Mbinineegwaarak 22 - Western Dani bible

2 Mbinineegwaarak 22

¹Aap aakumi a'nggan wogonaka it aap Arap mendek inom nen aap Yekoram apuri inom inawooliya wuppunuk wonogwe me nogome unggwi wogo nogogwaarik, at apuri abok aret inooko logonet, enabooluk ndarak Akatiya nogo mban teppereegwaarak me, it aakumi Yerutalem mendek nen aap Yekoram aput Akatiya nogo aret ogoba obaane'me logowak nduk, inowe endagembogut mippereegwaarak. It Yekura mendek inowe endagembogut Yekoram aput Akatiya it Yekura mendek inowe endagembogut agagerak ti aret.

²At Akatiya nogo ndarak tahun 22 eereegerak kagak it Yekura mendek inowe endagembogut age nagagerik, o Yerutalem logonet, wone lengganogo yorage kagak, tahun ambit aret eereegerak. Ndi, at agalo ti, aap Omiri ombooluk kwe Ataliya aret o.

³At agalo ti nen maluk eeriyak wone mban mamunige nagagerak me, at Akap akuwi-apuri inom, owe-awot inom, eerit nugu nogogwa kwak, at kunduk obaabut maluk logonet, eerit nage nagagerak.

⁴Ogoba kangge mbareegi, at Akap akuwi-apuri inom, owe-awot inom, nen, “Ndogop eeke logot o,” yinuk, yogo nogogwaarak me, it yogwi nogo mugurok nage nagagerak paga obaabut nggolo agagerak me, aap Akap akuwi-apuri inom, owe-awot inom, eerit nogo nogogwa kwak, Aliku ALA enegen kagak maluk eerit nage nagagerak.

⁵It ti nen yoreegwaarak paga at Akatiya nogo, Akap aput it Iterali inowe endagembogut Yoram imbirak nen aap Aram inowe endagembogut Katayen inom wim eeruwok nduk, o Aramot-Nggileyat nogo nogogwaarik, inom wim eeko logonet, it Aram mendek nen Yoram nogo maale wareegwaarak.

⁶Wako mbareegwa, aap Aram mendek inowe endagembogut Katayen inom o Aramot wim eekwi me, maale yinik-kunik eerogo pereegwaarak nogo, awin lek aruwak nuk, iyokan o Yitiren wage nagagerik, time aret wonagagerak. Ndi, it Yekura mendek inowe endagembogut Yekoram aput Akatiya nogo, aap Akap aput Yoram maale wareegwaarak o Yitiren wonage me pekka nagagerak.

⁷At Akatiya nen aap Yoram pekka nage eyom ti paga Ala nen enggaawak lek eerogo puurak kooneegerak me, aap Akatiya nen aap Yoram pekka nage nagagerik, aap Akap akuwi-apuri inom, owe-awot inom, inenggaawak lek eerogo piyaawak nduk, Aliku ALA nen amburu eerogo mippereegerak Yeku nogo wage me, inom lambunuwok nduk, at Akatiya Yoram imbirak wundi woraanuk, wogwe me,

⁸at Yeku nen Akap akuwi-apuri inom, owe-awot inom, eekaarak onggo aaninggin inoba kwippiinet nage logonet, aap Yekura mendek inoweewi nagawan-nagawan inom, aap Akatiya owe-awot inapuri nen at ndegenggo menggaarak nogo inom, inom lik yinuk, inoorogo piyareegerak.

⁹Inoorogo piige nagagerik, aap Akatiya nogo o Tamariya kumaa'nari nagagerak wonage me, kwaari nawak nduk, yorage mbareegi, kwaa'nuk, wonok, at Yeku wonage me pi wogo mbareegwa, at nen warogo pereegerak. Warogo pege mbareegi, aakumi nen, “At aap Yotapat ombooluk yi ti, iniki nggaruk togon Aliku ALA mugurok nage nagagerak me, eebe nggween taambuwok o,” yinuk, nggween taambereegwaarak. At Akatiya paga wiganak mendek ambi nen inowe endagembogut a'nuk, wone lengganogo yorogo logorak ndak lek aret o.

¹⁰Aap Akatiya agalo kwe Ataliya nogo nen, “Naagaluk kanggerak kagi,” mbake nagagerik, it Yekura mendek inowe endagembogut Akatiya apuri wiganak abok aret inoorogo piyaakit nduk eereegerak.

¹¹Inoorikit nduk eeke kagak, aap endagembogut Yekoram apuluk kwe Yotabat nogo nen aap Akatiya aput Yowat nogo, kwe Ataliya nen inom wake kero, apuri inenggela'me nen nggiginogo Ala awi wurik me nogo yogo menggam ambime kolaga ndegengga nogo imbirak time kumaappiyareegerak. Kwe Yoteba aap endagembogut Yekoram apuluk aap Ala unde Yoyara akwe ti, aap Akatiya iriluk aret me, kwe Ataliya nen wake kero, wulaga ti, kiraappereegerak me warulik.

¹²Wulaga Yowat ndegengga nogo imbirak Ala awi wurik me kwe ti inom kumaarak wonogwe iigak, kwe Ataliya nogo o time wone lengganogo yorage kagak, tahun 6 aret eereegerak.