Read Western Dani Nekemiya 3 Bible Online

Nekemiya 3 - Western Dani bible

Nekemiya 3

¹It aap Ala unde inowe Eliyatip oreewi inom nen tu unggwogo menggam endage, Ndomba obaane'me wuppunuk, nggomoorogo pogo nogogwaarik, tu ogobakkigirik nggelenogo pit nogogwaarak. Pit nogo nogogwaarik, pak eegu kunogo wurit o nggorek wurik endage, Seratus nogo paga panggonogo punuk, nggomoorogo pugwi, ti'nuk, eegu kuninuk o nggorek endage, Kananen paga panggonogo pi nanuk, nggomoorogo pugwi,

²eeko mbareegwa, it aap Yeriko mendek nen aap Eliyatip oreewi wukwi nogo panggombunuk, wurit nogwe, it eekwi nogo panggombunuk, aap Imiri aput Takut nen wurit nage, eereegwaarak.

³Tu unggwogo menggam endage, Yikwe nogo ti, aap Tema apuri nen obaane'me wuko logonet, pak ambe eyo mippunuk, tungga nggelenogo pugwi, wa'mbit narogo pugwi, eekwi iigak,

⁴it eekwi nogo panggombunuk, at Kakot ombooluk Uriya aput Meremot nen ogobakkigirogo pit nage, at eeke nogo panggombunuk, aap Metetaben ombooluk Mberekiya aput Metulam nen ogobakkigirogo pit nage, at eeke nogo panggombunuk, aap Mbaana aput Tarok ogobakkigirogo pit nage,

⁵at eeke nogo panggombunuk, aap Tekowa mendek ogobakkigirogo pit nogwe, eereegwaarak kwe, it inoweewi aap inengga warak nen perak, “Ninogoba nen eeriyak yo'nirage nogo nineebi o,” yinuk, mbo pereegwaarak.

⁶Tu unggwogo menggam endage, Maan, nogo ti, aap Pateya aput Yoyara inom, Mbetoya aput Metulam inom, nen ogobakkigirogo pogo logonet, pak ambe eyo mippunuk, tungga nggelenogo pugwi, wa'mbit narogo pit nogwe, eekwi iigak,

⁷it eekwi panggombunuk, aap Nggibeyon mendek Melata inom, aap o Meronot mendek Yaron inom, o niyo Eparat oonegen kilu yi nage menggim pa'nggwe yibagan unde inowe abu'me wonogwe it aap o Nggibeyon mendek eege, Mitapa mendek eege, nogo inom, nen ogobakkigirogo pit nogwe,

⁸it eekwi nogo panggombunuk, aap yi mendek ndi mendek mbuti emas paga ogobakkigika aap Karakaya aput Utiyen nen ogobakkigirogo pit nage, at eeke nogo panggombunuk, amburu obari abe ogobakkigika ambi endage Kananiya nen ogobakkigirogo pit nage, eerit nok, o Yerutalem pak wurik abeenok endage, Ambin Wiganak, kuli pi nogogwaarak.

⁹Ti pi nogogwaarak nogo panggombunuk, o Yerutalem peenok unde wonagagerak aap Kut aput Erepaya nen ogobakkigirogo pit nage,

¹⁰at eeke nogo panggombunuk, at Karumap aput Yeraya nen awi wurik enaame ogobakkigirogo pit nage, at eeke nogo panggombunuk, Katabeneya aput Katut nen ogobakkigirogo pit nage,

¹¹at eeke nogo panggombunuk, Karim aput Malikiya inom, Pakat-Mowap aput Katup inom, nen ando ogobakkigirogo punuk, o nggorek wurik endage, Woraako Menggam ogobakkigirogo pugwi,

¹²it eekwi nogo panggombunuk, o Yerutalem abeenok unde menggerak aap Kaloketi aput Talum apuri komologwe inom nen ogobakkigirogo pit nogwe, eereegwaarak.

¹³Tu unggwogo menggam endage, Kobappaga, nogo ti, aap Kanun inom, it aap o Tanowa mendek inaworak inom, nen obaane'me wurogo punuk, tungga nggelenogo pugwi, wa'mbit narogo pugwi, eeko nogogwaarik, yagat pak ogobakkigirit nok, tu unggwogo nogogwam endage, Inambeebuk Pogo Menggam, metet empat ratus lima puluh kuli pi nogogwaarak.

¹⁴Tu unggwogo nogogwam, Inambeebuk Pogo Menggam ti, o Mbet-Kerem unde aap Erekap aput Malikiya nen obaane'me wurogo tungga nggelenogo pege, wa'mbit narogo pege, eereegerak.

¹⁵Tu unggwogo nogogwam endage, Niyo Ti'mbilili Wangge Menggim ti, aap o Mitapa unde Kolokote aput Talum nen obaane'me wurogo punuk, oo'ngget maarogo pege, tungga nggelenogo pege, wa'mbit narogo pege, eeke nagagerik, niyo narak Tilowam aap endagembogut eyabu yarak me nen nok, at Ndawut agota wambi nogo menggam nda'nggi yugum paga pugu kuli owa'nagat wurogo pege,

¹⁶at eeke nogo panggombunuk, aap o Mbet-Tut abeenok unde inowe aap Atubuk aput Nekemiya nen wurit nok, Ndawut kambeegerak pi unggwogogwam nakkandigin niyo narogo pereegwam inom, it aap wim wakaa'ngget inawi wonogogwam inom, kuli wurogo pi nage, eereegwaarak.

¹⁷It ti eekwi nogo panggombunuk, it Lewi mendek nogo aap Mbani aput Erekum inarum wonage kagak ogobakkigirogo pit nogwe, it eekwi nogo panggombunuk, aap o Kekila peenok unde inowe Katabiya nen at unde menggim pa'nggwe ogobakkigirogo pit nage,

¹⁸at eeke nogo panggombunuk, it aap Kekila mendek inoreewi ando nen aap o Kekila abeenok unde inowe Kenarat aput Mbinuwi inarum wonage kagak, ogobakkigirogo pit nogwe,

¹⁹at eeke nogo panggombunuk, yigin awi wurik me laganggo menggam enaame nen nok, unggut me kuli aap o Mitapa unde inowe Yetuwa aput Etet nen ogobakkigirogo pit nage,

²⁰at eeke nogo panggombunuk, unggut me nogo nen aap Ala unde inowe Eliyatip awi tu unggwogo menggam kuli aap Tabayi aput Mbaruk nen iniki aganggen kerek togon ogobakkigirogo pit nage,

²¹at eeke nogo panggombunuk, at Eliyatip awi wurik tu unggwogo menggam kuli nen nok, awi irip kuli Kakot ombooluk Uriya aput Meremot nen ogobakkigirogo pit nage, eereegwaarak.

²²At eeke nogo panggombunuk, it Ala unde o kobappaga time menggaarak nogo nen ogobakkigirogo pit nogwe,

²³it eekwi nogo panggombunuk, it aap Mbeniyamin Katup imbirak nen inawi wurik enaame pa'nggwe ogobakkigirogo pit nogwe, ndi, it eekwi nogo panggombunuk, aap Ananiya ombooluk Maateya aput Atariya awi wurik enaame pa'nggwe ogobakkigirogo pege,

²⁴at eeke nogo panggombunuk, aap Atariya awi wurik me nen nok, pak wurik unggut yomonak me aap Kenarat aput Mbinuwi nen ogobakkigirogo pit nage,

²⁵ndi, unggut me nogo panggombunuk, aap endagembogut awi o nggwok abe wurik arum menggam oore'nggam o nggorek wurik kuli aap Utayi aput Palan nen ogobakkigirogo pit nage,

²⁶at eeke nogo panggombunuk, tu unggwogo menggam endage, Niyo enaame nen nok, oonegen lagi wage menggim pa'nggwe o abu nggorek wurik kuli Parot aput Peraya inom, Ala awi wurik me eeko menggaarak it inawi Open wonogwe inom, nen ogobakkigirogo pit nogwe,

²⁷ti eekwi nogo panggombunuk, o nggorek wurik nogome nen nok, o Open owa'nagat kuli it aap Tekowa mendek nogo nen ambinom ogobakkigirogo pugwi, eereegwaarak.

²⁸Tu unggwogo menggam endage, Kuda nen it Ala unde inalitak lombok inawi wurik enaame o pak wurik nogo ogobakkigirogo pit lagi nogwe,

²⁹it eekwi nogo panggombunuk, aap Imet aput Tarok nen at awi wurik enaame ogobakkigirogo pege, at eeke nogo panggombunuk, aap tu unggwogo menggam endage, Oonegen Lagi Wage Menggim arum menggerak aap Tekaniya aput Temaya nen ogobakkigirogo pege,

³⁰at eeke nogo panggombunuk, aap Telemiya aput Kananiya inom, aap Talap apuri 5 ndarak iigak ambi Kanun nogo inom, nen ogobakkigirogo pugwi, it eekwi nogo panggombunuk, aap Mberekiya aput Metulam nen at wonage menggim enaame ogobakkigirogo pege,

³¹at eeke nogo panggombunuk, aap yi mendek ndi mendek mbuti emas paga ogobakkigika ambi Malikiya nen tu unggwogo menggam endage, Malenggo Menggam enaame it aap Ala awi wurik me eeko menggaarak inom, it yi mendek ndi mendek kunggo menggaarak inom, inawi wurik me nen nok, pak wurik unggut irimbaga o mbuuluk wurik kuli ogobakkigirogo pit nage,

³²ndi, pak wurik unggut irimbaga o mbuuluk wurik nogo panggombunuk nok, tu unggwogo menggam endage, Ndomba nogo kuli ti, it aap mbuti emas paga yi mendek ndi mendek ogobakkigika inom, yi mendek ndi mendek kungga inom, nen ogobakkigirogo pit nogwe, eereegwaarak ti aret.