Read Western Dani Nekemiya 2 Bible Online

Nekemiya 2 - Western Dani bible

Nekemiya 2

¹Aap Aratakata nogo endagembogut wonage kagak, tahun 19 eeppunuk, ambi eerak tut Nitan penenak paga aap endagembogut enggaanom paga niniki puru aago wonageelik kwe, ne ti eyom paga niniki puru aago logonet, at ake anggur amburu pipuk eerak nogo wonok at iri nage mbareegi,

²at nen an yo'nege logonet, “Keebe andi lek kwe, nonggop nduk, kenete ogum eeppunuk agandik? Kat abet aret kiniki puru aago keegi o.” Yo'nege mbareegi, an nagabiti ambik mbareegirak.

³ Nagabiti mbake nagagirik, aap endagembogut yoge logonet, “Kendage mondok-mondok ki aret logogin o. An nombomini inowak paga inawi kota nogo yinik-minik aago wonage, ndi, pak ambe mbanak tungga kani nen abok aret nengge, eekerak kagak, an nonggop togon nenete ogum lek eya logorak mbaken?”

⁴Yoge mbareegi, at endagembogut nogo nen an yo'nege logonet, “Togop kenok, kat nen an nano eeppagarak uugwe mbaken?” Yo'nege mbareegi, an ninikime nen at mbogut paga menggerak Ala endage kunogo

⁵aap endagembogut nogo yoge logonet, “Kat kendagembogut nen an kayeloman yi, nombomini kambeegwaarak piya unggwogogwam o Yekura kota Yerutalem obaane'me wuriyak op aret mbake, ndi, At nen aret wuri nagin, nombake, eeke keenok, an aret nappanu o.”

⁶Yoge mbareegi, aap endagembogut akwe kwe nggwok nogo, imbirak taati kwi'ndak logonet, aap endagembogut nen an yo'nege, “Kat nogo mande yegak tu paga nage logomenggendik, ne mande logonuk, kiyokan woraamunggun o?” Yo'nege mbareegi, an nen, “Ne ndi paga woraagin o,” yoge mbareegi, “Togop kenok noorak op aret o,” yinuk, nappani woroorak mbareegerak.

⁷Mbake mbareegi, an nen wone ambi at yoge logonet, “Ndi, kat nowe kendagembogut wae. An neebe non mbambaniyak lek we kuuri'me aret it niyo Eparat enebaga oonegen kilu yi nage menggim pa'nggwe yi o ndi o unde wonogwe nogome unggwagak o Yekura unggwi naakit nduk, liiru mbanogo wo'nege,

⁸ndi, Ala awi wurik wonagagim koorok o kota pak wurik enegen kunik me aap endagembogut awi wurik me unggwage logowam tunggambe mbaniyak ake inom, o kota pak ambe mbaniyak ake inom, an logorak nawi wuriyak ake inom, aap endagembogut unde menggim eyoongga arum menggerak Atap nen eyo wo'niruwak nduk, at ake inom liiru mbanogo wo'nege, eeriyak op nombakendak kenok, eeru o,” yinuk, yoreegirak. Yoge mbareegi, at Ala nabuwa mba'nuk, eenggi nggorek paga nobappanogo wonage kagak yoreegirak me, aap endagembogut yoreegirak nogo liippege nagagerik, liiru mbanogo wo'nereegerak.

⁹Wo'nege nagagerik, it aap ineegin warak inoweewi inom, inawuri kuda paga nega inom, ninom woraawak nduk, yorage mbareegi, it ninom wogo nogogurik, liiru mbanak nogo it niyo Eparat oonegen kilu yi nage menggim pa'nggwe yibagan wonogwe nogo wogoranet nagagirak.

¹⁰Wogoranet nage mbareegi, aap Koron mendek Tambalat inom, aap Amon mendek inom eeke menggerak Tobiya inom, imbirak nen, “Aap Iterali mendek yeenggwaaraawak nduk wagaarak o,” yogwe inaruk konenggo nogogwaarik, inanini ambik ogogwaarak.

¹¹Ndi, an o Yerutalem abu aret wage nagagirik, nogo kenagan yippunuk,

¹²an o Yerutalem nonggop eeriyak nogo, Ala nen koonogo ninikime pereegerak me, aap ambi yoraga'lek aret oonikiya ti paga neenik age nagagirik, an noreewi ineebe mande negen ninom nogo logonet, it kuda paga lagi noolik nalik aret kuda paga lagi nanuk nagagirak.

¹³O Yerutalem pak wurik yinik-minik eerogo pugwi, pak ambe mbanak kani mbelanogo pugwi, eerak nogo oonikiya ti paga aret maloppit nage logonet, tu unggwogo menggam endage, Kobappaga, ti paga wundi nanuk, niyo endage, Waalo Eneerime nogo menggam nawok nduk, tu unggwogo menggam endage, Inambeebuk Pogo Menggam ari nanuk, nugwa,

¹⁴Aap Endagembogut Aniyo Narak Me tu unggwi wogo menggam endage, Niyo Ti'mbilili Wangge Menggim nawok nduk, eereegurak kwe, tu abu kagaarogo pereegwaarak me, kuda paga kwi'na'nuk nage nogo, tu ti paga noorak meek age mbareegi, yungguninuk,

¹⁵pak wurik tu kobappaga pekkanet lagi nanuk, niniyok paga wogo nogogurik, tu unggwogo menggam endage, Kobappaga ti paga unggwi wogogurak.

¹⁶An nen, “Togop eeri na o,” yinuk, yoroolik me, pekkenet nagagirak eege, eeriyak kooneegirak eege, it Yakuri mendek inom, Ala unde inom, aap inengga warak inom, inendage warak inom, ndi, it o pak wurugun nogo inom, ineenggo'lek ugun aret wonogogwaarak.

¹⁷Ineenggo'lek aret wonogwe me, an nen it yorage logonet, “Aaninggin-paaninggin ninoba kwi'nagaarak yi, kinigen kaanip o. O Yerutalem yinik-minik eerogo pugwi, pak ambe mbanak abok aret kani mbelanogo pugwi, eereegwaarak me, nit ninenggali mbakak logukwak, o Yerutalem pak obaane'me wuruwok o.”

¹⁸Yorage nagagirik, nogoba Ala nen nabuwa mba'nuk, eenggi nggorek paga nobappanege me, aap endagembogut nen yo'nereegerak nogo inom mbininogo yorage mbareegi, it onggo yo'nogo logonet, “Ti kenok, wuruwok aret o,” yo'nogo nogogwaarik, inawi kota ti obeelom eerogo patuwok nduk, inomaawi paga yagat wareneegwaarak.

¹⁹Ti eeko mbareegwa, aap Koron mendek Tambalat inom, aap Amon mendek inom eeke menggerak Tobiya inom, aap Arap mendek Nggeteyem inom, inaruk konenggo nogogwaarik, ninagi'ndok kanggwi, miyuk-meya eerogo pinanugwi, eeko logonet, nit yo'nirogwe, “Kit nano eeko ogotik? Aap endagembogut wone lengganogo yokkirage nogo, Nineebi o, yinuk, kiniki mi'nage agaarik ya?”

²⁰Yo'nirogo mbareegwa, an nen it yorage logonet, “Nit Ala ayeloman mini aret me, o yi wuruwok nduk, eekwi niigak, at mbogut paga menggerak Ala nen yeenggwa niraagin aret o. Yeenggwa niraagin kwe, kit o Yerutalem yime unde wonogwe, kinendage ambi yogwe, Kinaworak o, yogwe, eekwi lek aret me, kit kinobaalombok nen kooniyak ambi lek aret mbako logonip o,” yinuk, yoragagirak.