Read Western Dani 2 Mbinineegwaarak 27 Bible Online

2 Mbinineegwaarak 27 - Western Dani bible

2 Mbinineegwaarak 27

¹At Yotam nogo ndarak kagak, tahun 25 age paga endagembogut a'nuk, o Yerutalem logonet, wone lengganogo yorage kagak, tahun 16 eereegerak. At agalo ti, aap Tarok apuluk kwe endage Yeruta aret.

²At Yoram nogo ogoba Utiya eeke nagagerak pogom Aliku ALA enegen kagak obeelom mban eeke nagagerak. Eeke logonet, ogoba Aliku ALA awi wurik me unggwi nagagi kwak, at unggwi noolik, obeelom mban eeke nagagerak kwe, aakumi nen perak, maluk mban eerit nogo nogogwaarak.

³At Yotam nen Aliku ALA awi wurik me tu endage, Agi Paga Unggwogo Menggam, obaane'me ogobakkigike, puut Open paga yugum pak wurik langgu-langgu nagagerak nogo wurogo pege,

⁴o Yekura puut nggelok-nggobok me o kota-kota eerogo pit nage nagagerik, yugum pak wurogo pege, o arum nggayo logorak eyonggaame o yerek-nggorek wurogo pit nage, eereegerak.

⁵At Yotam nen aap Amon mendek inowe endagembogut imbirak wim eeke logonet, it Amon mendek tebenogo piige mbareegi, it Amon mendek nen tahun ti paga inarum wonage onggo mbuti perak aaninggin tiga puluh empat ribu paga wakkagak waganggwi, gandum karun dua puluh ribu kuli yonggologo waganggi, waabuk negen jelai karun dua puluh ribu kuli yonggologo waganggwi, ee'nuk, at wogori wogogwaarak. Wogori wogo nogogwaarik, tahun peebi paga inom, ambokan inom, togop mban wogori wogo nogogwaarak.

⁶Aliku at ogoba Ala enegen kagak, enggaawak paga punuk, eerit nage nagagerak paga endage tiyak yereegerak.

⁷At Yoram nogo endagembogut a'nuk, wone yorage logonet, wim eeke nagagerak inom, eerit nage nagagerak inom, ando abok aret ti, it Iterali mendek inom, it Yekura mendek inom, inoweewi inendagembogut eeko nogogwaarak liiru mbanak paga inom liiru mbanak wonage nogo lek a?

⁸At ndarak kagak tahun 25 age paga endagembogut a'nuk o Yerutalem logonet, wone lengganogo yorage kagak tahun 16 aret eereegerak.

⁹At Yoram nogo, ombomini kambunuk nogogwam inom yonggonggola nage mbareegi, at Ndawut agota ombomini kambeegwaarak piya unggwogogwam nogome inom tabonogo pi unggwogogwaarak. Ndi, obaane'me at aput Akat nogo aret endagembogut agagerak.