Read Western Dani Wundeegwaarak 2 Bible Online

Wundeegwaarak 2 - Western Dani bible

Wundeegwaarak 2

¹Ne ti eyom paga aap anebunu Lewi mendek ambi nen kwe Lewi mendek mban aret waganeegerak me,

² kwe nogo abila age nagagerik, aagaluk aap aret ndareegerak. Elege nda'nagagerak nogo etenggen abu obeelom aret kage nagagerik, kumaappereegerak kagak tut kenagan peneneegerak.

³Tut kenagan penengge mbareegi, elege nogo ambinom kumaapporogo logorak meek age kenok, agalo nogo nen mbereewak ambi muun negen yonggon-yonggon yappunuk, niyo unggwage kero mut amburu negen aspal paga endekem-akem mbenangge nagagerik, elege nogo nogome yonggoppunuk, wonok niyo Nin aa'nggi paga mbereewa'na time kumaappi nagagerak.

⁴Kumaappege mbareegi, “Elege ti, nonggop age kaamun?” yinuk, oweeluk kolaga nogo tayorogon taati mi'ndak enegen wonagagerak.

⁵Mi'ndak wonage kagak, Pirawun apuluk kolaga ngguu'mo warikit nduk, niyo Nin aa'nggi paga nage nagagerik, ayeloman mini at ndegengga nogo niyo aa'nggi paga ugun nugwi iigak, kolaga nogo muun yarak mbereewa'na pugu enegen kage nagagerik, at ayeloman kolaga ambi, “Wa nak o,” yoreegerak wonok wage mbareegi,

⁶abiringga kuurogo pekkage nagagerik, elege nogo le ari mbareegi, “Elege yi, Iberani mendek inapuluk abet aret kagi,” yinuk, abuwa mbareegerak.

⁷Abuwa mbake wonage me, at elege oweeluk nogo koorok panggo yi wage nagagerik, Pirawun apuluk kolaga nogo yoge logonet, “Elege yi, elak kunuwak nduk, kumi Iberani mendek ambi yora noorak op mbaken ilik?”

⁸Yoge mbareegi, Pirawun apuluk nogo nen, “Op aret o.” Yoge mbareegi, kolaga nogo nen elege agalo nogo wiiri nagagerak wage mbareegi,

⁹Pirawun apuluk nogo nen yoge logonet, “Wulaga yi, wagangge logomenggendik, an nake kelak paga tawe eerogo wo'niri wage keenok, an nen onggo wokkirigin o,” yinuk, wogoge mbareegi, elege nogo wonok nage nagagerik, tawe eereegerak.

¹⁰ Tawe eeke nagagerik, wonok Pirawun apuluk kolaga nogo wogori wage mbareegi, at aagaluk negen eekkolage nagagerik, “Wulaga yi, niyoome nen waganggirak me, endage Muta aret o,” yinuk, tooneegerak.

¹¹ Ti'nuk, peebi nen at Muta nogo tawe age nagagerik, ne ambi paga it aap Metit mendek nen at oreewi yabu liirit-laarit eeruwak nduk yorogwe me nogome enegen pegiya nage nagagerik, aap Metit mendek ambi nen at oreewi Iberani mendek ambi wake kagagerak.

¹²Kage nagagerik, aakumi ambi wonogwe iyo nduk, enegen agi-ogu eereegerak mendek, lek mbareegi, aap Metit mendek nogo warogo pege nagagerik, eebe nogo waganogo mbini enggela'me kumaappereegerak.

¹³Ti'nuk, ko'lu at Muta nogo ambinom wundi nanuk, aap Iberani mendek ambi ore imbirak ndugwi pugwi iige nagagerik, Muta nen aap yawi pigaganeegerak alom nogo yoge logonet, “Kat nonggop nduk kore yawi wake agandik?”

¹⁴Yoge mbareegi, at aap nogo nen Muta yoge, “Ninarum logonet ninowak loongge logorak ta nen mippagagerak? Kat aap Metit mendek wakendak nogo kokwak an nooriyak nduk yagan ya?” Yoge mbareegi, Muta nogo agabiti age nagagerik, iniki mbake logonet, “An eekirak nogo abok aret ineenu agaarak kagi,” mbareegerak.

¹⁵ Ti eereegerak nogo Pirawun konengge nagagerik, Muta warikit nduk, eeke kagak, Muta nogo kole mbaganit o Miriyan wage nagagerik, niyo tooko menggam nggween kabunik ambet paga time kwi'nagagerak.

¹⁶Aap Ala unde ambi Miriyan mendek apurilogwe komologwe ineebe 7 wonogogwaarak. It komologwe nogo nen inogoba aanggumi kambin-ndomba inagi toologo eyo nenaarak paga kilirogo wogoroorak nduk, niyo tooko menggam nogome wogoren wogogwaarak me,

¹⁷it aap ndomba unde menggaarak ando nen wogo nogogwaarik, komologwe nogo mugogo nappiigo mbareegwa, at Muta nogo taati kwi'ndak wonage me, mi'nage nagagerik, “Togop eeriyak mage o,” yinuk, komologwe nogo yeenggwaarage logonet, inaanggumi kambin-ndomba nogo inagi noorak nduk tooriragagerak.

¹⁸Toorirage mbareegi, komologwe nogo mbet-mbet aret inogoba Erekuwen wonage me ka nogo mbareegwa, inogoba nogo nen it yorage, “Mbet-mbet waga'lek kiige minggirak kwe, ne yogondak nonggop eeko nogotik, mbet-mbet aret wogop?”

¹⁹Yorage mbareegi, it komologwe nogo nen inogoba nogo yogwi, “Lek o. Aap Metit mendek ambi nen wage nagaarik, it aap kambin-ndomba ndegeninaka nogo peebi eeppiinok, at aap nogo aa'nduk age nagaarik, niyo toologo ninaanggumi kambin-ndomba wogorage mbaki, mbet-mbet aret wogo o.”

²⁰Yogo mbareegwa, inogoba nogo nen komologwe nogo yorage logonet, “At eebe ngge? Nonggop nduk mbo punuk wogotak? Ninom mbi nawok nduk, Omok, yori nanip o.” Yorage mbareegi, yori wogogwaarak.

²¹Yori wogogwaarak nage nagagerik, “Ninom yime ye mbanggoloorak op o,” mba'nuk, inom wonage me aap Yitoro nogo nen apuluk kolaga Tipora nogo Muta akwe kolaawak nduk wogoreegerak.

²²Wogoge mbareegi, kwe Tipora nogo aagaluk aap aret ndake mbareegi, at Muta nen ari logonet, “An aap nggiru nen inambik inanggween paga ari wa'nuk logonet, napuluk yi ndakirak me,” yinuk, apuluk endage Nggeroton aret tooneegerak.

²³Peebi tahun ambik eeppunuk, aap endagembogut Metit mendek nogo kambeegerak kwe, kagak aret it aakumi Iterali nogo inayeloman eerogo piinok, yabu aaninggin-paaninggin agago piigo mbareegwa, inoone nggwok paga, “Aakumi inayeloman eerogo pinaninuk, ee'ninakwi yi, iyet o,” yinuk, Ala yoreegwaarak.

²⁴ Ndi, inoone inabuwa nggo-nggo yogwi nogo Ala aruk konengge nagagerik, aap Abarakam inom, Itak inom, Yakup inom, wone abuk nggaruk togon inom mbaneegwaarak nogo abereegerak.

²⁵Abeke nagagerik, it aakumi Iterali inoba aaninggin-paaninggin eerogo piigwi nogo at Ala nen enegen iige nagagerik, “Yeenggwaaraakit,” mbareegerak.