Read Western Dani 2 Mbinineegwaarak 25 Bible Online

2 Mbinineegwaarak 25 - Western Dani bible

2 Mbinineegwaarak 25

¹Aap Amatiya nogo ndarak kagak tahun 25 eerak paga endagembogut a'nuk, o Yerutalem logonet, wone lengganogo yorage kagak, tahun 29 eereegerak. Ndi, at agalo ti, kwe Yerutalem mendek endage Yowaran aret.

²At Amatiya nogo ti, Aliku ALA enegen kagak obeelom eeke nagagerak kwe, iniki paga nen, “Nggaruk togon eeke logokit o,” yinuk, eeke logolik.

³At Amatiya nogo endagembogut logonet, abu'me piinok wonage menggim omaawi eerogo pege nagagerik, at ogoba inom eeko nogogwaarak nen ogoba endagembogut wareegwaarak nogo, inoorogo piyareegerak kwe,

⁴ Aliku ALA nen, “Yogop ee'nu ndogop ee'nu,” yorage logonet, “Inapuri eeremenggaarak paga inogobamini inoorak kanggwi, ndi, inogobamini eeremenggaarak paga inapuri inoorak kanggwi, eeriyak ti, mage o. Ata, it inalitak lombok maluk eeremenggaarak paga inooko logorak o,” yinuk, yoragagerak Muta nen mbuku paga liiru mbaneegerak wonage nogo ndak-ndak, it at ogoba wareegwaarak nogo inapuri inoorulik teppiyareegerak.

⁵Ti eeke nagagerik, at Amatiya nen aakumi Yekura mendek kuwak ari woraawak nduk, yoragagerak abok aret kuwak ari wogo mbareegwa, it Yekura mendek inom, it Mbeniyamin mendek inom, ndarak ndegek mugurok it aap ineegin warak ineebe seribu inowe ka nogwe, aap ineegin warak ineebe 100 inowe ka nogwe, eerit nawak nduk, yoragagerak iya nogo mbareegwa, at nen it aap ndarak iigak tahun 20 nen nok, agi nggwe eerit nagagerak kuli eenggi linggininabit nage nagagerik, aap wooluwak wonok wim eeriyak inobam inom, nggeemu langgumbunuk wim eeriyak inobam inom, ineebe tiga ratus ribu aret wonogwe iyareegerak.

⁶Ndi, it ando Iterali mendek wim kalu-kalu ineebe seratus ribu aret inom wim eerit noorak onggo wu mbuti perak aaninggin tiga puluh empat ribu wakkaanuk, wogoragagerak.

⁷Togop eereegerak kwe, aap Ala wone liirogon eeka ambi at ka wage nagagerik, yoge logonet, “Nogoba kendagembogut yi wae. At Aliku ALA nogo, it Iterali inanebunu Eparayim mendek yi, inom wonage lek me, Iterali mendek ineegin warak yi, kinom a'nuk, wim eeri noorak mage o.

⁸Yokkigirak kagak kinom a'nuk, kinogogumbuk logonet, kinomaawi paga wim eeri namunggup kenok, Ala ti, ineegin tiyak yuwak nduk eeppiige, tebek yuwak nduk eeppiige, eeke menggerak me, kat wim eeke keegak, kawim nen tebenogo pagawak nduk, Ala nen keegin tebenogo pigin o.”

⁹Yoge mbareegi, at Amatiya nen aap Ala wone liirogon eeka nogo yoge logonet, “Aakumi Iterali mendek it ineegin warak ineebe seratus ribu ninom wim eeriyak onggo wogoragarak ti, nonggop o?” Yoge mbareegi, aap Ala wone liirogon eeka nogo nen wone onggo yoge logonet, “Ti wu nggwok aret wogoragandak kwe, Ala nen abu nggwok lombok wokkirigin meek mbaken?”

¹⁰Yoge mbareegi, at Amatiya nen it ineegin warak o Eparayim nen at inom wim eeriyak nduk wogogwaarak nogo, iniyokan iname nappiige mbareegi, inanini agaket aap Yekura mendek inombarit inanini kani omoonuk negen eerit iname nogogwaarak.

¹¹Nogwe iigak, at Amatiya nogo agabiti lek aret awuri ineegin warak wogoren o Mayu Ogup Menggim Kobappaga time nogo nogogwaarik, it Teyit mendek inom wim nambuko logonet aap ineebe sepuluh ribu inoorogo piyareegwaarak.

¹²It Yekura mendek ineegin warak ti nen ando ineebe sepuluh ribu ineenik ngge-ngge wogoren puut paga yigeebu me piya laganggo nogogwaarik, mbo wuppiinet wogo mbareegwa, ineebe nggarenak-pugunik wambit wogogwaarak.

¹³Ti eekwi iigak, “It aap Iterali mendek ineegin warak ninom wim eerit noorak lek o,” yinuk, at Amatiya nen iname nappiyareegerak nogo, kota-kota Yekura o Tamariya panggombunuk, nugwa o Mbet-Koron paga oba kwi'nari unggwit nogo logonet, aakumi ineebe tiga ribu inoorogo piinok, inamendek ambik lombok kugun ko'nok ndi yereegwaarak.

¹⁴At Amatiya nogo nen aakumi Erom mendek inoorogo piinok, it aap Teyit mendek inagugi wonok ame wage nagagerik, “It inagugi yi ti, an nagugi aret aga o,” yinuk, endobanggun yindumbunuk, inayuk wuke logonet, kugi ti, inake aanggo warogo kani kungge nagagerak.

¹⁵Eeke mbareegi, Aliku ALA anini kani kunik negen mi'nage nagagerik, Amatiya nogo oba pege logonet, aap at nen yoge kagak yoraga ambi Amatiya wonage me nappi wagagerak wage nagagerik, at yoge logonet, “Aakumi Teyit mendek inagugi ti, omaawi lek me, inagap ndarulik kagak, kat nonggop nduk, Kugi yi paga nomaawi eeppanugo logowak o, yinuk, wonok wa'nuk, ayuk wuke agandik?”

¹⁶Wone awo yoge kagak, aap endagembogut Amatiya nen Ala yoge kagak yoraga nogo yoge logonet, “Kat nen aap endagembogut kini wuppege logorak nit nen mippagagoorak me ari agandik? Koone puk logot o. Koorogo pagarak uugwe mbake logonet, ari agandik ya?” Yoge mbareegi, aap Ala nen yoge kagak yoraga nogo, ne ambit iluk oone puk wonagagirik, at yoge logonet, “Kat yi eekendak paga inom, an yokkege neegak konengga'lek wonage paga inom, Ala nen kat kenggaawak lek eerogo pagarak koonogo pegerak nogo, an neenu aret me, ari agarik o,” yinuk, yoreegerak.

¹⁷Ti'nuk, at Yekura mendek inowe endagembogut Amatiya nen at inom wone koongga nogo inom wone mbambunuk, aap Yeku ombooluk Yowakat aput Iterali inowe endagembogut Yokawat nogo yoruwak nduk, wone eerogo nappiige logonet, “Nimbirak ninengga kunna'nuk, wim eeruwok nduk, omok o,” yinuk, wone eerogo nappiyareegerak.

¹⁸Nappiyareegerak yori nogo mbareegwa, aap Iterali inowe endagembogut Yokawat nogo nen aap Yekura inowe endagembogut Amatiya nogo wone onggo yoge logonet, “Iri'ngga alokwi mendek o Libanon puut paga wonage nogo nen eyo nggabina o Libanon puut-puut wonage nogo yoge logonet, Kat kapuluk kolaga nogo, an naput kolaawak nduk, wogoru o, yinuk, yoreegerak kagak, wam nggwiya puut Libanon mendek nen tu ti paga nage logonet, iri'ngga alokwi wonage nogo iyok paga aan lebenogo pit nagagerak o.

¹⁹Togop me, An nen it Erom mendek abu aret tebenogo pigirak me, an iya o, yinuk, kiniki wogoppake agandik ya? Kat inom, it aakumi Yekura mendek inom, kineebe nggelenggolookwak, nano wone agan nege agandik? Kame time koone lek aret logot o,” yinuk, wone eerogo nappiya wagagerak.

²⁰Wone eerogo nappiya wagagerak nogo, aap Amatiya yoreegwaarak kwe, aruk koneniyak eebi mbareegerak. Eebi mbareegerak alom ti, it aakumi Yekura mendek nen aakumi Erom mendek inagugi waganeegwaarak paga inawim ineenggime piyaakit nduk, Ala nen wone eerogo nappi wagagerak at Amatiya aruk koneniyak eebi mbaruwak nduk, eeppereegerak.

²¹Eebi mbake mbareegi, Iterali inowe endagembogut aap Yokawat awuri inom aago at Amatiya inom wim eeruwok nduk, wogo nogogwaarik, o Yekura inawi kota Mbet-Temet time inengga kunna'nuk, wim endok kuneegwaarak.

²²Endok kumbunuk, nambuko logonet, it Iterali nen it Yekura mendek tebenogo piigo mbareegwa, it Yekura mendek ineegin warak abok aret iname kole mbaganggugwak,

²³aap Iterali inowe endagembogut Yokawat nogo nen aap Akatiya ombooluk Yowat aput Yekura inowe endagembogut Amatiya nogo, o Mbet-Temet time pigagangge nagagerik, o Yerutalem woraanuk, yugum pak wurik tu endage, Eparayim Unggwogo Menggam, kuli nen nok, tu endage, Unggu'me Unggwogo Menggam, kuli metet seratus delapan puluh aret langgunogo pereegerak.

²⁴Langgunogo punuk, o Yerutalem unggwi woraanuk, mbuti perak inom, mbuti emas inom, Ala awi wurik me yi mendek ndi mendek aap Obet-Erom unde wonagagerak nogo inom, aap endagembogut awi o nggwok abe wurik me wu pogo menggam pugu wonage inom, abok aret wagangge, aap inom keele maarinake, ee'nuk, ame iyokan o Tamariya aret lagi nagagerak.

²⁵Aap Yowakat aput Iterali inowe endagembogut Yokawat nogo kangge mbareegi, at Yowat aput Yekura inowe endagembogut Amatiya wonage kagak, tahun 15 ambinom eereegerak.

²⁶At Amatiya nogo endagembogut a'nuk, wone lengganogo yorage logonet, aa'nduk nen irip paga kuli eerit wundi wage nagagerak nogo, abok aret ti, it Yekura mendek inom, it Iterali mendek inom, inoweewi inendagembogut eeko nogogwaarak liiru mbanak paga inom mbanak wonage nogo lek a?

²⁷Aap Amatiya nen Aliku ALA mbo pege mbareegi, aakumi nen iniki ambit eeppunuk, o Yerutalem time wariyak koonggo mbareegwa, kole mbaganit o Lakit nagagerak kwe, time mugurok nawak nduk, yorogogwaarak mugurok nogo nogogwaarik, o time aret warogo punuk,

²⁸at eebe warak kuda paga nippunuk, wonok o Yerutalem wogo nogogwaarik, Ndawut agota paga at ombomini kambeegwaarak piya unggwogogwam nogome inom tabonogo pi unggwogogwaarak.