Read Western Dani 2 Mbinineegwaarak 9 Bible Online

2 Mbinineegwaarak 9 - Western Dani bible

2 Mbinineegwaarak 9

¹ At Talomo nen eerit nage paga endage wiganinuk nage nogo, kwe nggwok o Tiyeba mendek aruk konengge nagagerik, “At Talomo eeke yogwe ti, nonggop ari kaamun? Abut mbani na,” mbake nagagerik, aap apit aago inom o Yerutalem wogo logonet, yi mendek ndi mendek ombat abe eeka inom, mbuti emas ambik inom, yugum onggo nggwok mendek inom, apit aret unta amborowak paga nippunuk wonok, aap Talomo wonage me ka wogo nogogwaarik, yi wone ndi wone, “Nonggop togon eeke,” mbake nogo abok aret at Talomo kin wakkagagerak.

²Kin wakkage mbareegi, at Talomo nen kwe wone yoreegerak nogo, ambi yoriyak meek kenok teppuulik abok li'lak aret yoreegerak.

³At kwe nggwok Tiyeba mendek nogo nen at Talomo iniki warak lombok nen wone yoge, ndi, at awi o nggwok abe wuppunuk wonage,

⁴nunggwi mendek ageyo ndoonak paga koonogo pege, at inom yabu eeko menggaarak ina koonogo kwippiige, ayeloman mini inayum nggorek abe yirik logonet, ake eeko logowak nduk koonogo piige, niyo toologo iri woraawak nduk yorage, Aliku ALA awi wurik me ake warogo kani kungge, eeke nogo kage nagagerik, oone mondok lek aret agagerak.

⁵Oone abu lek age nagagerik, at endagembogut nogo yoge, “Yi mendek ndi mendek eerit nage menggendak inom, kiniki warak lombok logonet ari menggendak inom, yo'nugwi name logonet naruk konengge nagarak nogo ti, mondok abet aret kagi o.

⁶Name logonet, aakumi nen yo'nugwi nogo ti, Abet aret yaga, mbarulik kwe, an neebe nduk aret wage nagarik perak, kiniki warak logonet eeke nogo nenegen abe nen kage nagarik, Mondok iya alik negen wonage kagak, name wonage me yo'negaarak nogo ti, ando mbuuluk mban yo'negaarak kagi, yinuk, yogondak abet aret mbake agarik o.

⁷Togop aret me, it kaaganapuri inom, it kawuri kake yabu inaruk konok eeko menggaarak inom, kat kiniki warak nen yorage konenggwi nogo inale'nggen alik negen wonogwe iigi o.

⁸At Aliku kogoba Ala nen inikilom kombake logonet, aakumi Iterali inowe kendagembogut logonet, at Aliku kogoba Ala wone lengganogo yorage logorak kwak yorage logonok nduk, mippagareegerak me, Aliku kogoba Ala endage tiyappogo logowok o. At Aliku kogoba Ala nen it Iterali mondok-mondok iniki kunik eeginake, ndi, at abu'me piinok menggim mondok-mondok logorak mbake, eeke menggerak me, it abe mban koonggwi, li'lak mban eekwi, eekwi iigak, inarum logonok nduk, kendagembogut mippagareegerak o,” yinuk, yoreegerak.

⁹Yoge nagagerik, mbuti emas aaninggin empat ribu inom, yi mendek ndi mendek ombat abe eeka apit aret inom, yugum abinak ambik onggo nggwok mendek inom, aap endagembogut nogo wogoreegerak. At kwe nggwok Tiyeba mendek nen yi mendek ndi mendek ombat abe eeka at endagembogut Talomo wogori wagagerak nogo ti, ambik mondok iya lombok wogori wagagerak me, peebi aap ambi nen at togop wogori woroolik aret o.

¹⁰Ndi, aap Kiram apuri inom, at Talomo apuri inom, nen o Opit nen mbuti emas wonok wogo logonet, eyo ndiindi ambik lombok inom, yugum onggo nggwok nogo mendek inom, wonok at Talomo wogori wogo nogogwaarak.

¹¹Eyo ndiindi nogo paga aap endagembogut Talomo nen Aliku ALA awi wureegerak nogo inom, at endagembogut awi o nggwok abe wureegerak nogo inom, nda'nggi pit nage, ndi, it ndawi yaga nen eeko logorak nggitat mbuuluk mendek inom, nggwok mendek inom, inake ogobakkigike, eereegerak. Eyo ndiindi wonok Talomo wogori wogo nogogwaarak nogo ti, ambik mondok iya lombok wogori wogo nogogwaarak me, ambik togoti o Yekura paga inigen kaga'lek aret wonogogwaarak.

¹²At kwe nggwok Tiyeba mendek nen at endagembogut Talomo iri wagagerak ti, nggwok aret kwe, mbuuluk negen iri wagagerak. At Talomo nogo nen perak, kwe nggwok Tiyeba mendek uugwe mba'nuk, nggino yoreegerak nogo abok nggwok aret wogoge mbareegi, wonok awuri nogo inom aret iname nogogwaarak.

¹³Tahun ambi eekak paga mbuti emas at Talomo wogori wogo nogogwaarak ti, aaninggin dua puluh tiga ribu aret age nagagerak.

¹⁴Ndi, it aap yi mendek ndi mendek toko kunggo menggaarak nen pugwi inom, inamendek onggo-onggo kunit nugwi nogo nen pugwi inom, ndi, mbuti emas eege, mbuti perak eege, it aap inendagembogut o Arap mendek abok nen wogori wogwe inom, it aap o unde menggaarak inoweewi nen wogori wogwe inom, ti inom lambunik linggingga'lek aret wonagagerak.

¹⁵At aap endagembogut Talomo nen mbuti emas aan libik-lebek eerogo nggeemu yele-kole dua ratus ogobakkigike logonet, ambiret ti, mbuti emas aaninggin kenagan wakkaanuk, ambi oolo wakkagak ogobakkigike,

¹⁶ndi, mbuti emas aan libik-lebek eerogo nggeemu mbuulogwe tiga ratus ogobakkigike logonet, ambiret ti, mbuti emas aaninggin mbere negen wakkagak ogobakkigirogo pege, eeke nagagerik, wonok o nggwok wurik endage, O Libanon Eyonggaame o, yinuk, tooneegim nogome pi unggwagagerak.

¹⁷Ti eeke nagagerik, at endagembogut Talomo nen kwi'ndak logonet, wone lengganogo yorage logorak kole ambi gajah eyak paga ogobakkigike nagagerik, mbuti emas at mendek paga nabenogo pit nage,

¹⁸kwi'nari lagangge logonet, iyok pit laganggak 6 kuli pege, iyok ngginogo nappegak mbuti emas paga eerogo pege, peenok-peenok eenggi lumbegak eerogo punuk, singa ogut mi'ndak eraanu peenok-peenok eerogo mippege,

¹⁹ndi, iyok pit laganggak 6 nappugu nogo, irip aru-ogwe singa ogut 12 eerogo pit lagangge, eereegerak. At Talomo ti eereegerak nogo aap inendagembogut inabu'me piigo menggam togop ambi wonageelik mendek aret eereegerak.

²⁰At endagembogut Talomo aniyo nenggak aniyoowak nogo ti, mbuti emas paga ogobakkigike, ndi, o nggwok wurik endage, O Libanon Eyonggaame o, yinuk, tooneegim yi mendek ndi mendek wonagagerak nogo ti, mbuti emas ti mendek paga mban ogobakkigike, eereegerak. At Talomo wonage ti eyom aap nen, “Mbuti perak onggo mbuuluk,” mbako nogogwaarak me, yi mendek ndi mendek mbuti perak paga ambi ogobakkigirulik mbuti emas paga mban ogobakkigike nagagerak aret.

²¹At endagembogut Talomo nogo, yi mendek ndi mendek kunik wonok nagak-wagak eekak yuurak ayiiro ambik wonagagerak me, ayiiro ti, aap Kiram apuri nen wonok wundi nogo nagaatik, mbuti emas inom, perak inom, gajah eyak inom, kera inom, towe yaawi inom, kunogo yiiro paga manabit nugwi iigak, tahun kenagan eeppunuk, wonok wagak eeko nogogwaarak.

²²Ndi, aap endagembogut Talomo nogo ti, iniki warak logonet, eenggi warak mondok iya alik negen aret wonagagerak me, it yi aakumi ndi aakumi inoweewi inendagembogut o nggween paga wonogwe abok aret at kokwak ambi wonogo logolik aret.

²³Togop aret me, at Ala nen Talomo iniki warak eeppereegerak paga yi aakumi ndi aakumi o nggween paga wonogwe inoweewi inendagembogut abok aret, “At ari kaawok o,” yinuk, owagam wogo nogogwaarak.

²⁴Ndi, pekka wogo logonet, inalitik-inalitak yi mendek ndi mendek mbuti perak paga ogobakkigirik inom, emas paga ogobakkigirik inom, yum nggorek abe inom, yigin-maale inom, yi mendek ndi mendek ombat abe eeka mendek inom, kuda inom, kuda kwak bagal inom, yi tahun ndi tahun onggo lek we aret Talomo wogori wagak eeko nogogwaarak.

²⁵ At Talomo nen kuda logorak inanggenogo inom, nggweendo wim eeka logorak awi inom, ti, empat ribu aret wonagagerak. Ndi, kuda ineebe ti, dua belas ribu aret me, o kota-kota nggweendo wim eeka logorak wureegim nogome piige, at wonage me o Yerutalem piige, eereegerak.

²⁶ At nen aap inendagembogut wonogo menggam niyo Eparat panggombunuk, nok, aakumi Pilitin wonogo menggam kagak, nugwa, o Metit kuli aret unde wonagagerak.

²⁷Aap endagembogut nogo nen yugum nggininik kwak mbuti perak o Yerutalem ambik aret eerogo pege, ndi, eyo ndoolu puut ogobak-ogobak ambik pit nagagerak kwak, eyo nggabina ambik aret eerogo pege, eereegerak.

²⁸ At Talomo ake kuda o Metit nen, yi awi ndi awi abok nen, wonok wogori wogo nogogwaarak.

²⁹Ndi, at Talomo nogo endagembogut a'nuk, wone lengganogo yoraakit nduk, eereegerak kuli nen eerit nugwa age yubuni nagagerak kuli abok aret ti, aap Ala nen yoge kagak yoraga Natan eeke nagagerak liiru mbanak paga inom, aap Ala wone yoge kagak yoraga aap Tilo mendek Akiya yorage nagagerak liiru mbanak paga inom, “Aap Nebat aput Yerobeyam nogo nen ndogop eerigin o,” yinuk, at aap abi kaga Iro nen eeriyak abi kenok yorage nagagerak liiru mbanak paga inom, inom liiru mbanak paga wonage nogo lek a?

³⁰Aap Talomo nen o Yerutalem logonet, aakumi Iterali abok aret inowe endagembogut a'nuk, wone lengganogo yorage kagak, tahun 40 eereegerak.

³¹Eeke nagagerik, ombomini kambunuk nogogwam inom yonggonggola nage mbareegi, ogoba Ndawut agota kanggwi piya unggwogo menggam nogome eebe pi unggwogogwaarak. Pi unggwogo mbareegwa, obaane'me at aput Erekabeyam inowe endagembogut aret agagerak.