Read Western Dani Etara 7 Bible Online

Etara 7 - Western Dani bible

Etara 7

¹Ti'nuk, peebi at Aratakata nogo aap Peritiya mendek inowe endagembogut a'nuk, wone lengganogo yorage kagak, aap endage Etara nogo o Mbaben nen wagagerak. Aap Etara nogo ogoba Teraya. Teraya ogoba Atariya. Atariya ogoba Kilikiya.

²Kilikiya ogoba Talum. Talum ogoba Tarok. Tarok ogoba Akitup.

³Akitup ogoba Amariya. Amariya ogoba Atariya. Atariya ogoba Merayot.

⁴Merayot ogoba Terakiya. Terakiya ogoba Uti. Uti ogoba Mbuki

⁵Mbuki ogoba Abituwa. Abituwa ogoba Pinekat. Pinekat ogoba Eleyatat. Eleyatat ogoba aap Ala unde inowe Karun aret.

⁶At Etara nogo eeko logorak wone Iterali inogoba Aliku Ala nen wone yoragagerak Muta liiru mbaneegerak nogo at abok li'lak mamuneegerak me, yi wone ndi wone era'nggup-alom abok aret eenu wonagagerak. At Etara nogo Aliku ogoba Ala eenggi omaawi paga nobapporogo wonagagerak me, woraakit nduk, aap endagembogut nggino yoreegerak nogo at nen abok aret wogoreegerak.

⁷Wogoge mbareegi, at Etara inom, aakumi Iterali mendek ineebe aago inom, it aap Ala unde inom, Lewi mendek inom, ndawi tiyangga inom, tungga'nggi arum menggaarak inom, Ala awi wurik me yabu eeko menggaarak inom, abok aret aap Aratakata endagembogut wonage kagak, tahun 6 eeppunuk, ambi eeke tut iyaalok penenak tanggal 1 paga o Mbaben nen wundi woraanuk, wogwe iigak, Ala inabuwa mbake logonet eenggi nggorek paga nobappiirogo wonagagerak me, tut 5 penenak tanggal 1 ti paga o Yerutalem unggwi wogogwaarak.

¹⁰Unggwi wogo nogogwaarik, at Etara nen eeko logorak Aliku ALA wone yereegerak liiru mbanak nogo pekkanet unggwage, liirogon aret eerit nage, eeke logonet, wone, “Yogop ee'nu ndogop ee'nu,” yugu inom, wone lengganak inom, it aakumi Iterali mamunirage nagagerak.

¹¹Wone, “Yogop ee'nu ndogop ee'nu,” yugu inom, at Aliku ALA nen Iterali wone lengganogo yoragagerak inom, era'nggup-alom abok aret eenu me, mamuniraga Ala unde Etara nogo aap endagembogut Aratakata nen liiru mbanogo wogoreegerak eebe nogo yi aret.

¹²“It yi aap ndi aap inoweewi inendagembogut inowe nendagembogut lombok an Aratakata nen at mbogut paga menggerak Ala wone yugu liiru mbanak mamuniraga kat Ala unde Etara wone ambi lengganogo yokkiri o.

¹³It aakumi Iterali we ugun mendek inom, aap Ala unde inom, aap Lewi mendek inom, an nabu'me piige minggim yime nen o Yerutalem noorak mbakwi iinok, kinom noorak op aret o.

¹⁴Ndi, eeko logorak kogoba Ala nen wone yereegerak liiru mbanak kat mondok liirogon porogo wonage me, it o Yerutalem wonogwe inom, o Yekura paga wonogwe inom, Ndak-ndak eekwi ilik, lek a? yinuk, liippiige logonok nduk, nendagembogut an inom, it nawuri ninom wone koongga ineebe 7 inom, nen nappagago o.

¹⁵Nage logonet, it ninom wone koongga nogo ninom nen Iterali inogoba Ala menggim o Yerutalem wonage nogo ake mbuti perak inom, emas inom, niniki ale'nggen paga pogoorak yi wagangge,

¹⁶it aakumi o Mbaben mendek abok nen mbuti perak-emas kuwak eekaarak nogo wagangge, ndi, it aakumi Iterali inom, aap Ala unde inom, nen o Yerutalem inogoba Ala awi wuriyak ake iniki nen onggo lek we aret pegaarak ti kunduk wagangge, ee'nuk nak o.

¹⁷Nage logomenggendik, wu ti paga tapi ngguunok inom, kambin-ndomba ngguunok inom, ndomba inaagalogwe ngguunok inom, warogo Ala ake wogogo logonet, gandum inom, amburu ake kilirogo pega nogo inom, kungge logomenggendik, ti abok aret o Yerutalem kogoba Ala awi wurik me ake warogo wogogo menggam nogo paga warogo wogoge logomunggun o.

¹⁸Wogoge logomenggendik, wu mbuti perak-emas ando ndiinnaremenggerak nogo, kinogoba Ala iniki mbake ndak-ndak kat inom, koreewi it Yakuri mendek inom nen, Yi op eeriyak, mba'nuk aret eeko logomunggup o.

¹⁹Ndi, kogoba Ala alut eeko logowak nduk, awi wurik me yi mendek ndi mendek eekak yuurak waganggendak yi perak, at o Yerutalem unde menggerak Ala enggaanom paga pi namunggun o.

²⁰Ndi, kogoba Ala awi wurik me eeriyak yi mendek ndi mendek ambi lek kenok, onggo kuniyak kat koba wonage me, o an unde minggim wu pugu wonage nogo, wokkiruwak nduk, nggino yoraamunggun o. Ngginoorage keenok, wokkiruwak nduk, an liiru inake mbani o.

²¹An nendagembogut Aratakata nen kit o nggwok niyo Eparat enebaga oonegen kilu yi nage menggim pa'nggwe nawu kuwak eerogo pogo menggam arum wonogwe nogo wone ambi lengganogo yokkira. At mbogut paga menggerak Ala nen eeko logorak wone yereegerak liiru mbanak mamuniraga Ala unde aap Etara nen yi mendek ndi mendek nggino yokkirage kenok, li'lak aret wogogo logonet,

²²mbuti perak-emas aaninggin tiga ribu empat ratus kuli wakkaanuk wogogwi, gandum karun kole dua ratus dua puluh kuli yonggolak wogogwi, anggur amburu nderom 11 kuli toolak wogogwi, tayitun amburu nderom 11 kuli toolak wogogwi, ndi, mayu ti, kuli puurak lek ugun aret wogogwi, eeko logonu o.

²³Ndi, Ala anini nen an nendagembogut wone lengganogo yorage minggim maluk eerogo pege, napuri ninom anini ninoba pinanege, eerukwak, at mbogut paga menggerak Ala nen wone lengganogo yoragagerak ndak-ndak, at mbogut paga menggerak Ala awi wuriyak ake aret me, li'lak aret eeko logomunggup o.

²⁴Ndi, ambi eeriyak yokkira. It aap Ala unde inom, Lewi mendek inom, ndawi tiyangga inom, tungga'nggi arum menggaarak inom, Ala awi wurik me yabu eeko menggaarak inom, ndi, it ambi alik Ala awi wurik me aakumi inake eeko menggaarak inom, abok aret nggween onggo inom, inarum wonogwe onggo inom, unggwi wogo logonet onggo pugwi inom, kinoone omaawi paga, Pogo logonip o, yoroorak mage o, yinuk, abu aret yokkiragi o.

²⁵Ndi, kat Etara wae. It aap o nggwok niyo Eparat enebaga oonegen kilu nage menggim pa'nggwe wonogwe nogo, abok aret inarum wonogwe, inowak loonggwi, eeko logowak nduk, it aap kogoba Ala wone eeko logorak yugu nogo ineenu kero, kogoba Ala iniki warak lombok kat wokkereegerak paga koonogo mippiige, ndi, it aap Ala wone yugu ineenggo'lek iinok mamuninake, eeke logomunggun o.

²⁶Kogoba Ala eeko logorak wone yereegerak inom, an nendagembogut nawone lengganak inom, it nen ndak-ndak eeka'lek mbo pugwi iinok, aaninggin inoba piigo logonet inoorogo piigwi, endekem mbo wumbiigwi, inamendek abok aret ndinggologwe, keele maarogo mambiigo menggam mambiigwi, eeko logowak o,” yinuk, liiru mbanogo Etara wogoreegerak ti aret.

²⁷Ndi, liiru an Etara nake mbaneegerak nogo woppunuk, pekkage nagarik, “Ala wa,” yinuk, yoge logonet, “Kaliku ALA kawi wurik o Yerutalem wonage nogo obeelom eerogo puwak nduk, aap endagembogut inikime mambege, ndi, kat an nabuwa mba'nuk aap endagembogut inom, inom wone koongga inom, inom eeko menggaarak inendage warak nagawan-nagawan inom, abok aret yeenggwa niruwak nduk, eeppiige, eekendak me, Kaliku ninombomini inogoba Ala kendage tiyappagage agarik o.” Ari nagarik, at Aliku nogoba Ala eenggi nggorek paga nobappanogo wonagagerak me, nogogumbuk a'nuk, aakumi Iterali inenggela'me nen inoweewi ninom woraakit nduk, kuwak eeppiinok, ninom wogogurak ti aret.