Read Western Dani 2 Mbinineegwaarak 29 Bible Online

2 Mbinineegwaarak 29 - Western Dani bible

2 Mbinineegwaarak 29

¹At Kitikiya nogo ndarak kagak, tahun 25 age paga aap endagembogut a'nuk, o Yerutalem logonet, wone lengganogo yorage kagak, tahun 29 eereegerak. At agalo ti, aap Takariya apuluk kwe endage Abiya aret.

²Ombo Ndawut eeke nagagi kwak, Aliku ALA enegen kagak, at obeelom mban eeke nagagerak.

³Eerit nage logonet, tahun at endagembogut agagerak tut aa'nduk penenak ti paga, Aliku ALA awi wurik tu paarogo pit nanuk, tungga ogobakkigirogo pit nage nagagerik,

⁴it Ala unde inom, Lewi mendek inom, woraawak nduk, wiiragagerak wogo mbareegwa, oonegen lagi wage menggim pa'nggwe oore'nggam nogome kuwak eeppiige nagagerik,

⁵yorage logonet, “Kit Lewi mendek yi, an wone yokkirage me, kinaruk logonip o. Kit kinalitak lombok kinoba mbeenogo pakwi, kinombomini inogoba Aliku Ala awi wurik o magame maluk aago wonage nogo koorogo wumbunuk, leenogo pugwi, eeko logonip o.

⁶Nit ninombomini nen Aliku ninogoba Ala liirogon mugurok nogo logolik mbo punuk, at enegen kagak maluk mban eerit nogo logonet, Aliku ALA wonage menggim nen ina nomok yogwe, Aliku ALA inambokan mbo pugwi,

⁷Ala awi wurik endekenggwe wone mbanggo menggam tu narogo pit nogwe, ndi abok aret nogonogo pit nogwe, obari abe kaga kani kungga'lek mbo pugwi, o magame Iterali inogoba Ala ake warogo kani kungga'lek mbo pugwi, eereegwaarak.

⁸Ti eereegwaarak paga at Aliku ALA anini it Yekura mendek inom, Yerutalem mendek inom, inoba kwippiige logonet, aakumi nen nit niinok ninogole yogwe, inagabolo ne agan nogwe, miyuk-meya eerogo pinanggwi, eeko logowak nduk, yogondak niigwi yi, ndak-ndak eeppiyareegerak.

⁹Alom ti paga ninombomini wooluwak paga inookwi, ninapuri wologwe-komologwe inom, ninakuwi inom, keele maageren nogwe, eereegwaarak.

¹⁰Togop aret eereegwaarak me, at Aliku ALA anini kani kunik negen ninoba pinanege yi, tayo yuwak nduk, at Iterali inogoba Aliku Ala ninom wone abuk nggaruk togon koonogo puurak mbakirak me,

¹¹napuri yi, wae. Kit nen at enggaanom lombok ari wa'nuk ake eekwi, aakumi nen Ala alut eeruwak nduk, eekwi iigak inarum wonogwe, obari abe kaga nogo ake kani kunggwi, eeko logomunggup nduk, at Aliku ALA nen leenogo pinagareegerak me, eeko logorak ti, Nineebi o, yinuk, mbo puurak mage o,” yinuk, yoragagerak.

¹²Yorage mbareegi, it Lewi mendek nen, “Eeruwok o,” yinuk, eereegwaarak nogo ti, Aap Kekat paga wiganak ti, Amatayi aput Makat inom, Atariya aput Yowen inom, Aap Merari paga wiganak ti, Abiri aput Kiti inom, Yekaleleyen aput Atariya inom, Aap Nggeroton paga wiganak ti, Tima aput Yowa inom, Yowa aput Eren inom,

¹³It aap Elatapan paga wiganak ti, Timiri Yeyiyen imbirak inom, It aap Atap paga wiganak ti, Takariya Mataniya imbirak inom,

¹⁴It aap Keman paga wiganak ti, Yekiyen Timeyi imbirak inom, It aap Yerutun paga wiganak ti, Temaya Utiyen imbirak inom, nogo ti aret.

¹⁵It nen inoreewi Lewi mendek ando kuwak eeppiigo nogogwaarik, inoba mbeenogo patinuk, Aliku ALA wone yugu at aap endagembogut nen lengganogo yoragagerak ndak-ndak, Aliku ALA awi wurik maluk lenggennagagerak nogo obeelom eerogo puwok nduk, unggwi nogo nogogwaarik, obeelom eerogo pit nogwe iigak,

¹⁶it Ala unde nen Aliku ALA awi wurik mage menggim obeelom eerogo puwok nduk, unggwi nanuk, yi mendek ndi mendek maluk oba lenggennagagerak wonage kenok, abok aret kabe'nuk, Aliku ALA awi wurik oore'nggam time pi wundi wogo mbareegwa, it Lewi mendek nen woppunuk, niyo Kiriron kobappaga time pi nogogwaarak.

¹⁷Ala awi wurik maluk lenggennagagerak nogo obeelom eerogo pereegwaarak. Obeelom eerogo pereegwaarak nogo ti, tut aa'nduk penenak tanggal 1 paga wareneegwaarak me, endekem nen obeelom eerogo pit Aliku ALA awi wurik endekenggwe wone mbanggo menggam kuli pi unggwogwe iigak, ne 8 age, ti'nuk, Aliku ALA awi wurik eebe lombok obeelom eerogo pit age yubunggwi iigak, ne 8 age, eereegerak me, obeelom eerogo pugwi iigak lambuk togon ne 16 agagerak.

¹⁸Ala awi wurik obeelom eerogo punuk, aap endagembogut Kitikiya ka unggwogo nogogwaarik, at yogo logonet, “Aliku ALA awi wurik abok inom, at ake warogo kani kunggo menggam inom, kani kunggo logonet eeko menggaarak yi mendek ndi mendek inom, eebe wonage mbaruwak nduk oroti pogo menggaarak eyo ndoonak inom, ti paga eeko menggaarak yi mendek ndi mendek inom, abok aret obeelom eerogo Ala ake leenogo pugwi,

¹⁹ndi, aap endagembogut Akat nogo endagembogut a'nuk wone lengganogo yorage logonet, Ala liirogon mugurok nage logolik, mbo punuk, yi mendek ndi mendek Aliku ALA awi wurik me nen waganogo wumbereegerak nogo obaane'me ogobakkigirogo Ala ake leenogo punuk, Aliku ALA ake warogo kani kunggo menggam taati pugwi, eekoorak o,” yinuk, yoreegwaarak.

²⁰Yogo mbareegwa, ko'lu kuubondendok at endagembogut Kitikiya nen it o kota wonogwe inoweewi kuwak eeppiinok, it abok aret Aliku ALA awi wurik me nogo logonet,

²¹tapi ngguunok 7 wogonakwi, ndomba ngguunok 7 wogonakwi, ndomba ngguunok awooluk 7 wogonakwi, ndi, Ala awi wurik o magame maluk lenggennagagerak obeelom eerogo puurak ake inom, ndi, it aakumi at abu'me piinok menggerak kunduk, it Yekura kunduk, inomaluk lek eerogo piyoorak inake inom, Ala ake warogo wogogo logorak kambin ngguunok 7 wogonakwi, ee'nuk, nogo nogogwaarik, at endagembogut nogo nen it Karun paga wiganak Ala unde nogo yorage logonet, “Aliku ALA ake warogo wogogo menggam paga ninake warogo wogogo logonip o.”

²²Yoragagerak tapi ngguunok nogo inoorogo piigo mbareegwa, it aap Ala unde nen amiya waganogo Ala ake warogo wogogak paga werenogo pugwi, ti'nuk, ndomba ngguunok nogo inoorogo piinok, amiya waganogo Ala ake warogo wogogak paga werenogo pugwi, ti'nuk, ndomba awooluk nogo inoorogo piinok, amiya nogo waganogo Ala ake warogo wogogak paga werenogo pugwi, eeko nogogwaarik,

²³inomaluk lek eerogo piyoorak ake kambin nogo, aap endagembogut inom, it kuwak aago wonogwe inom, inowagam piya woraanuk, kambin inoba ineenggi tebembiirogo iigak,

²⁴aap endagembogut nen it Iterali abok inake warogo kani kunggwi, ndi, inomaluk lek eerogo piyoorak inake warogo Ala wogogwi, eeruwak nduk yoragagerak me, it Iterali abok aret inomaluk lek eerogo punuk, Ala inom lambunik logowak nduk, it Ala unde nen nggami aanggo negen kambin nogo inoorogo piinok, amiya nogo waganogo Ala ake warogo wogogak paga kilirogo pereegwaarak.

²⁵Kilirogo pogo mbareegwa, “Ndogop eeko logowak o,” yinuk, at Aliku ALA nen aap abinggaanggo paga yoge kenok endagembogut yoga Nggat nogo inom, Ala nen yoge kagak yoraga Natan inom, at nen yorage kagak, Ndawut yogo mbareegwa, at Ndawut nen koonogo pereegerak ndak-ndak aap endagembogut nogo nen aap Lewi mendek togolowak tobak oone pu ndale eekak inom, nggitat mbuuluk mendek inom, nggwok mendek inom, ko'nok Aliku ALA awi wurik me li'luk aago logowak nduk nappiyareegerak

²⁶nogo nogogwaarik, oone pu ndale eekak inom, nggitat mbuuluk inom, nggwok inom, ti paga ndawi wako logorak Ndawut nen koonogo pereegerak nogo li'luk eeppunuk wonogwe, ndi, it Ala unde nen oone nggwok eeka trompet nogo, li'luk eeppunuk wonogwe, eekwi iigak,

²⁷aap Kitikiya nen, “Ala ake warak nogo kani kunggo menggam kani kunggo logonip o,” yoragagerak. Yoragagerak kunggo mbareegwa, at Aliku ALA tiyappogo logonet ndawi wakwi, oone nggwok eeka trompet nogo oone pu eekwi, it Iterali inowe endagembogut Ndawut nen ti mendek paga oone eeko logorak yoragagerak nogo oone eekwi, eereegwaarak.

²⁸It ndawi wakwi, oone nggwok eeka trompet nogo oone pu eekwi, aakumi kuwak aago abok aret inendobanggun yindumbunuk, Aliku ALA ayuk wukwi, eekwi iigak, ake kani kuneegwaarak nogo kani yubuk togon nenggegerak.

²⁹Ake warogo kani kuneegwaarak nogo kani yubuk togon nengge mbareegi, aap endagembogut inom, aakumi inom wonogogwaarak abok aret inom, inendobanggun yindumbunuk, Ala ayuk wureegwaarak.

³⁰Ayuk wuko nogogwaarik, aap endagembogut Kitikiya inom, at inom eeko menggaarak inom, nen it Lewi mendek yorogo logonet, “At Ndawut inom, abinggaanggo kaga Atap inom, nen ndawi pereegwaarak nogo paga Aliku ALA alut eeko logonip o,” yorogogwaarak ndawi wakwi iigak, it abok aret inale'nggen nen Ala endage tiyappugwi, inendobanggun yindumbunuk, ayuk wukwi, eereegwaarak.

³¹Eeko nogogwaarik, at Kitikiya nen yorage logonet, “Kit muk Aliku ALA ake leenogo pakotak me, o yogondak ake warogo wogoriyak inom, Wa, yogo logonet, wogoriyak inom, wonok Aliku ALA awi wurik me pi woraanip o.” Yorage mbareegi, it kuwak aago nogo nen ake warogo wogoriyak inom, Wa, yogo logonet wogoriyak nogo inom, wonok wogo logonet, it ando iniki nen ake warogo kani kuniyak nogo mendek inom wonok wogogwaarak.

³²It kuwak aago nogo nen warogo kani kuniyak mendek wonok wogogwaarak lambunik ti, tapi ngguunok 70. Ndomba ngguunok 100. Ndi, ndomba ngguunok awooluk ineebe dua ratus aret. Ti nogo abok aret Aliku ALA ake warogo kani kunuwok nduk, wogoren wogogwaarak.

³³Ndi, warogo wogoriyak nggomoorak wogoren wogogwaarak nogo ti, tapi ngguunok enam ratus. Ndi, kambin-ndomba tiga ribu aret.

³⁴It aap Ala unde inom, Lewi mendek inom, inoba mbeenogo pateegwaarak nogo ti, it Lewi mendek nen, “Nit aret eeriyak me, eeruwok o,” yinuk, ineebe ambik aret inoba mbeenogo pakwi iigak, it Ala unde perak, togop mbarulik ineebe mbereeret mban inoba mbeenogo pateegwaarak me, Ala ake warogo kani kuniyak wogoren wogogwaarak nogo ti, ambik aret. Ndi, Ala unde inalik nen tapi inom, kambin-ndomba inom, inagabolo mbelaniyak meek kenok, ineebe ando nggwok inoba mbeenogo pakwi nogo tooriigo logonet, inoreewi Lewi mendek nen yeenggwaarogwe iigak, kambin-ndomba nogo inagabolo yubuk togon mbelanogo pereegwaarak.

³⁵Ala ake warogo kani kuniyak inom, Ala inom lambunik logorak ake warak amok inom, ndi, Ala ake warogo kani kunggo logonet ake amburu kilirogo pit noorak inom, ambik aret wonagagerak. Ti eerit wogogwaarak paga Aliku ALA awi wurik me eeko nogogwaarak nogo, eeko logowok nduk, warenogo pereegwaarak.

³⁶Ndi, eerit wogogwaarak nogo Ala nen aakumi at apuri yeenggwaarage kagak mbet-mbet aret eereegwaarak me, at Kitikiya inom, aakumi abok aret inom, inale'nggen mbareegwaarak.