Read Western Dani Nekemiya 5 Bible Online

Nekemiya 5 - Western Dani bible

Nekemiya 5

¹Ti'nuk, peebi nen aap inom, it ando inakuwi inom, nen it Yakuri mendek inoweewi yorogwe nogo ineebi mba'nuk, inoone nggwok paga yogo logonet,

²it eegu nen, “Nit inom, ninapuri wologwe-komologwe inom, nineebe ambik aret me, nenok mban nineenik logorak me, gandum kwaakkolaawok lak,” yogwe,

³it eegu nen, “Mbi noogelo eyom paga gandum kunggolaawok nduk, gandum yarak inom, anggur yarak inom, ninawi wurik inom, wogorogo logonet, Peebi obaane'me wokkiragak kola wogo logowok nduk, wu wo'niraanip o,” yinuk, yorogwe,

⁴ndi, it ando nen, “Ninanggween wonogwe inom, nineyabu anggur yarak inom, Onggo ndogop pinip o, yinuk, aap ninowe endagembogut nen yereegerak nogo wogoriyak me, wu luulu ambi wo'niraanip o,” yorogo logonet,

⁵“Kit ninoreewi ninamiya mogonik aret wonogwe, ndi, nit ninapurilogwe ti, kit kinapurilogwe ndak-ndak aret wonogwe, eeko monggoorak kwe, ninawu lek kenok, ninapuri wologwe-komologwe aakumi inayeloman logowak nduk, inonggo mbanggologwe, ndi, ninapuri komologwe ando nogo ti, muk aap alik inayeloman ogogwaarak me, ninanggween inom, nineyabu anggur yarak inom, ti muk aakumi alik unde eeppiigoorak me, nineenggi awiirak aret ogoorik o,” yinuk, yogwe, eekwi nogo koneneegirak o.

⁶Inoone nggwok paga yogwe ti, naruk konengge nagagirik, nanini ambik agagirak.

⁷ Nanini nen it yogwe nogo niniki koonit nage nagagirik, it aap inengga warak ninoweewi inom, it o unde inom eeko menggaarak inom, yorage logonet, “Kit kinoreewi aret kwe, wu luulu wogorogo monggotak nogo, Oba lunogo inom wo'niraanip o, yorogwe ti, nonggop nduk, yorogo ogotik?” Yorage nagagirik, it eekwi ti, kooninabuwok nduk, aakumi inoweewi ti, apit aret kuwak eeri woroorak yoragagirak kuwak ari wogo mbareegwa,

⁸it nogo yorage logonet, “It aakumi alik mendek nen nit ninoreewi Yakuri mendek keele maageren piya nogogwaarak nogo nit nen wakkagak mban eeko logonet, wondet eerogo wogoren piya wogogurak kwe, an nen ambinom wondet eerogo piyaakit lak nonggop nduk, ambinom tebenogo piyoorak nduk, eeko ogotik?” Yorage mbareegi, wone onggo yo'niriyak meek aret me, inoone lek puk aret ogogwaarak.

⁹Puk aret ogo mbareegwa, an nen ambinom yorage logonet, “Kit eekwi ti, eeriyak lek mendek aret eeko ogotik! Yi aakumi ndi aakumi inambik ninawim nogo nen ninendage maluk eerogo pinanukwak, ninogoba Ala ninagabiti mbako logonet, eerit nogo logorak lek mbakop?

¹⁰It aakumi nen, Kinamendek luulu wo'niraanip o, yinuk, yo'nirogwe iinok, an togon, noreewi togon, nawuri ninom eeko menggaarak togon, nen wu inom, gandum inom, wogorogo monggoorak me, Oba lunogo inom wo'niraanip o, yorogwe nogo ambinom yorogo logorak mage o.

¹¹O yogondak aret inanggween inom, ineyabu anggur yarak inom, eyo tayitun yarak inom, inawi inom, inawu lek kenok, luulu unde eeppinagareegwaarak nogo obaane'me wogoraanip o. Ndi, wogorogo logonet, 100 wonage kenok ambiret oba lunogo wo'niraanip o, yorogogutak kira wogogwaarak wu inom, gandum inom, anggur amburu ngget toolak inom, wam amburu inom, abok aret obaane'me wogorogo logonip o.”

¹²Yorage mbareegi, it nen, “Wone yo'niragandak ti ndak-ndak, it inamendek obaane'me wogorogo logonet, Waganggotak oba lunogo wo'niraanip o, yinuk, yoraagun lek o.” Yogo mbareegwa, Ala unde woraawak nduk, wiiragagirak wogo mbareegwa, inenggaanom paga it aap inengga warak inoweewi nogo inom, it o unde inom eeko menggaarak nogo inom, eeko logorak yereegwaarak nogo ndak-ndak, kumbuk mbanuwak nduk, yorage mbareegi, “Eeko logowok o,” yinuk, wone kumbuk mbaneegwaarak.

¹³Kumbuk mbanggo mbareegwa, an nayum nggorek yungguk-pangguk eerak nogo, yumbuk-yumbuk eeke logonet yorage, “Aap ambi wone yegerak yi, ndak-ndak eeka'lek kenok, yum yungguk-pangguk eerak yumbuk-yumbuk eekirak ti kokwak, at Ala nen aap ti togop aret eeppege logonet, ame nen wumbege, anggween paga nen mugogo nappege, eerigin aret o.” Yorage mbareegi, it kuwak eeri wogogwaarak abok aret, “Abet aret yagan o,” yinuk, Aliku ALA alut eereegwaarak. Eeko nogogwaarik, wone yereegwaarak nogo ndak-ndak eeko nogogwaarak.

¹⁴Aap Aratakata nogo endagembogut wonage kagak tahun 19 eeppunuk ambi eerak nen nok, tahun 32 ari nage kagak, an o Yekura unde logokit nduk, mippaneegerak wonage neegak tahun 12 aret agagerak. Age kagak, aap o unde menggerak ake mbi punik nogo an inom, noreewi inom, nonggo logolik kwe,

¹⁵an o unde mippanega'lek kagak inaa'nduk o unde wonogogwaarak nogo nen it aakumi aaninggin-paaninggin inoba piigo logonet, “Mbi inom, anggur amburu toolak inom, wo'nira wogo logonet, wu mbuti perak aaninggin oolo wakkagak inom wo'nira wogo logonip o,” yinuk, yorogwe, ndi, inawuri kunduk, inoone omaawi paga yorogo logonet, tebenogo piigwi, eeko nogogwaarak kwe, an perak, Ala nagabiti mbake minggirak me, togop eeke logolik.

¹⁶An nogo, pak wuriyak ti mban niniki lunik logonet, nawuri ninom wurit nogo nogogurak me, nggween ambi kolage logolik mban.

¹⁷It aakumi Yakuri mendek inom, it aap o unde inom eeka inom, ineebe seratus lima puluh yi aakumi ndi aakumi ninaagan-ninambokan wonogwe inenggela'me nen niya wogogwaarak inom, abok aret mbi nengge minggim ninom kwi'na'nuk, nonggo nogogurak.

¹⁸Nonggo logonet, lembu ambit inom, kambin-ndomba amok warak 6 inom, towe-ayam inom, ne ambit noorak ninake pipuk eerogo pinanugwi, anggur amburu toolak ne aa'nduk nen nok, 10 kuli noorak ninake pipuk eerogo pinanugwi, eereegwaarak kwe, it aakumi aaninggin ambik inoba wonage me, “Aap o unde menggerak ndogop pogo logorak,” wone yugu nogo, “Nira wogo logonip o,” yinuk, an yorage logolik.

¹⁹“Ai, nogoba Ala o. An nen it aakumi yi, inake abok aret eerogo piigirak me, kat noba abeke logonet kale'nggen noba panege logot o,” yinuk, tamban eereegirak.