Read Western Dani Wundeegwaarak 16 Bible Online

Wundeegwaarak 16 - Western Dani bible

Wundeegwaarak 16

¹Ti'nuk, it aakumi Iterali kuwak aago nogo abok aret o Elim nen wogo nogogwaarik, puut Tinayi aru nakkagak, o Elim ogwe nakkagak, oolo karume Tin taati ari wogogwaarak. O Metit nen wundi wogo nogogwaarik, karume Tin taati ari wogogwaarak nogo ti, tut ambi penembunuk, ambiret penenak tanggal 15 paga ari wogogwaarak.

²Karume time ari wa'nuk logonet, it aakumi Iterali kuwak aago nogo abok nen Muta Karun imbirak ineebi-ineeba eerogo piigo logonet,

³“Nit o Metit time logonet, ninaanggo larak noorak nduk, ninggirik wonogwe, oroti ndonggok togon nunggwi, eeko logonet, Aliku ALA nen ambi eeppinanege kenok, kambuwok lak, nit Iterali kuwak aago yi, mbi abu nen o karume yime kambuwok nduk wo'niren pinani wogotak nineebi a!”

⁴ Yorogo mbareegwa, at Aliku ALA nen Muta yoge, “It aakumi Iterali yi, Yogop ee'nu ndogop ee'nu, yorage neenok, liirogon mugurok nogwe iyaamun ilik, lek a? Inabut mbanikit nduk, mbi oroti mbogut paga nen o mayu wage menggi kwak wuppinagi woraagin me, kit aakumi apit aret wundi nogo logomonggotik, kinalitik-kinalitak o ambit weege paga noorak kinikilom mbakwi mban anebenggolaamunggup o.

⁵Ndi, nogo 5 yinuk, ko'lu paga kuwak eerogo kiname pi woroorak nogo ti, ne mbere noorak ake mban kuwak eerogo pati woraamunggup o,” yinuk, yoreegerak.

⁶Yoge mbareegi, Muta Karun imbirak nen it aakumi Iterali apit aret yorogwe, “Nit ta me nduk, kineebi-kineeba yo'nirogo ogotik? Nit we at yo'nirage konembunuk mban eeko monggoorak kagak kinanini agaket yo'nirogotak nogo Ala muk konenggerak me, yogondak kiyoma yi paga o Metit nen wokkiren wundi wagagerak, At Aliku ALA aret kagi, yinuk, kineenu ogwe, ndi, o ko'lu kuubondendok Aliku ALA alik tiyanak lombok menggerak eeke nogo kinigen kogwe, eerumunggup o.”

⁸Yorage nagagerik, ambinom yorage logonet, “Kit nen kineebi-kineeba yo'nirogotak nogo ti, nit yo'nirogotak lek o. Ata, Aliku ALA aret yogotak aruk konenggerak me, o kiyoma enggaanggum mendek ambi namunggup nduk, wokkirage, ndi, o kuubondendok mbi ndonggorogon namunggup nduk, wokkirage, eeke ti paga kit abok aret, At Aliku ALA nen aret wo'nirage kagi, yinuk, kineenu arumunggup o.”

⁹Yorogo nogogwaarik, at Muta nen Karun yoge, “It aakumi Iterali kuwak aago abok aret ineebi-ineeba yagaarak nogo Aliku ALA aruk konenggerak me, at owagam woraawak nduk yoret o.”

¹⁰Yoge mbareegi, at Karun nen aakumi Iterali kuwak aago abok aret wone awo yorage kagak, it nogo ina karume na'nogo nogogwaarik, ndugwi enggela'me nen Aliku ALA abinak pindanggage kogogwaarak.

¹¹Kogo mbareegwa, Aliku ALA nen Muta yoge, “It Iterali inanini agaket yogwe nogo an naruk konenggirak me, kat nen it yorage logonet, Kiyoma paga enggaanggum mendek nunggwi, ndi, kuubondendok paga mbi ndonggok togon nunggwi, eeko logomenggaarik, Naliku inogoba Ala an aret ineenu arugun, yegerak, yoret o,” yinuk, yoreegerak.

¹³Yoge mbareegi, o kiyoma ti eyom paga aret towe nggimabut apit aret wambit wogo nogogwaarik, inawooliya wurik enaagan-ambokan nggween etenggen kuuri'lek eeppunuk, wonogogwaarak. Ndi, ko'lu kuubondendok inawooliya wurik nogo enaagan-ambokan konaananggen luurogo pereegerak.

¹⁴Konaananggen luurogo pereegerak nogo lek age kagak, obaane'me kumulinggen negen o karume time nggween paga ndoonogo pereegerak inigen kogogwaarak.

¹⁵ Kogo nogogwaarik, it mban-mban yogo logonet, “Nineenggo'lek mendek yi, nano mendek mbakop?” Agan nogo mbareegwa, at Muta nen it yorage, “Ti kit kinambi nonggo logomunggup nduk, at Aliku ALA nen wokkiragaarak o.

¹⁶Aliku ALA nen, It aakumi inalitak lombok inambi nonggo menggaarak ndak-ndak yonggokkologo logonet, inawooliyana wonogwe nogo aap ambit ake togolowak 2 liter yonggologo iname ko'nok pati ungguwak, yegerak o,” yinuk, yoragagerak.

¹⁷Yorage mbareegi, it aakumi Iterali nogo nen wone yoragagerak nogo ndak-ndak aret it ando nggwok aret yonggokkologwe, it ando mbuuluk mban aret yonggokkologwe, eereegwaarak.

¹⁸ Togolowak wakkagak ndak-ndak mban yonggokkologogwaarak me, nggwok yonggokkologogwaarak nogo ambik age, ndi, mbuuluk yonggokkologogwaarak nogo lek age, eerulik noorak ndak-ndak aret agagerak kogogwaarak.

¹⁹Ti'nuk, at Muta nen ambinom yorage, “Ti yonggokkologotak nogo ko'lu noorak eegu ambi puurak mage o.”

²⁰Yoragagerak kagak, it ando nen Muta oone taganogo punuk, eegu ko'lu nawok nduk, pateegwaarak me, ko'lu pekkogo nogogwaarik, anggolenggen pereegerak obari ndi wuke mbareegi, at Muta nen it nogo mberiragagerak.

²¹Netik-netak kuubondendok paga mban it aakumi tigitogon it nonggo menggaarak ndak-ndak yonggokkologo nogogwaarak kwe, mo pi wagaatak aganggen nen lek age kenok, yonggokkolaga'lek aret wonogogwaarak.

²²Nogo 5 yinuk, ko'lu nogo paga mbi nogo, ne mbere noorak ake aret inalitak lombok togolowak 4 liter kuwak eeko mbareegwa, aap yo'nggok nogo nen it aakumi eereegwaarak nogo wone wonok Muta yori wogogwaarak.

²³ Yori wogo mbareegwa, at Muta nen it yorage, “At Aliku ALA nen ari logonet, O ko'lu ti, yabu eeka'lek yonggonggologo logonet, an mban nalut eeko logorak nduk, nake leenogo pateegirak me, yogondak mban inambi worakkoloorak inikilom mbakwi kenok worakkologwe, ndi, lakkoloorak inikilom mbakwi kenok lakkologwe, eeppunuk, nonggo logonet, eegu kenok ko'lu noorak ake teppatuwak, yegerak o,” yinuk, yoragagerak.

²⁴Yorage mbareegi, Muta nen yoragagerak nogo ndak-ndak aret mbi eegu ko'lu noorak ake pateegwaarak nogo obari age, anggolenggen pege, eerulik obeelom aret mbareegi,

²⁵at Muta nen, “Ne yogondak yi paga ti, at Aliku ALA alut eeko logonet, yonggonggoloorak me, mbi endekem kwaari namonggotak kwe, lek aret kaamunggup me, yi mban aret nonggo logonip o.

²⁶Ne 6 paga ti, kinambi op aret kuwak eekkologo logorak kwe, ne 7 yi paga ti, Aliku ALA alut eeko logonet, yonggonggologo logorak me, ne yi eyom paga mbi nogo lek aret kaamunggup o.”

²⁷Togop aret yoragagerak kagak, it aakumi ando nen perak, anebenggola wundeegwaarak kwe, mbi eebe lek aret kogogwaarak.

²⁸Lek aret kogo mbareegwa, Aliku ALA nen Muta yoge, “An nen, Yogop ee'nu ndogop ee'nu, wone yugu inom, wone lengganogo yokkirage inom, Nineebi o, yinuk, eeka'lek kiigak, ne mande logomunggup o?

²⁹Naliku an ALA nen nogo 6 yinuk, ko'lu paga kit yonggonggologo logonet, nalut eeko logomunggup nduk, wokkiragagirak me, Ne 6 paga ti, mbi ne mbere noorak ake wo'nirage logogin o, yinuk, liippogo logonet, ko'lu ti paga kit ambit nen endekem wundi naga'lek kiname mban aret puk logomunggup o.”

³⁰Yorage mbareegi, it aakumi Iterali nogo 6 yippunuk, ko'lu paga yabu eeka'lek tat yonggonggologo nogogwaarak.

³¹ Ndi, mbi nogo ti, eebe abu laambu kumulinggen kokwak, ndi, ombat ti, nggiin amburu paga kuwe worarak ombat tele kokwak me, it aakumi Iterali nogo nen endage, “Mana o,” yinuk, tooneegwaarak.

³²Ndi, at Muta nen it yorage, “At Aliku ALA nen ari logonet, Mbi ti, peebi it inapuri ndaganabemenggaarak nogo nen inigen kogo logonet, Mbi yi ti, Aliku ALA nen maan ninombomini o Metit nen wogoren wundi wage nagagerik, karume wogoren wage logonet, inambi wogoragagerak nogo yi aret o, yinuk, yogo logowak nduk, togolowak ambi yonggologo puwak, yegerak o,” yinuk, yoragagerak.

³³ Yorage nagagerik, Muta nen Karun yoge logonet, “Togolowak ambi wagangge logomenggendik, mbi nogo 2 liter wakkagak yonggoppunuk, ninombowologwe ineenu aruwak nduk, inake Aliku ALA enggaanom paga leenogo punu o.”

³⁴Aliku ALA nen Muta yoreegerak nogo ndak-ndak at Karun nen yonggologo punuk, waganogo Ala aloobut mbanuwam enaame time liirogon logowak nduk, pereegwaarak.

³⁵ Ndi, it aakumi Iterali tahun 40 eeke kagak mbi mana mban nenet o Kanan aakumi wonogwe kuli paga aret ari wogogwaarak.

³⁶Togolowak wakkagak endagegomer nogo ti, 2 liter yonggolak negen aret. Ndi, togolowak wakkagak endage efa nogo ti, 20 liter yonggolak negen aret me, 10 gomer ti, 1 efa aret.