Read Western Dani Etet 4 Bible Online

Etet 4 - Western Dani bible

Etet 4

¹Wone agan nogwe nogo aap Morekayi aruk konengge nagagerik, iniki maluk a'nuk, ayum nibinogo patinuk, yum nibinik maluk mendek yikkolage, wun anobak paga yumbunogo pake, eeke nagagerik, oone nggwok paga leenggu maarit o kota nogome unggwi nage nagagerik,

²aap endagembogut ame tu unggwogo menggam ari nanuk, it aap inayum nibinik maluk mendek yirik kenok aap endagembogut wonage me unggwi noorak mage yugu me, ame unggwi noolik tungga paga taati puk agagerak.

³Ndi, aap endagembogut nen wone lengganogo wumbereegerak nogo yi o ndi o yorenet nogwe iinok, it aakumi Yakuri mendek abok aret inaruk konenggo nogogwaarik, iniki aaninggin nduguk yinuk, mbi nengga'lek inambe mage negen logonet, le yogwe, leenggu maakwi, it ando apit nen inayum nibinik mendek yippatinuk, wun paga nden-wan yogwe, eereegwaarak.

⁴Ndi, it Etet ndegengga kumi tawe nogo inom, aap inooli wogo inom, nogo nen aap Morekayi aago nogo, kwe Etet yori nogo mbareegwa, iniki maluk age nagagerik, at Morekayi ayum maluk mendek nogo mbo punuk, ngget mendek yikkolaawak nduk, yum nappiyareegerak kwe, at Morekayi nogo woolik mbo pereegerak.

⁵Mbo pege mbareegi, at Etet nen at ake eeke logowak nduk, endagembogut nen aap ooli wogo Katak mippereegerak nogo, wiireegerak wage mbareegi, yoge logonet, “Aap Morekayi ti, wone nano konembunuk, aago wonage nogo keenu arenok nduk, yori nak o,” yinuk, yoreegerak.

⁶Yoreegerak nage nagagerik, aap Morekayi nogo aap endagembogut awi o nggwok abe wurik unggwogo menggam enaame oore'nggam time wonage me, at Katak nogo ka nage mbareegi,

⁷Morekayi nen wone alom mbininogo yoge logonet, “Aap Kaman nen nit aakumi Yakuri mendek abok aret ninenggaawak lek eerogo pinaniyak koongge, ndi, it aap lek eerogo pinanugwi iinok, onggo wogoroorak wu mbuti perak aaninggin tiga ratus empat puluh lima ribu aap endagembogut awu kuwak eerak pogo menggam mambigin o, yinuk, koonogo pege, eekerak o,” yinuk, mbininogo yoge nagagerik,

⁸it aap Yakuri mendek lek eerogo piyoorak wone lengganogo liiru mbanogo o Tutan wumbereegerak nogo ambi at Morekayi nen aap Katak wogoge logonet, “Kat nen liiru mbanak yi, Etet titik ege logonet, wone inom liirogon mbininogo yoge keenok, aap endagembogut nen at Etet mendek nit ninabuwa mba'nuk, ninili yuwak nduk, at Etet nen yori ungguurak koone nabek togon yorumunggun o,” yinuk, yoreegerak.

⁹Yoge mbareegi, at Katak nen Morekayi wone yereegerak nogo wonok kwe Etet nogo mbininogo yori wagagerak.

¹⁰Yori wage mbareegi, at Etet nen aap Morekayi yori nawak nduk, Katak yoge logonet,

¹¹“It aap a, kumi a, wiiraga'lek kagak aap endagembogut awi wurik ko kole wone mbanggo menggam aken time at owagam unggwi nogwe iinok ti, Kambuurak aret o, yinuk, wone ambit ti aret koonak wonage me, it aap endagembogut inom eeko menggaarak inom, it aakumi at abu'me piige menggim yi o ndi o wonogwe inom, abok ineenu aret o. Togop kwe, aap endagembogut nogo nen owaanggun mbuti emas paga ogobakkigirik nogo titik irage kenok perak, kambugun lek ineenik logogun o. Togop aret me, at endagembogut owagam noorak wiinega'lek kagak nogo 30 yigirak me, nonggoti o?” yinuk, yoreegerak.

¹²Yoge mbareegi, kwe Etet yereegerak nogo at Katak nen wonok Morekayi yori nage mbareegi,

¹³at Morekayi nen wone eerogo Etet wonage me nappi wage logonet, “It aakumi Yakuri mendek eeppiigwi iigak, an perak, aap endagembogut nimbirak wonage me neebe op aret logogin, mbarugun o.

¹⁴Kat yori naga'lek puk mban wonage keenok, nit aakumi Yakuri mendek ninagap ndariyak nduk aap alik nen yeenggwa nira wogwe iigak, kat inom, kiriwi inom, kinenggaawak lek arumunggup o. Togop me, wone agaarak yi, kat nen aret kooniyak nduk, aap endagembogut akwe, kwe nggwok agandak kero!”

¹⁵Nappi wagagerak Etet yoge mbareegi, onggo agago aap Morekayi wonage me nappege logonet,

¹⁶“It aakumi Yakuri mendek o Tutan wonogwe nogo abok aret kuwak eeppiya nage logomenggendik, ko'lu-kii'me niyo inom, mbi inom, nengga'lek kinambe mage negen logonet, an nake tamban eekwi kiigak, nogo kenagan yumunggup o. Ti eekwi kiigak, an togon, it an ndegennako menggaarak kumi tawe togon, togop ndak-ndak aret eeko logogun o. Eeko logomonggoorik, wone yugu nogo an taganogo punuk, aap endagembogut owagam unggwi naminggirak me, Kambuwak o, yo'nugwi iinok ti, an kambuurak op aret o,” yinuk, wone eerogo nappereegerak.

¹⁷Ndi, kwe Etet wone eerogo nappereegerak nogo at Morekayi yoge mbareegi, at Morekayi nen ndak-ndak aret eeri nagagerak.