Read Western Dani Nekemiya 12 Bible Online

Nekemiya 12 - Western Dani bible

Nekemiya 12

¹It aap Ala unde inom, Lewi mendek inom, at Teyalitiyen aput Terubaben Yetuwa imbirak inom iniyokan wogogwaarak inendage liiru mbanak yi o. Teraya, Yeremiya, Etara,

²Amariya, Maluk, Katut,

³Tekaniya, Erekum, Meremot,

⁴Iro, Ngginetoyi, Abiya,

⁵Miyamin, Maaya, Mbilaga,

⁶Temaya, Yoyarip, Yeraya,

⁷Talu, Amok, Kilikiya, Yeraya. It aap yi, aap Ala unde inowe Yetuwa wonage kagak, aap Ala unde inoweewi inoreewi inom wogogwaarak ti aret.

⁸Ndi, it aap Lewi mendek nogo ti, Yetuwa inom, Mbinuwi inom, Karimiyen inom, Terebiya inom, Yekura inom, aap oreewi inom Ala, “Wa!” yogo logonet, ndawi tiyangga Mataniya inom,

⁹Aap Mataniya oreewi inom ndawi tiyanggwi iigak, inoreewi ndawi inomaani mbangga Mbakabukiya Uni imbirak inom, nogo ti aret.

¹⁰At Yetuwa nen Yoyakim ndake, Yoyakim nen Eliyatip ndake, Eliyatip nen Yoyara ndake,

¹¹Yoyara nen Yonatan ndake, ndi, Yonatan nen Yaruwa ndake, eereegwaarak.

¹²At Yoyakim Ala unde inowe wonage kagak, it Ala unde ndarak ndegek inoweewi wonogogwaarak nogo inendage mbanak yi aret. Aap Teraya paga wiganak inowe Meraya. Aap Yeremiya paga wiganak inowe Kananiya.

¹³Aap Etara paga wiganak inowe Metulam. Aap Amariya paga wiganak inowe Yokanan.

¹⁴Aap Meliku paga wiganak inowe Yonatan. Aap Tebaniya paga wiganak inowe Yutup.

¹⁵Aap Karim paga wiganak inowe Arana. Aap Merayot paga wiganak inowe Kelakayi.

¹⁶Aap Iro paga wiganak inowe Takariya. Aap Nggineton paga wiganak inowe Metulam.

¹⁷Aap Abiya paga wiganak inowe Tikiri. Aap Miniyamin Mowaya imbirak ndarak paga wiganak inowe Pilatayi.

¹⁸Aap Mbilaga paga wiganak inowe Tamuwa. Aap Temaya paga wiganak inowe Yonatan.

¹⁹Aap Yoyarip paga wiganak inowe Ma'nayi. Aap Yeraya paga wiganak inowe Uti.

²⁰Aap Talayi paga wiganak inowe Kalayi. Aap Amok paga wiganak inowe Kebet.

²¹Aap Kiliya paga wiganak inowe Katabiya. Ndi, at Yeraya paga wiganak inowe Netanen aret.

²²It aap Eliyatip, Yoyara, Yokanan, Yaruwa, Ala unde inoweewi wonogwe iigak, aap Lewi mendek ndarak ndegek inoweewi inom, Ala unde ndarak ndegek inoweewi inom, ti aap Peritiya mendek inowe endagembogut Ndariyut wone lengganogo yorage kagak, inendage liiru mbaneegwaarak.

²³It Lewi mendek paga wiganak ndarak ndegek inoweewi nogo ti, it Ala unde inoweewi eeko nogogwaarak liiru mbanak nogo paga liiru mbanggugak at Eliyatip aput Yokanan Ala unde inowe wonage eyom ari wagagerak.

²⁴It aap Lewi mendek inoweewi aap Katabiya inom, Terebiya inom, Karimiyen aput Yetuwa inom, it inoreewi ti inom mi'na'nuk, aap Ala wone liirogon eeka Ndawut nen koonogo pereegerak nogo ndak-ndak Ala, “Wa,” yogwi, endage tiyappugwi, eekwi nogo mendek ndawi nomaani-komaani wako nogogwaarak.

²⁵Aap Yotarak ombooluk, Yetuwa aput Yoyakim Ala unde inowe wonage, an Nekemiya o unde wonage, ndi, aap Etara Ala unde logonet, liiru mbangga wonage, eekwi niigak, aap Mataniya, Mbakabukiya, Obaya, Metulam, Talomon, Akup, it nogo nen tu unggwogo menggam arum logonet, tu unggwogo menggam yi mendek ndi mendek pogo menggam nogo, inom arum wonogogwaarak.

²⁷Yugum pak Yerutalem wureegwaarak ale'nggen eerogo laago lakwi eyom paga inale'nggen nen, “Wa!” yogo logonet, togolowak tabak oone pu ndale eekwi, nggitat mbuuluk paga eekwi, nggwok paga eekwi, eeko logowak nduk, it aap Lewi mendek wonogo menggam lombok wonogwe nogo, inayonggo pereegwaarak o Yerutalem wogwe,

²⁸it aakumi ndawi tiyangga inawi o Yerutalem enaagan-ambokan wuppatinuk, wonogogwaarak nogo nen, it aap Netopa mendek inawi yaga'lelo lombok menggam nen, o Mbet-Nggilagan nen, o Nggeba nen, o Atamawet nen, it ndawi tiyangga kero kuwak ari wogwe, eeko mbareegwa,

³⁰it aap Ala unde inom, Lewi mendek inom, inoba maluk lenggenak kero mbeenogo patinuk, it aakumi inoba maluk lenggenak wonage kero mbeenogo piigwi, yugum pak wurik inom, tu unggwogo menggam inom, nggomoorogo pugwi, eereegwaarak.

³¹An nen it aap Yekura mendek inoweewi nogo yorage logonet, “Yugum pak wurik irimbaga time lagi nanip o,” yorage nagagirik, lagi nogo mbareegwa, “Wa!” yogo logonet, ndawi wako logowak nduk, an nen ndawi tiyangga ineebe mbere mogonogo piinok, it ambi aago ina yugum pak wurik neenggi abe'nggan tu unggwogo menggam endage, Inambeebuk Pogo Menggam, pa'nggwe nawak nduk, yoragagirak

³²nogwe iigak, aap Kotaya it Yekura mendek inoweewi ando inom,

³³it aap Atariya, Etara, Metulam,

³⁴Yekura, Mbeniyamin, Temaya, Yeremiya inom,

³⁵Atap nen Takut ndake, Takut nen Mika ndake, Mika nen Mataniya ndake, Mataniya nen Temaya ndake, Temaya nen Yonatan ndake, ndi, Yonatan nen Takariya ndake, eereegwaarak me, it aap Ala unde oone nggwok eeka trompet wonok nogo nogogwaarak ambi Takariya nogo inom,

³⁶at oreewi at Ala wone liirogon eeka Ndawut nen koonogo pereegerak ndak-ndak, oone eeka alik mendek unde menggaarak inendage ti, Temaya, Ataren, Milalayi, Nggilalayi, Maayi, Netanen, Yekura, Kanani, nogo inom, Etara aa'nduk a'nuk, nage kagak, it yi, ambokan nawak nduk, koonogo piige mbareegi,

³⁷tu unggwogo menggam endage, Niyo Ti'mbilili Wangge Menggim, nen Ndawut agota nda'nggi laganggo menggam lagi nanuk, aap endagembogut Ndawut awi o nggwok abe wurik kagak irimbaga tu unggwogo menggam endage, Niyo Oonegen Lagi Wage Menggim, nogome ari nogogwaarak.

³⁸Ndi, ti nogwe iigak, it ndawi tiyangga ambi aago nogo, yugum pak wurik neenggi kwaarek pa'nggwe nawak nduk, nappiinok, nogwe iigak, it aakumi ando ninom inambokan o nggorek wurik endage, Worako Menggam, kuli nen nok, pak endage, Ambin Wiganak, paga ari nanuk,

³⁹tu unggwogo menggam endage, Eparayim, kagak, Maan kagak, Yikwe kagak, o nggorek endage Kananen kagak, o nggorek wurik endage, Seratus kagak, tu unggwogo menggam endage, Ndomba kagak, tu unggwogo menggam endage, Keele Maarak Menggam kuli aret puk ari nogogurak.

⁴⁰Ti'nuk, it ndawi tiyangga nen Ala, “Wa!” yoruwok nduk, aa'nduk nogogwaarak nogo inom lambumbunuk, Ala awi wurik me unggwi nogwe iigak, an togon, it inarum menggaarak inoweewi ando togon,

⁴¹it aap Ala unde menggaarak oone nggwok eeka trompet wonok at Eliyakim, Maateya, Miniyamin, Mika, Eliyowenayi, Takariya, Kananiya togon,

⁴²Maateya, Temaya, Eleyatat, Uti, Yokanan, Malikiya, Elam, Etet togon, it inambokan unggwi nogogurak. Unggwi nogo nogogurik, aap Yitiraya nen ndawi wariyak kooninake kagak, it ndawi tiyangga mbere aago nogo ndawi wareegwaarak.

⁴³Wakwi ne ti eyom paga at Ala nen ale'nggen nggwok inoba piyareegerak me, iniki ale'nggen nen inaanggumi apit lombok warogo Ala ake wogoreegwaarak. Ala ake warogo wogogo logonet, kumi inom, wologwe-komologwe inom, abok aret inale'nggen nen inoone nggwok paga o Yerutalem logonet yogwe nogo, o ndaanda time abok aret inaruk konenggo nogogwaarak.

⁴⁴ It aap Ala unde inom, aap Lewi mendek inom, inogoba Ala ake me nduk, aakumi inake liirogon eekwi, inoba maluk lenggenak kenok mbeenogo piigwi, eekwi paga it aap Yekura mendek nen inale'nggen mbareegwaarak me, it inake pogo logorak wone yugu liiru mbanak nogo ndak-ndak inawi kota-kota enaagan-ambokan ineyabu yarak me nen anggen iyaalok yugu mbanak inom, iniki nen, “Inake pikit o,” yinuk, pugwi inom, 10 wonage kenok ambi yendok ambi yendok eerogo pugwi inom, pi wogo logowam o unde logowak nduk, ne ti eyom paga aap mippiyareegwaarak. Ndi, o maan aa'nduk aap Ndawut Atap imbirak wonogwe eyom paga it ndawi tiyangga nen Ala, “Wa!” yogwi, endage tiyappugwi, eekwi iigak, inake kooninaka inom inake wonok wogo nogogwaarak nogo kokwak, aap Terubaben Nekemiya imbirak wonogwe eyom paga at Ndawut aput Talomo imbirak nen wone lengganogo pereegwaarak ndak-ndak, it ndawi tiyangga inom, tu unggwogo menggam arum waka inom, it kunduk, Ala ake obeelom aret eeko mbareegwa, it Iterali abok aret ko'lu-kii'me it nda(...)