Read Western Dani 2 Mbinineegwaarak 6 Bible Online

2 Mbinineegwaarak 6 - Western Dani bible

2 Mbinineegwaarak 6

¹Togop aret age mbareegi, at Talomo nen Aliku ALA yoge logonet, “Kaliku ALA nen, An o ndugwi yumaak aago enggela'me wonage minggirak o, yinuk, yereegindak me,

²kat kawi wurik me mondok-mondok logonok nduk, kake kawi abu abe alik negen aret wurogo pagagirak yi ket o,” yinuk, yoreegerak.

³Yoge nagagerik, it aakumi Iterali wonogwe abok aret awo mi'ndak wonogwe me, at endagembogut Talomo nen ena mela yinuk, ale'nggen inoba piige logonet,

⁴ “At Aliku aakumi Iterali inogoba Ala oone lombok paga nen nogoba Ndawut koonogo yoreegerak nogo, at nen aret a'me nggelok togon eerogo pereegerak me, endage tiyappuwok o. At Aliku ALA nen ari logonet,

⁵O aa'nduk an napuri o Metit nen wogoren wundi wagagirak kuli nen aakumi Iterali inanebunu lombok abok aret inenggela'me o kota an nendage ki logorak nawi wuriyak ambi leenogo pege, endagembogut logonet, napuri Iterali inarum logowak nduk, aap ambi leenogo mippege, eerulik kwe,

⁶yogondak perak, nendage ki logowam kota Yerutalem aret leenogo pege, ndi, napuri Iterali inarum logowak nduk, at Ndawut aret leenogo mippege, eereegirak o, yinuk, yereegerak nogo o.

⁷Nogoba Ndawut nen Aliku Iterali inogoba Ala endage ki logorak awi wuriyak iniki kooneegerak kwe,

⁸Aliku ALA nen nogoba Ndawut yoge logonet, An nendage ki logorak nawi wuriyak kiniki koonggendak nogo ti, abu op aret koonggendak kwe,

⁹kat nen wurumunggun lek o. Ata, nendage ki logorak nawi wuriyak nogo ti, kat lombok kaput ndaremenggendak nen aret wurigin o, yinuk, yoreegerak o.

¹⁰At Aliku ALA nen wone koonogo yoreegerak nogo, a'me nggelok ari logonet, at Aliku ALA yoreegerak ndak-ndak, an nogoba Ndawut obaane'me age nagarik, it Iterali nabu'me piinok, inawone koongge minggirak me, Aliku aakumi Iterali inogoba Ala endage ki logowak nduk an nen aret at awi wukirak yi o.

¹¹Wuke nagagirik, Aliku ALA nen it Iterali inom wone koonogo pereegerak aloobut mbanak me yonggolak wonage nogo, at awi wukim nogome mambigi o,” yinuk, yoragagerak.

¹²Yorage nagagerik, at Talomo nogo Aliku ALA ake warogo wogogo logowam ogobakkigirik me, enaame taa'nogo mi'nari nage nagagerik, aakumi Iterali wonogwe abok aret inenggaanom paga eenggi nippereegerak.

¹³At Talomo nogo nen mbuti tembaga paga eyo irip nggorek metet mbere eeppunuk, ambi oolo wakkagak ndoongge, ambe wiganak ti, ndak-ndak metet mbere eeppunuk, ambi oolo wakkagak ndoongge, ndi, irip agi tiyarogon metet ambiret eeppunuk, ambi oolo wakkagak ndoongge, eereegerak nogo, Ala awi wurik oore'nggam oolo pereegim nogome punuk, eyo ti paga lagangge nagagerik, Iterali wonogwe abok aret inenggaanom paga endobanggun yindumbunuk, eenggi mbogut paga nippege nagagerik,

¹⁴Aliku ALA yoge logonet, “Kaliku Iterali inogoba Ala wae. Mbogut paga inom, nggween paga yime inom, kat Ala kwak ambi wonage abu lek aret o. It kayeloman mini nen iniki inom, ineebe inom, mondok nggaruk togon kat paga panggombunuk, kenggaanom paga liirogon eerit nogo menggaarak nogo, kiniki kunik aganake logonet, kinom wone koonogo pereegindak nogo mbeyok yukwak, a'me nggelok eeke menggendak me, wa!

¹⁵Kat kayeloman nogoba Ndawut koonogo yoreegindak nogo, a'me nggelok eeke, ndi, koone paga lombok koonogo yoreegindak nogo, kat nen aret eerogo pege, eekendak nogo ti, o yogondak yi aret aga o.

¹⁶ Togop aret me, Kaliku aakumi Iterali inogoba Ala wae. Kat kayeloman an nogoba Ndawut yoge logonet, Kat an nenggaanom kiniki koonak obeelom mban eeke menggendak kwak, kapuri ndaganabemenggendak nen eeko logorak wone an yoragagirak nogo, ndak-ndak liirogon mban eekwi iinok, an nenggaanom paga aakumi Iterali inarum logonet, wone lengganogo yorage logorak nogo ti, kat kapuri mban aret inendagembogut logonet, eeko logogun o, yinuk, wone koonogo yoreegindak nogo, a'me nggelok yuwak nduk, liirogon aret eeke logomunggun o.

¹⁷Togop aret me, Kaliku aakumi Iterali inogoba Ala wae. Kayeloman nogoba Ndawut wone koonogo yoreegindak nogo, o yogondak aret kin aruwak nduk, eerit nage logot o.

¹⁸ Togop aret kwe, kat Ala o nggween paga yime aakumi ninom logorak op mbaken? O mbogut paga inom, mbogut irimbaga kunduk inom, abok aret ti nggwok aret wonage kwe, kat logorak endak lek me, kat logorak kawi wurogo pagagirak yi ti, abunuk mbuuluk aret o.

¹⁹Togop aret kwe, Kaliku nogoba Ala wae. An kayeloman nen nggino yokkege logonet, tamban eeke yi, kena koonogo pe'neege, o yogondak kenggaanom paga an kayeloman nabuwa nggo-nggo logonet yokkege yi, karuk konengge, eeru o.

²⁰ Kat nen ari logonet, Time nen nendage ki logowam, yereeginom wurik yi, o liingge-oonikiya kenegen wagangge logot o. Kenegen wagangge wonage me, an kayeloman nena o wurik me yime na'nari wa'nuk tamban eeke neenok, karuk konengge logomunggun o.

²¹An kayeloman nggino yokkege, ndi, kapuri aakumi Iterali ina o wurik me yime na'nari wa'nuk tamban eekwi, eekwi niinok, kat menggenom mbogut paga wonage logonet, karuk konenu o. Ndi, konengge logomenggendik, ninomaluk lek eerogo pinanumunggun o.

²²Ndi, aap ambi nen oreeluk ambi maluk eeppege kenok, An maluk eeppuulik o, yinuk, kat kawi wurik me kake warogo wokkegak ogobakkigirik enaame taati nen wone kumbuk mbani woraawak nduk, yoruwak o.

²³Ndi, kumbuk mbani wage kenok, kat mbogut paga wonage logonet, karuk konembunuk, it kat kayeloman mini inowak looninake logonet, at ambi maluk abet aret eeke kenok, at eeremenggerak onggo ndak-ndak oba kwippege, ndi, at ambi maluk eerulik kin kaawak nduk, Kat maluk eerulik o, yinuk, yoge, eerumunggun o.

²⁴It kapuri Iterali mendek nen kat maluk eeppagamenggaarak paga inawim nen tebenogo piya unggwogwe iinok, it iniki yungguk togon kat kawi wurik me yime unggwi woraanuk, Kendage maluk eerogo pagago o, yinuk, inomaluk paganggwi, tamban eekwi, nggino yokkugwi, eekwi iinok,

²⁵kat mbogut paga wonage logonet, inoone karuk konembunuk, kapuri Iterali inomaluk lek eerogo piinok, it inombomini inom, inapuri yi inom, it logowam inanggween wogoragaginom nogome iniyokan piya woraamunggun o.

²⁶Ndi, kat kapuri aakumi Iterali yi, maluk eeppagamenggaarak paga aaninggin inoba piige logonet, o mayu wage kero, mbogut narogo pege keenok, o wurik me yime ina na'nari wa'nuk, Kendage maluk eerogo pagago o, yinuk, inomaluk paganogo mbo pugwi iinok,

²⁷kat mbogut paga logonet, inoone karuk konembunuk, kayeloman mini aakumi Iterali inomaluk nogo lek eerogo piige, it abe mban eerit nogo logowak nduk yorage, eeke logomenggendik, kapuri Iterali yate kwak inanggween wogoragaginom nogome mayu wuppi woraamunggun o.

²⁸Ndi, o yime mbi noogelo inom, kugi mburuk inom, yi mendek ndi mendek yarak engga paga kane'nep eerogo pega inom, mbi engga paga wun kunogo pit naga inom, wurin inom, yibila inom, o nggween yi, maluk eerogo pege kenok ilik, inawi kota ambi inawim nen tebenggolaawok nduk, wim eeri unggwogwe, aaninggin-paaninggin inoba age, yi andi ndi andi inoba kwi'nage, eeginake kenok a,

²⁹aap ambit-ambi nen ilik, it kat kapuri Iterali yi abok aret nen a, it inalitak lombok maluk eeremenggaarak nogo paga iniki andi negen logonet, ineenggi kawi wurik me yime pa'nggwe nappi woraanuk, tamban eekwi, nggino yokkugwi, eekwi iinok,

³⁰yi aakumi ndi aakumi abok aret iniki keenu me, kat wonage menggenom mbogut paga nen inoone karuk konembunuk, o it ninombomini logowam wogoragaginom nogome wonogo logonet, kat paga inagabiti kombako logowak nduk, it inalitak lombok iniki keenu me, maluk eeremenggaarak ti, mugurok inowak loongge, inomaluk lek eerogo piige, eeke logomunggun o.

³¹

³²Kat kendage abu tiyanak lombok inom, keenggi omaawi lombok paga yi eekak ndi eekak eeke menggendak nogo inom, ambi eeriyak nduk, keenggi titik eeke inom, eeke yogwe nogo, kat kapuri Iterali mendek lek aap nggiru ambi awi o nda nen kat Ala kabok yogwe ti, aruk konembunuk, wage logomenggerik, kawi wurik me yime ena na'nari wa'nuk, tamban eeke kenok,

³³kat wonage menggenom mbogut paga wonage logonet, oone karuk konembunuk, yokkege nogo aret eeppege logomunggun o. Togop aret eeppege keenok, it kapuri aakumi Iterali nen kendage tiyanak kenok, kayuk wukwi nogo ineenu ogwe, ndi, an o wukirak yi, Ala awi wurik aret o, yinuk, ineenu ogwe, eekwi nogo ndak-ndak, yi aakumi ndi aakumi o nggween paga wonogwe yi abok aret ineenu ogo logogun o.

³⁴Ndi, kat kapuri aakumi Iterali yi, inom wim mbanak inom namburuwok nduk, wundi nogwe iinok, Ena ndime nanip o, yinuk, nappiyamenggendak nogo logomenggaarik, o kota leenogo pereeginom kat kendage ki logorak kawi wukim yime ina na'nari wa'nuk, Kaliku ALA yokkugwi iinok,

³⁵kat mbogut paga wonage logonet, it tamban eekwi, nggino yokkugwi, eekwi nogo, inoone karuk konembunuk, Eeppinanuwak lak, ao, mbakwi nogo aret eeppiige logomunggun o.

³⁶Aakumi maluk eekulik ambi wonogwe lek abok maluk eeka mban aret me, it kapuri maluk eeppagagwi nogo, kanini inoba piige logonet, ineebe waganogo inawim ineenggime piige keenok, keele maageren iname lombok o ndaanda ilik, koorok a, time aret piya namenggaarak

³⁷keele maarak time wonogo logonet, Nit abu maluk lombok eekoorak o, mba'nuk, iniki yungguk togon inomaluk mbo punuk, o keele maarogo piya namenggam nogome nen kat yokkogo logonet, Ninogoba o. Nit maluk lombok eekwi, ninobaabut maluk lombok logonet, ninggin-nanggin eekwi, eekoorak o, yinuk,

³⁸it inawim nen keele maageren piya namenggam time nen iniki inom, ineebe inom, abok aret yungguk togon kat mukkeren wogo logonet, o nggween inombomini wogoragaginom kota leenogo pereeginom kendage ki logowam kawi wukim yime ina na'nari woraanuk, tamban eekwi iinok,

³⁹kat wonage menggenom mbogut paga nen it tamban eeko logonet, nggino yokkugwi nogo inoone karuk konembunuk, Eeppinanuwak lak, ao, mbakwi nogo ndak-ndak aret eeppiige logomunggun o.

⁴⁰Togop aret me, nogoba Ala wae. Nit o yime logonet, tamban eekwi niinok, kenegen pe'niige, karuk liirogon konengge, eeke logot o.

⁴¹ Kaliku Ala wae. O yogondak yi paga aret mi'nage logomenggendik, O kat yonggonggolage logowam komaawi wonage kogo menggam kaloobut mbanak wonage me, Yime mondok-mondok logonok nduk, wambi mok o. Kaliku Ala wae. It aap kat keebe unde nogo inayum li'luk yikkologo mengga kwak, it aakumi inagap ndarak logowak nduk, li'luk eerogo piigwi, Kat nen kapuri kake leenak obeelom eeppiige paga inale'nggen nen keekok yogwe, Eeko logowak o,

⁴²Ndi, Kaliku Ala wae. Kat nen aap leenogo punuk, amburu eerogo mippereegindak nogo, mbo puurak mage o. Ata, kayeloman Ndawut abuwa mba'nuk, obeelom eeppuurak koonogo yoreegindak nogo aberu o,” yinuk, tamban eereegerak.