Read Western Dani Etet 8 Bible Online

Etet 8 - Western Dani bible

Etet 8

¹Ne ti paga aret aap Yakuri mendek inooriyak kooneegerak Kaman amindik-amendek abok aret at endagembogut Akatiwerot nen waganogo kwe nggwok Etet wogoreegerak. Ndi, at Etet nen, “Aap Morekayi ti, nogobaluk aret o,” yinuk, yoreegerak me, woraawak nduk, ayonggo pereegerak owagam wage mbareegi,

²aap endagembogut amberaarenggen paga amburu cap eekak eenggi oolo yirik aap Kaman yippereegerak nogo, wake logonet, waganeegerak me, nggoorogo aap Morekayi yippege mbareegi, at kwe Etet nen Kaman amindik-amendek nogo Morekayi unde logowak nduk, mippereegerak.

³Ti'nuk, at aap Agak mendek Kaman nen it Yakuri mendek eeppiyoorak maluk lombok koonogo pereegerak nogo, aap endagembogut nen lek eerogo puwak nduk, kwe Etet nogo ne ambi paga aap endagembogut abu'me tebe yi unggunuk, le ari wonage me,

⁴aap endagembogut nen waanggun mbuti emas paga ogobakkigirik nogo titik ege mbareegi, kwe Etet nogo mi'na'nuk, owagam panggo yi nanuk, yoge logonet,

⁵“An kayeloman nenegen neegak aakumi an mendek aaninggin inoba age, niriwi inookwi, eeriyak neebi me, kat eeriyak op mbake, nabuwa nomba'nuk wone yi kooniyak op aret kage, ndi, kiniki kunik ee'nake, eeke keenok, aap Agak mendek Kamerata aput Kaman nen aakumi Yakuri mendek yi o ndi o kendagembogut kabu'me piinok wonage nogo pup eerogo inooriyak nduk liiru mbanogo nappit nagagerak me, lek aruwak nduk, nogoba kat nen wone alik ambi koonogo liiru mbanogo wumbu o.”

⁷Yoge mbareegi, aap endagembogut Akatiwerot nen kwe nggwok Etet aap Yakuri mendek Morekayi imbirak yorage logonet, “Aap Kaman nogo it aakumi Yakuri mendek apit aret inooriyak nduk wone lengganeegerak paga Kaman enggaanok keele yilinogo pogo mbaka, amindik-amendek abok aret waganogo kat Etet wokkigirak o.

⁸Togop me, yi wone ndi wone an nendage paga liiru mbambunuk, namberaarenggen paga cap aago wonage kenok, lek eerogo puurak meek aret me, liiru ambi it Yakuri mendek eeppiyoorak kiniki koombunuk, op mbaniyak mbakwi nogo an nendage paga mbambunuk, namberaarenggen paga cap eerogo nappinip o,” yinuk, yoragagerak.

⁹Yorage mbareegi, o ne ti eyom paga tut Tiwan penenak tanggal 23 paga at Morekayi nen aap endagembogut ake liiru mbangga wiiragagerak wogo mbareegwa, liiru mbanuwak nduk, yorage logonet, “Tut 12 Arat penenak tanggal 13 paga it aakumi Yakuri mendek aap endagembogut Akatiwerot abu'me piige menggim yi o ndi o wonogwe abok aret, inawi yi kota ndi kota lombok kuwak eeppiinok wonogwe me, it aakumi inoone alik mendek ineegin warak nen a, aap endagembogut abu'me piige menggim o nenaarogo pereegim ambime ineegin warak nen a, it aap inom, kumi inom, wologwe-komologwe inom, inoori wogwe iinok, it Yakuri mendek nen pilak yinuk, inagap ndakkologo logonet, inoorogo piigwi, inenggaawak mondok lek eerogo piigwi, eeppiinok, inamindik-inamendek abok aret kugun waganggo logorak op aret o. Ndi, ne eeriyak yogoorak yi paga it Yakuri mendek nogo, inawim nen inookwi iinok, onggo inooriyak pipuk aago logowak nduk, Wone eeriyak lengganak yi aret o, yinuk, at endagembogut abu'me piige menggim yi o ndi o mippi(...)

¹⁴Wogorage mbareegi, it aap wone lengganak liiru mbanak wonok nogwe nogo aap endagembogut aguda paga kwi'na'nuk, “Aap endagembogut nen nappinani waga o,” yinuk, mbe agan yi o ndi o tumburiranet nogwe, aap endagembogut awi o nggwok abe wurik o Tutan nogome yorogwe, eereegwaarak.

¹⁵Eerit nogwe iigak, at aap Morekayi nogo aap inendagembogut inayum yiko menggaarak mendek enete kibu-kibu inom, yanggwi pogom inom, mbuti emas paga nggare-nggare kole mendaarak inom, kain yawenak maa'ngga kunik yum nggorek inom, yirik logonet aap endagembogut owagam nen wundi wagagerak. Wundi wage mbareegi, wone lengganak liiru mbanogo nappit nagagerak paga it aakumi o Tutan wonogwe abok aret inale'nggen nggwok mbareegwaarak.

¹⁶It aakumi Yakuri mendek nen iniki teyok ari, inale'nggen nggwok mbakwi, inale'nggen nen keekok yogwe, “Ninendage op agaarak me, iya,” yogwe, eereegwaarak.

¹⁷Wone lengganak liiru mbanak nogo yi o ndi o inom, yi kota ndi kota inom, aap endagembogut abu'me piige menggim abok aret mippit nogwe iinok, it aakumi Yakuri mendek iniki ale'nggen kani negen wunuk ari logonet, laago nggwok lako mbareegwa, it aakumi inanebunu alik mendek time wonogwe nogo apit aret aakumi Yakuri inayuk nen, “Nit kit mendek aruwi o,” yinuk, inom ogogwaarak.