Read Western Dani Nekemiya 13 Bible Online

Nekemiya 13 - Western Dani bible

Nekemiya 13

¹ Ne ti eyom paga it aakumi apit aret inaruk konenggwi iigak, eeko logorak wone lengganak Muta nen liiru mbaneegerak nogo, malenggo logonet, aap Amon mendek inom, Mowap mendek inom, it Iterali wogwe me, ineebe woppiinok, mbi inom, niyo inom, wogoroorak kagak, at Mbileyam nen pulunogo piyaawak nduk, onggo wogoreegwaarak me, it aap Amon mendek inom, Mowap mendek inom, Ala apuri kuwak eekwi me, “Inom kuwak eeko logorak mage o,” yugu nogo liiru mbanak kogogwaarak. Aap Mbileyam pulunogo pinaneegerak nogo ti, ninogoba Ala melak togon ale'nggen ninoba pinaneegerak kwe,

³it aakumi nen wone yugu liiru mbanak nogo konenggo nogogwaarik, it Iterali mendek lek alik mendek ndarak kenok, leenogo wumbiyareegwaarak.

⁴Ti awo eeka'lek kagak, ninogoba Ala awi wurik me ake pogo menggam unde logowak nduk, aap Ala unde Eliyatip nogo mippereegwaarak. At Eliyatip nogo aap Tobiya imbirak kunik wonage me,

⁵it aakumi aa'nduk nen gandum anggen yigirik ake pugu inom, obari abe kaga nogo inom, yi mendek ndi mendek Ala awi wurik me eeko menggaarak ake pugu inom, nogome pugwi, gandum anggen inom, anggur amburu ngget toolak inom, tayitun amburu inom, 10 wonage kenok ambi yendenogo Ala ake punuk, it aap Lewi mendek togon, ndawi tiyangga togon, tu unggwogo menggam arum waka togon, wogorogo logorak wone koonak nogo inake pugwi, ndi, “It Ala unde inake pikit o,” yinuk, inake pugwi, eeppunuk, pi wogo menggam ko kole ogoorak nogo at Tobiya unde logowak nduk, wogoreegerak.

⁶Ti eekwi iigak, an o Yerutalem wonage logolik. An nogo, aap Aratakata it Mbaben mendek inowe endagembogut wonage kagak, tahun 31 eeppunuk, ambi age paga niyokan aap endagembogut nogo owagam nagagirak me, we mbuuluk wonagagirik, woraakit nduk, aap endagembogut nogo yo'nuk,

⁷o Yerutalem wage nagagirik, at aap Eliyatip nen aap Tobiya Ala awi wurik eraanu ko ambi ogoorak wogoreegerak nogo ti, maluk lombok eereegerak kage nagagirik,

⁸niniki aagi mondok alik negen age logonet, at Tobiya amindik-amendek wonage nogo abok aret kabelogo endekem mbo tagala wumbunuk,

⁹ko ogoorak maluk agagerak nogo obeelom aruwak nduk, “Yi werenogo pit nanip o,” yoragagirak eeko mbareegwa, yi mendek ndi mendek Ala awi wurik me eeko menggaarak gandum anggen ake pugu inom, obari abe kaga inom, waganogo obaane'me pi unggwagagirak.

¹⁰ Pi unggwage nagagirik, ti'nuk, it aap Lewi wogorogo logorak wone punik nogo wogoraga'lek iinok, aap Lewi mendek inom, it aap ndawi tiyangga inom, ineyabu inalitak lombok eeko logorak yoragagerak nogo mbo punuk, ineyabume nanuk ineyabu eekko'net nugwi neenu age nagagirik,

¹¹it aakumi inarum menggaarak inoweewi nogo mberirage logonet, “Nonggop nduk Ala awi wurik yi, eraangge mbo pogotak?” Ari nagagirik, it aap Lewi mendek nogo wiiragagirak wogo mbareegwa, ineyabu eeko menggam eeko logowak nduk wogoren piya wagagirak.

¹² Piya wage mbareegi, it aakumi Yekura mendek abok aret nen gandum anggen inom, anggur amburu ngget toolak inom, tayitun amburu inom, 10 wonage kenok, ambi yendenogo ake pogo menggam pi wogogwaarak.

¹³Pi wogo mbareegwa, pogo menggam nogome arum logowak nduk, aap Ala unde Telemiya inom, at liiru mbangga Tarok inom, aap Lewi mendek Peraya inom, li'lak eekwi iige nagagirak me, mippiige nagagirik, it yeenggwaarage logowak nduk, aap Mataniya ombooluk Takut aput Kanan inom mippereegirak. It aap mippiyareegirak ti, ake pugu nogo inoreewi tumburirogo logowak nduk, ineyabu ti aret unde eeppiyareegirak.

¹⁴“Ai, nogoba Ala o. Kat nogoba Ala kawi wurik ake inom, inikime nen aakumi inake eeko logorak inom, niniki nabek togon eerit nage nogo, kobak eerogo puurak mage o. Eerit wage neegendak nogo noba aberak aret logot o,” yinuk, tamban eereegirak.

¹⁵ Ti eyom paga o Yekura time it aakumi nen nogo 6 yippunuk, ko'lu yonggonggologo logorak wone yugu kagak anggur anggen aambiranggwi, ndi, it ando nen gandum anggen inom, anggur amburu toolak inom, anggur anggen mbanak inom, eyo wuliinggen inom, yi mendek ndi mendek eegu ambik aret inom, waganogo keledai paga nippunuk, nogo 6 yippunuk, ko'lu yonggonggologo logorak yugu ti paga wonok, o Yerutalem pi wogwe, eekwi iige nagagirik, “Nogo 6 yippunuk, ko'lu yonggonggologwe paga onggo kuniyak ti mage o,” yoragagirak.

¹⁶Ndi, it aakumi Tirut mendek o Yerutalem wonogwe nogo nen yikwe inom, yi mendek ndi mendek enete alik-alik mendek inom, nogo 6 yippunuk, ko'lu yonggonggologwe ti paga o Yerutalem it Yekura mendek inoba kuni wogwe iige nagagirik,

¹⁷it aap Yekura inoweewi inengga warak nogo mberirage logonet, “Nogo 6 yippunuk, ko'lu yonggonggologo logorak yugu kagak maluk eeppugwi ti, maluk nggwok lombok eekwi me, nonggop nduk eeko ogotik?

¹⁸Ninogoba Ala nen nit aaninggin ninoba pinanege, ndi, ninawi kota yi, maluk eerogo pege, eeke yi, nit ninombomini maluk yogobi eereegwaarak paga eeppinanege lek mbakop? Eereegwaarak paga eeppinanege me, nogo 6 yippunuk, ko'lu yonggonggologo logorak yugu kagak maluk eeppugwi paga Ala anini nggwok lombok nit Iterali ninoba pinanuwak mba'nuk, eekwi kiigi o,” yinuk, yoragagirak.

¹⁹Nogo 6 yippunuk, ko'lu yonggonggologo logorak ari naakit nduk, oonegen kilu yi nage kagak tu unggwi wogo menggam yumaak arit nage kenok, “Tu unggwit wogo menggam abok aret narogo pit namonggotak paaka'lek kiigak, ko'lu yonggonggologwe paga o kiyoma abu aret ari nage kenok, tu paarogo pit namunggup o,” yinuk, wone lengganogo yorage nagagirik, nogo 6 yippunuk, ko'lu ti paga yi mendek ndi mendek wonok unggwi wogwe iyo, tu unggwogo menggam lombok tum wako logowak nduk, napuri piinet nagagirak.

²⁰Piinet nage mbareegi, it aakumi kunggo menggaarak inom, yi mendek ndi mendek enete alik-alik kunit nogwe nogo inom, ne mbere-kenagan o Yerutalem pak endekenggwe nogo yogo mbareegwa,

²¹an nen it yorage logonet, “Nonggop nduk, pak endekenggwe nogo yogo ogotik? Ambinom nogo yugwi kiinok, an nen kinoorigin aret o,” yorage mbareegi, nogo 6 yippunuk, ko'lu ti paga it ambi mondok woroolik aret o.

²²Ti'nuk, an nen it aap Lewi mendek yorage logonet, “Nogo 6 yippunuk, ko'lu yonggonggologwe nogo ti, Ala ake alik leenak wonage me, maluk eerogo pukwak, maluk kinoba lenggenak wonage kero, mbeenogo pako logomonggotik, tu unggwit wogo menggam arum warit nogo logonip o,” yinuk, yoragagirak. “Ai, nogoba Ala o. It aakumi inabuwa nggwok lombok mbake menggendak me, an eerit wage yi nogo paga nabuwa mba'nuk, noba aberak aret logot o,” yinuk, tamban eereegirak.

²³ Ndi, ne ti eyom paga mban it Yakuri mendek nen kumi Atorot mendek inom, Amon mendek inom, Mowap mendek inom, wogonakwi,

²⁴ndi, it inapuri ndaganabeegwaarak nogo eegu nen wone Yakuri inoone paga yogwe lek Atorot inoone paga a, it aakumi alik inoone paga a, yogwe, eekwi iige nagagirik,

²⁵mberirage, pulunogo piige, it aap ineebe mande negen yawi inooke, ineeruwak wiirogo nappiige, eeke nagagirik, yorage logonet, “Ninapuri komologwe ti, it inapuri wologwe wogorogwe, ndi, it inapuri komologwe nit ninapuri wologwe kolaawak nduk, wo'nirogwe, ndi, nit kunduk kologwe, eeko logogun mondok lek o, yinuk, Ala endage kumbunuk, wone kumbuk mbaninip o.

²⁶ Kit eekwi yogobi it Iterali inowe endagembogut Talomo nogo nen eerit nage logonet, maluk eereegerak lek mbakop? At Ala nen iniki kunik eeke nagagerik, aakumi Iterali abok aret inowe endagembogut mippereegerak yi aakumi ndi aakumi inoweewi inendagembogut at ndak-ndak ambi lek aret kwe, kumi alik mendek wogonabeegerak nen maluk eerit nawak nduk, inikime mambereegwaarak.

²⁷Ndi, kit kunduk kumi alik mendek wogonakotak paga ninogoba Ala yo'niragagerak nogo, li'lak eeka'lek mbo punuk, maluk lombok eerit nogwe yogwe ninaruk konembunuk, e-wa yokkiroorak mbakop? Lek aret o,” yinuk, yorage nagagirik,

²⁸ at aap Ala unde inowe Eliyatip ombooluk Yoyara aput ambi nen aap Mbet-Koron mendek Tambalat apuluk waganeegerak me, an wonage me nen mugogo wumbereegirak.

²⁹“Ai, nogoba Ala o. It aap ti nen kat keebe unde logonet, ineyabu eeko menggaarak inom, it aap kat keebe unde eege, aap Lewi mendek eege, ‘Ndogop eeko logowak o,’ yinuk, wone koonogo piyareegindak inom, yit tarip eerogo piigaarak me, inoba aberak mban logot o,” yinuk, tamban eereegirak.

³⁰Togop me, it Ala unde menggaarak inom, aap Lewi mendek inom, yit tarip eerogo piyareegwaarak nogo inoba mbeenogo piige nagagirik, ineyabu eeko menggam lombok eeko logowak nduk, punogo piyareegirak.

³¹Ndi, “O ndi eyom paga kani ira wogo logu o,” yinuk, koonogo piige, yi mendek ndi mendek iyaalok yugu pi wogo logowak nduk, koonogo piige, eereegirak o. “Ai, nogoba Ala o. Nabuwa mba'nuk, noba aberak logot o,” yinuk, tamban eereegirak nogo ti aret. 1