Read Western Dani 2 Mbinineegwaarak 4 Bible Online

2 Mbinineegwaarak 4 - Western Dani bible

2 Mbinineegwaarak 4

¹ Ti'nuk, at nen Ala ake warogo kani kunggak mbuti tembaga paga ogobakkigike logonet, irip aru-ogwe nggorek ti, metet 9 paga wakkage, ambe agi-ogu ti, metet 9 mban kuli wakkage, agi nggorek ti, metet 4 eeppunuk, ambi oolo wakkage, eereegerak.

²Eeke nagagerik, togolowak endage, Niyo Yenggenak, mbuti tembaga paga ogobakkigike logonet, eebe kole yimun-namun aago ambe yibagan-enebagan metet 4 eeppunuk, ambi oolo wakkagak eerogo pege, irip agi tiyanak nogo metet mbere eeppunuk, ambi oolo wakkagak eerogo pege, ndi, keele yendok-wandok metet 13 eeppunuk, ambi oolo wakkagak eerogo pit nage, eeke nagagerik,

³togolowak ambe abu'me lembu ogut negen ne mbere yendok-wandok eerogo pit nage logonet, metet oolo ari nage kenok, lembu 10 ogut negen eerogo pege, metet oolo ari nage kenok, lembu 10 ogut negen eerogo pege, eerit yendok-wandok eerogo pereegerak. Togolowak ti ogobakkigike logonet, lembu ogut negen ne mbere yendok-wandok eerogo pugu ti, inom kunik aret ogobakkigirik wonagagerak.

⁴Eerogo pit nage nagagerik, lembu ogut 12 eerogo punuk, inakom ambit me akem mban eerogo piinok, kenagan ti, ina o omarip paga pa'nggwe nappiige, kenagan nogo ti, ina oonegen kilu yi nage menggim pa'nggwe nappiige, kenagan nogo ti, ina o ame pa'nggwe nappiige, ndi, kenagan nogo ti, ina oonegen wundi wage menggim pa'nggwe nappiige, eerogo piige nagagerik, togolowak kole endage, Niyo Yenggenak, nogo, waganogo lembu ogut eerak nogo inali'luk paga kwippereegerak.

⁵Togolowak obogum kumbin pereegerak nogo ti, aakumi ineenggi tabak kwak aret o. Ndi, ambe ti, mangkok ambe waambi anggen awo ambe pagangge menggi kwak aret me, togolowak nogome tooliyak kenok ti, nderom tiga ratus tiga puluh me, tooliyak pogom aret wonagagerak.

⁶ Ti eeke nagagerik, Ala ake warogo kani kunggo logonet, eekak yi mendek ndi mendek kookak yuwak nduk, togolowak tenggap kwak 10 kuli ogobakkigirogo pege nagagerik, 5 waganogo Ala awi wurik me o ame pa'nggwe pege, ndi, 5 nogo o omarip paga pa'nggwe pege, eereegerak kwe, togolowak kole endage, Niyo Yenggenak, ogobakkigireegerak nogo ti, it aap Ala unde ineebe paga kookak ake aret wonagagerak.

⁷ Ti eeke nagagerik, “Ndi wuninogo pegak eraambe yogop ogobakkigiriyak o,” yinuk, wone yugu ndak-ndak mbuti emas paga 10 ogobakkigirogo punuk, 5 waganogo Ala awi wurik o ame pa'nggwe pege, ndi, 5 nogo o omarip paga pa'nggwe pege, eerogo pereegerak.

⁸ Eerogo pege nagagerik, eyo tabak 10 ndoonogo punuk, 5 waganogo Ala awi wurik o ame pa'nggwe pege, ndi, 5 nogo o omarip paga pa'nggwe pege, eeke nagagerik, mbuti emas paga niyo kilirogo pit nagak togolowak mbuulogwe 100 inom ogobakkigirogo pereegerak.

⁹Aap Ala unde logorak oore'nggam kigirogo pege, Ala awi wurik oore'nggam tini nggwok lombok nonggologo pege, oore'nggam time unggwogo logorak tungga mbanogo punuk, mbuti tembaga paga nabenogo pege, eereegerak.

¹⁰Eerogo pege nagagerik, togolowak kole endage, Niyo Yenggenak, ogobakkigireegerak nogo, waganogo Ala awi wurik oore'nggam irip me oonegen lagi wage menggim agigan kagak, o ame pa'nggwe ogugan kagak, oolo taati aret pereegerak.

¹¹Ndi, at nen togolowak tenggap kwak inom, nggween tege inom, togolowak niyo kilirogo pit nagak inom, ogobakkigirogo pereegerak. Aap Kuram nen Ala awi wurik me logorak yi mendek ndi mendek eeriyak aap endagembogut Talomo nen yoreegerak nogo wobok togon eerogo pereegerak nogo yi aret.

¹²Eyak yo'nggok mbere mippereegerak inom, eyak mbere irip kwippuurak mangkok ambe paganak kwak ogobakkigireegerak inom, eyak irip kwippugu mangkok ambe paganak kwak nogo paga etenggen abe kaawak nduk, yum yugu tugunik negen ayo waganeegerak inom,

¹³yum yugu tugunik ayo wogo eyak mbere irip mangkok negen eerogo kwippugu nogo paga etenggen abe kaawak nduk, eyo delima anggen empat ratus paga ne mbere yendok-wandok eerogo pit nagagerak inom,

¹⁴niyo toolak wonok negak togolowak tenggap kwak eengge ndak-ndak ogobakkigireegerak inom,

¹⁵lembu 12 inali'luk paga togolowak kole endage, Niyo Yenggenak, kwippereegerak inom,

¹⁶togolowak tenggap kwak eege, nggween tege eege, enggaanggum pelaakak paando eege, ogobakkigireegerak inom, yi mendek ndi mendek Aliku ALA awi wurik me logorak at Kuram-Abi nen eeruwak nduk, aap endagembogut Talomo nen yoge mbareegi, mbuti tembaga paga mban ogobakkigirogo pit nagagerak nogo ti aret.

¹⁷Aap endagembogut Talomo nen yi mendek ndi mendek, “Eeru,” yoreegerak nogo ti, o Tukot inom, Taratan inom, aru-ogwe nakkagak niyo Yoraran kobappaga time nen nggween nggabok paga yi mendek ndi mendek ogobakkigireegerak nogo, wakkagak eerogo punuk, mbuti tembaga paga amburu eerak nogo, wakkagak eerak me time kilirogo punuk, ogobakkigireegerak.

¹⁸Yi mendek ndi mendek at Talomo nen, “Eeru,” yoge mbareegi, mbuti tembaga paga eereegerak nogo ti, ambik mbuti tembaga aaninggin wakkoorak meek aret me, at Talomo nen aaninggin wakkoolik mbo aret pereegerak o.

¹⁹Yi mendek ndi mendek abok aret Ala awi wurik me logorak at Talomo nen kunduk ogobakkigireegerak nogo ti, mbuti emas paga Ala ake warogo wogogo logowam inom, Ala wonage mbaruwak nduk, oroti worarogo pegak eyo ndoonak inom,

²⁰“Ndi wuninogo punuk, o ko ogoorak Ala inom lambunggak akem manggagak endekem nggwe pinip o,” yoreegerak wone yugu ndak-ndak, mbuti emas at mendek paga ndi wuninogo pegak alom anobak 7 kunik ogobakkigirik inom,

²¹mbuti emas paga iri'ngga anggen yege menggi kwak eerak eege, ndi wunanggak eege, paando eege, ogobakkigirik inom,

²²mbuti emas at mendek paga ndi abo mbanggak waruk eege, niyo kilirogo pit nagak togolowak eege, niyo kombet waka eege, kaninggen ndoongga eege, ogobakkigirogo pereegerak inom, ndi, mbuti emas paga Ala awi wurik unggwogo logorak o ko akem Mage Lombok Menggim tungga inom, endekem nggwe ko nggwok tungga inom, ogobakkigirogo pereegerak inom, nogo ti aret.