Read Western Dani Wundeegwaarak 19 Bible Online

Wundeegwaarak 19 - Western Dani bible

Wundeegwaarak 19

¹It aakumi Iterali o Metit nen wundi wogo nogogwaarik, o Arapirim kagak, o karume Tinayi ari wogogwaarak nogo ti, tut mbere penembunuk, ambi penenak tanggal 1 paga aret wogo nogogwaarik, puut Tinayi abu'me time aret inawooliya wukkologogwaarak.

³Inawooliya wuppatinuk wonogwe iigak, at Muta nogo Ala imbirak wone mbaniyak nduk, puut Tinayi paga lagangge mbareegi, at Aliku ALA nogo puut paga nen Muta yoge logonet, “Yakup apuri wiganak it Iterali mendek nogo yogop yoret o.

⁴An nen it aakumi Metit mendek eerogo piyareegirak nogo inom, ndi, towe wu aagaluk a'naabit paga kwippunuk, wonok nage menggi kwak an nen nonggop negen agago inaani wogoren yime piya wagarak nogo inom, ti muk neegaarak o.

⁵ Yogondak it nen an noone liirogon konembunuk eekwi, ndi, wone abuk nggaruk togon yereegurak nogo nggirik-nggerok eerogo pipporogo wonogwe, eekwi iinok, aakumi inanebunu lombok iigak, it mban namendek niniki kundugu kwak, an napuri togop aret logogun o. Yi awi ndi awi abok aret ti, an unde minggirak namendek aret kwe,

⁶ it mban an inowe nendagembogut nabu'me logonet, neebe unde logowak nduk, miirogo piige, an napuri maluk eeka'lek nake leenak logowak nduk leenogo piige, eerigin me, wone yi abok aret aakumi Iterali mendek yora wambu o,” yinuk, yoreegerak.

⁷Yoge mbareegi, at Muta nogo wambi wage nagagerik, it aap yo'nggok kero mban wiiragagerak wogo mbareegwa, at Aliku ALA nen, “Ndogop yoret o,” yoreegerak wone nogo abok liirogon aret mbininogo yoragagerak.

⁸Yorage mbareegi, it abok nen, “Aliku ALA nen wone yo'niragaarak ti, nit mondok liippunuk abok aret eeko logowok o,” yogo mbareegwa, at Muta nogo nen wone yereegwaarak nogo wonok Aliku ALA yori laganeegerak.

⁹Yori lagangge mbareegi, at Aliku ALA nen Muta yoge, “An wone nimbirak mbanggwi nogo it aakumi Iterali nen inaruk konembunuk, koone yorage nogo mondok-mondok abet mbako logowak nduk, an ameraakot apit aago enggela'me keya wambi woraagin o,” yinuk, yoge mbareegi, at Muta nen it aakumi Iterali yereegwaarak nogo Aliku ALA yoreegerak.

¹⁰Yoge mbareegi, at Aliku ALA nen Muta ambinom yoge logonet, “Naliku an ALA nogo, nogo mbere yippunuk, ko'lu aakumi Iterali abok inenggaanom puut Tinayi yi paga wambi woraagin me, it aakumi o yogondak inom, ko'lu inom, iniki kikak naka'lek an nake leenogo pakwi, inayum koorogo pakwi, eeppunuk, abu pipuk eerak logowak nduk, yorage logomenggendik,

¹² puut yi, yengget-wangget kuli punuk, it aakumi yorage logonet, Puut yi mbaangga wogwe iinok, mondok kambugun aret me, puut yi paga lagi wogwe, iniyok mbaanggogwe, eeriyak mondok mage o.

¹³Wam a, aakumi a, puut yi mbaangga wogwe iinok, ineenik teppiiga'lek mondok-mondok kambuwak nduk yugum paga ilik, yigin paga a, inooko logonet, ineebe mbaaniyoorak mage o. Trompet oone pu nabenak mban ari kenok perak, aakumi puut yi paga lagi woroorak op aret, yegerak o, yinuk, yora wambu o.”

¹⁴Yoge mbareegi, Muta nogo puut paga nen wambi wage nagagerik, aakumi nogo kikak naka'lek Ala ake leenak logowak nduk, yorage mbareegi, inayum mondok mbu'mbap koorogo pako mbareegwa, Muta nen ambinom yorage logonet,

¹⁵“Ko'lukwak ti paga ambi eerigin me, kinakuwi ambi piginaka'lek we mondok pipuk aago mban logomunggup o,” yinuk, yoragagerak.

¹⁶ Yorage nagagerik, wonogwe me, nogo mbere yinuk, ko'lu kuubondendok paga o ngguurubu eeke, o yabok eeke, puut nogo paga tit kunogo pege, eeke logonet, trompet oone nggwok lombok pu eeke mbareegi, it aakumi inawooliyana wonogogwaarak nogo abok aret inagabiti nen inaganak wareegerak.

¹⁷Inaganak wake kagak, Muta nen it aakumi nogo Ala inigen kaawak nduk, inawooliyana nen wogoren puut abu'me time piya nagagerak mi'ndak wonogwe iigak,

¹⁸at Aliku ALA nogo kani omoonuk wunuk ari enggela'me puut Tinayi nogo paga wambi wage mbareegi, puut nogo paga yugum yugu ka'luk negen yonggo-ndonggo lagangge logonet, puut nogo paga ka'luk penggaarogo pege, puut nogo na'ndo-wa'ndo eeke,

¹⁹eeke kagak, enggela'me trompet oone mbuuluk eerit-eerit nggwok lombok eeke kagak, at Muta nogo Ala yoge mbareegi, Ala nen wone onggo ngguurubu eeke paga yoreegerak.

²⁰Yoge nagagerik, Aliku ALA nogo puut Tinayi kirin ti paga wambi woraanuk, at Muta puut ti paga lagi nawak nduk wiireegerak lagi nage mbareegi,

²¹Aliku ALA nen Muta yoge logonet, “It aakumi ti, Naliku ALA pe'neyoorak nduk inoone omaawi paga kuli pugu kagak obaga mbo wogwe iinok, kambukwak me, kat nen, Mage, yorage,

²²ndi, it aap an neebe unde ti, it inom maluk eeppiige neyo, ineebe an nake leenogo paninuk iniki kikak naka'lek logonet mban Naliku ALA neya wogwe, eeko logowak nduk, yora wambi nak o.”

²³Yoge mbareegi, at Muta nen Aliku ALA yoge, “Puut yi ti, an nabuut leenak magame me, yinuk, enaagan-ambokan yengget-wangget kuli pu o, yo'niragandak muk nineenu me, puut yi paga aakumi ambi lagi woraagun lek aret o.”

²⁴Yoge mbareegi, Aliku ALA nen Muta yoge, “Kat ogu wambi nage logomenggendik, it aap Ala unde inom, aap ugun inom, Aliku ALA pekkoorak o, yinuk, inoone omaawi paga kuli pugu kagak obaga mbo lagi wogwe iinok, an maluk eeppiyaagin me, lagi woraagwaarik o. Ata, at Karun alik perak, kimbirak aret lagi woraanok nduk, wambi nak o.”

²⁵Yoge mbareegi, Muta nogo wambi wage nagagerik, Aliku ALA nen wone yoreegerak nogo it aakumi Iterali li'lak mbininogo yoragagerak.