Read Western Dani Wundeegwaarak 15 Bible Online

Wundeegwaarak 15 - Western Dani bible

Wundeegwaarak 15

¹ At Aliku ALA nen aakumi Metit mendek inooke mbareegi, alut eeruwak nduk at Muta aakumi Iterali mendek inom ndawi wareegwaarak nogo yi o. “Aliku ALA alut eeko logonet, Ndawi ambi tiyanikit o,” Ari nagagerik, tiyangge logonet, “Aliku ALA mondok tiyanak menggerak me, Kuda inom, aap amborowak paga kwi'ndak wogwe inom, Niyoome mbo mambiyareegerak o.

² At Aliku ALA ti, Nomaawi inom, nendawi inom, aret wonage o. At nen aret nagap ndareegerak o. At Aliku ti, nogoba Ala aret me, Alut eeke agaarik o. At ti, an nombomini inogoba Ala aret me, Endage tiyappege agaarik o.

³At Aliku ALA ti, Ogogumbuk kalu-kalu wim nambuka menggerak me, At endage ti, Aliku ALA aret o.

⁴Aap Pirawun awuri ineegin warak inom, Anggweendo inom, niyo inikime mbo mambiige, Pirawun awuri wim wone mbangga leenak wonogwe nogo, Yi nggwok Laut Merah inikime ndonggonogo piige, Eekerak o.

⁵Yi yenggenak alobok ambik me yobok togon wanggwi, Yugum niyoome tabuk yi wangge menggi kwak, Tabuk yi wanggwi, Eekaarak o.

⁶Kaliku ALA keenggi abe'nggan ti, Omaawi abu iya lombok menggerak me, Kaliku ALA keenggi abe'nggan paga nen kawim yigirik-noonom eerogo piigendak o.

⁷Kat abu tiyanak lombok logonet, It aakumi koone taganuwok nduk, mi'nagaarak nogo tebenogo piige, Ndi, nggubungga omoonuk ne ambit liingge kani nengge menggi kwak, Kanini inoba piige logonet, ne ambit lek eerogo piige, Eekendak o.

⁸Kambe aagi ambebubu negen wumbegendak paga niyo yenggenit lagangge, Yi nage menggim ti nage menggerak kwe, Waga'lek, yugum yagat wurik kwak nu'lek aret abo mbanogo pege, Ndi, yi kole yenggenit lagi wage nogo linogo pege, Eekendak o.

⁹It aap ninawim nen yogo logonet, Muguren nogo logomonggoorik, pippiinok, Ninobaloowi nggiginogo nineenggi paga woppunuk inookwi, Inamendek ndinogo tumbukkologwe, Eeko logomonggoorik, Ninanini nen eeppiyoorak mbakwi nogo tayok yigin o.

¹⁰Yereegwaarak kwe, Kat kambe pu egendak paga it niyo kole yenggenak inikime yobok togon wanggwi, Yugum niyoome tabuk yi wangge menggi kwak, It niyo mondok iya yenggenak me, tabuk yi wanggwi, Eekaarak o.

¹¹ Kat kikak nakeelik wonage keenok tiyappagagwi, Eerubok mendek eeke menggendak keenok, Wi, yinuk, kayuk wukwi, Eeko menggaarak me, Kat pogom ta wonage o? Yi kugi ndi kugi Kaliku ALA kat pogom ambi wonage abu lek aret o.

¹²Keenggi abe'nggan ngginogo nappege mbareegin, Nggween nen ninawim nogo ambeme yonggorinakerak o.

¹³It inagap ndarogo piigendak nogo, Inabuwa nen obeelom mban eeppiige logonet wogoren nage, Komaawi paga pigiren nggween abu obeelom punogo piyareeginom nogome piya nage, Eerumunggun o.

¹⁴Yi aakumi ndi aakumi inanebunu lombok abok aret konenggo logomenggaarik, inaganak wake, It Pilitin wonogo menggam wonogwe nogo inagabiti ambik mbakwi, It aap nagawan Erom mendek iniki ma'nage.

¹⁵Aap yo'nggok Mowap mendek inaganak nugirage, It Kanan mendek nogo iniki abu lek age, Eerugun o.

¹⁶Aakumi abok inaganak ndik-ndik irage logonet, Inagabolo nirik-kirik yogo logogun o. Keenggi omaawi paga it yugum oone lek pogom eerogo piigendak wonogwe iigak, Kapuri Iterali mendek iniki ugun nogwe, Kaliku ALA nen kapuri inagap ndarogo piigendak nogo, Iniki ugun iname logowam nogome unggwi nogwe, Eerugun o.

¹⁷Kat keyate kwak, kabuut leenogo pake, Kaliku ALA kat logowam ogobakkigirogo pake, Ndi, Kaliku ALA kendage alut eeko logowam Kat keenggi paga wukkolage, Eereeginom nogome aret, It kapuri Iterali mendek yi, Mondok-mondok inakom awi yarak logowak nduk, piya namunggun o.

¹⁸Piya nage logomenggendik, Kaliku ALA nen mondok-mondok inarum aret logomunggun o,” yinuk, Muta nen ndawi tiyaneegerak nogo ti aret.

¹⁹Aakumi Iterali nogo niyo nggwok yenggenak laut nogo nggween woloonak paga inaa'nduk wunda wogwe iigak kwe, at Pirawun aguda inom, anggweendo wim eeka inom, it aap nggweendo wonok nugu menggaarak inom, muguren wunda woraawok nduk, eeko mbareegwa, Aliku ALA nen niyo nogo lambunggage logonet, lebeninabeegerak kenok,

²⁰Karun awuluk Ala wone yoraga kwe Miriyam nogo nen togolowak eenggime wagangge nagagerik, oone lobale eeke kenok, it kumi apit aret kwirabok yogo logonet, at eeke ndak-ndak eekwi iigak,

²¹Miriyam nen, “At Aliku ALA alut eeke logonet, ndawi ambi tiyanikit o,” ari nagagerik, “Aliku ALA mondok tiyanak menggerak me, kuda inom, Kuda inamborowak paga kwi'ndak wogwe ineebe inom, Aliku ALA nen niyoome mbo mambiyareegerak o,” yinuk, ndawi tiyangge kagak, kumi nogo nen ndawi eebe aret wako nogogwaarak.

²²At Muta nen aakumi Iterali mendek nogo niyo nggwok Yenggenak Laut Merah paga nen o Tiyut karume time wogoren wage kagak, ne kenagan paga niyo nengga'lek aret

²³o Mara time unggwi wogo nogogwaarik, niyo ambi kogogwaarak kwe, ale ambik me, noorak meek kogogwaarak. Niyo ti ale ambik kenok, o ti endage Mara aret yogo nogogwaarak.

²⁴Niyo nogo ale ambik mbareegi, it aakumi Iterali mendek nogo Muta ineebi-ineeba yogo logonet, “Niyo lek me, nit nano nawi o?”

²⁵Yogwi iinok, Muta oone nabek togon at Aliku ALA yoge mbareegi, Aliku ALA nen eyo mbanak ambi Muta titik ege mbareegi, waganogo niyoome namburogo mambereegerak paga niyo nogo ombat obeelom age mbareegi, nunggugwaarak. O time Aliku ALA nen it Iterali nogo mondok-mondok eeko logowak nduk, wone lengganogo yorage, eeko logorak wone nogo koonogo piige, inabut mbangge, eereegerak.

²⁶Eeke logonet, “Kit nen Naliku kinogoba Ala noone yokkirage neenok, liirogon aret konembunuk, nenggaanom paga li'lak obeelom mban eekwi, Yogop ee'nu ndogop ee'nu, yinuk, yokkirage nogo liippugwi, yi wone ndi wone lengganogo yokkirage nogo mondok-mondok porogo wonogwe, eekwi kiinok, aakumi Metit mendek andi-pandi eeppiyareegirak nogo pogom ambi eeppinagage logogin lek o. Naliku ALA nen obeelom eerogo pinagage minggirak nogo ti, an aret o,” yinuk, yoragagerak.

²⁷Yorage mbareegi, it nogo o Elim niyo nggween kabunik 12 inom, eyo nggabu 70 inom, wonage me nogome ari wogo nogogwaarik, niyo nggween kabunik ambet paga taati aret inawooliya wukko'net nogogwaarak.