Read Western Dani Wundeegwaarak 11 Bible Online

Wundeegwaarak 11 - Western Dani bible

Wundeegwaarak 11

¹Ti'nuk, at Aliku ALA nen Muta yoge, “Kit o Metit nen abet aret wumbinagawak nduk, an nen at Pirawun inom, it aakumi Metit mendek inom, aaninggin mendek ambit yi aret inoba piyaagin o. Ti abu aret eeppiige neenok, at Pirawun nogo nen kit o yime nen wundi namunggup nduk, teppinagagin o.

²Togop eerigin me, aakumi Iterali mendek aap inom, kumi inom, nogo nen it aakumi Metit inom menggaarak inamendek mbuti emas inom, perak inom, ogobakkigirik apit aret, Wo'niraanip o, yinuk, nggino yoraawak nduk, yoret o,” yoreegerak.

³“Yoret o,” yoreegerak nogo ti, at Aliku ALA nen Pirawun awuri inom wone koongga nogo inom, it aakumi Metit ugun mendek nogo inom, inamendek aakumi Iterali wogoraawak nduk, iniki yanggonogo piige, ndi, at Muta nogo, “Iya,” yinuk, ayuk wukwi, eeruwak nduk, eeppiyareegerak me nduk, “Yoret o,” yinuk, yoreegerak.

⁴Aliku ALA nen Muta togop yoge mbareegi, Muta nen Pirawun yoge, “At Aliku ALA nen ari logonet, Oonikiya yi paga an aakumi Metit mendek inenggela'me yime nege logonet,

⁵aap endagembogut kwi'nage menggim kwi'ndak menggerak at Pirawun apuluk manggu ndarak nen nok, aakumi inayeloman kumi gandum yigiko menggaarak inaagalogwe manggu ndarak kuli, it o Metit mendek inapuri manggu ndarak inendage warak inendage lek abok aret inom, inaanggumi iyaalok ndarak abok aret inom, inooke neenok kambit nagun o.

⁶Kambit namenggaarak paga it aakumi Metit mendek inoone nggwok paga leenggu maako logogun o. Leenggu maarugun nogo ti, inooka'lek kagak, inoorigin kagak, leenggu togop ambi maakulik mendek aret maarugun kwe,

⁷it aakumi Iterali wonogwe me perak, aakumi a, inaanggumi a, inabolok eekwi iinok, nggeewo nen ya'nggwak yogo logogun abu lek o, yinuk, yegerak o. Ti eeke kenok, Aliku ALA nen it aakumi Iterali mendek inom, aakumi Metit mendek inom, leenogo piinok, eeppiige menggerak, keenu arumunggun o.

⁸It kat kawuri kinom wone koongga nogo abok aret an nabu'me tebe yi woraanuk, inendobanggun yindumbunuk, an yo'nogo logonet, It aakumi mukkeren nugwi nogo kinom abok aret wogoren wundi nak o, yo'nugwi iinok, aret wundi nagin o,” yinuk, yoge nagagerik, Muta nogo etenggen aagi wu eerogo punuk, Pirawun teppunuk aret wundeegerak.

⁹Wungge mbareegi, Aliku ALA nen Muta yoge, “At Pirawun nen kat koone koneniyak, eebi, kombake me, an nen o Metit paga yime eerubok mendek eeke nogo abunuk ambinom eeke logogin o,” yinuk, yoreegerak.

¹⁰Ndi, it Muta Karun imbirak Pirawun enggaanom paga eerubok mendek abok aret eereegwaarak kwe, Aliku ALA nen iniki omaawi agago pereegerak me, Iterali mendek at abu'me piige menggim nen wundi nawak nduk teppiyoolik ogogumbuk aret wonagagerak.