Read Western Dani Wundeegwaarak 21 Bible Online

Wundeegwaarak 21 - Western Dani bible

Wundeegwaarak 21

¹Yoge nagagerik, wone ambinom Muta yoge logonet, “It Iterali nen eeko logorak wone lengganogo yora noorak yi aret o.

² It Iberani mendek nen inayeloman logowak nduk, ambi kuninakwi iinok, inake yabu eekwi iigak, tahun 6 eeppunuk ambi eeke paga wondet agago piigo logonet, Kunggakirak onggo wo'niru, yoriyak lek we aret wumbiigo logowak o.

³Akwe lek nen inayeloman logomenggerak kenok, alik aret wundi nage, ndi, akwe warak nen inayeloman logomenggerak kenok ti, akwe imbirak aret wundi nogwe, eeruwak o.

⁴Ndi, alik wonage kenok, ogoba nen akwe wogoremenggerak imbirak logonet, apurilogwe kumi-aap ndaganabemenggerak kenok, kwe aagalogwe inom nogo ti, inogoba nogo apuri aret aremenggerak me, inom wonogwe iigak, aap nogo mban alik wundi nawak o.

⁵Togop aret wondet agago teppemenggerak kwe, at ayeloman nogo nen ogoba yoge logonet, Kat nogoba inom, nakwe-napurilogwe inom, niniki kunik aret wonage me, wondet aago nege logorak ti, neebi o, ari kenok,

⁶at ogoba nogo nen ayeloman nogo wonok Ala awi wurik me pi nage logomenggerik, tungga paga ilik, tu yinik ambe paga a, mippunuk, Mondok-mondok nayeloman logomunggun o, yinuk, aruk pelenogo puwak o.

⁷Ndi, aap ambi nen aap alik ambi yoge logonet, Napuluk kolaga yi, kayeloman logowak nduk, kunggolet o, yoge kenok, aap nogo nen kunggolage logomenggerik, ti'nuk, Nimbirak logorak, eebi mbake kenok, it aakumi inayeloman aap kenok wondet aago nugu logowak nduk teppiigwi ti kokwak eeriyak lek o. Ata, awo miirogo kunggolage logonet, Ndogop eeko logowok o, yinuk, kunggolegerak nogo ndak-ndak eerulik me, aap inambik kunggolaawak nduk, wogoriyak mage o. Ata, at ogoba ndareegerak unde nen aap nogo amendek awi yakkage kenok, kolaga nogo ogoba imbirak aret logowak o.

⁹Ndi, aap ti nen, kolaga nogo apuluk wogoriyak mbake kenok, at apuri komologwe inaani piirogo menggi kwak aret porogo logowak o.

¹⁰Ti'nuk, apuluk nogo kwe alik ambi wagangge kenok, akwe aa'nduk kolamenggerak nogo mbo puurak mage o. Ata, ambi noorak inom, ayum inom, wogoge logonet, imbirak nogo yege logowak o.

¹¹Togop eeppega'lek kenok, kwe onggo pegerak nogo awi yakkaga'lek we aret ogoba ka nawak nduk, teppuwak o,” yinuk, yoraawak nduk, yoreegerak.

¹² Yoge nagagerik, wone ambinom yoraawak nduk, yoge logonet, “Aap ambi nen aap ambi waremenggerak kangge kenok, onggo at aret warogo puwak o.

¹³ Ndi, iniki nen, Aap ti warikit, mbaka'lek kagak, imbirak nage me, ambi oba aremenggerak paga kangge kenok, aap ti nen, Ala nen koonggerak paga aga o, yinuk, mbaganit agap ndarak logowam titik ege neenok, time aret nawak o.

¹⁴Ndi, aap ambi nen aap ambi, Warikit o, yinuk, iniki koombunuk waremenggerak kangge kenok, An nookwi iyo, yinuk, kole mbaganit an nake warogo kani kunggo menggam time ari namenggerak kagak kwe, nggiginogo wumbunuk, kambuwak nduk, mondok warogo puwak o.

¹⁵Aap ambi nen at agalo a, ogoba a, wake kenok, onggo aap ti kambuwak nduk mondok warogo puwak o.

¹⁶ Aap ambi nen aap alik ambi kote kumaake logomenggerik, aap alik ambi inoba onggo mbanggolage a, eebe ame kumaappatogo wonage a, eeke kenok, aap kumaaremenggerak ti, kambuwak nduk mondok warogo puwak o.

¹⁷ Aap ambi nen agalo-ogoba kugi pulunogo piige kenok, aap ti kambuwak nduk mondok warogo puwak o.

¹⁸Aap ambi nen aap ambi imbirak ndugwi pogo logonet, yugum paga a, eenggi lingginik paga a, waremenggerak kangga'lek andi yagan wake oome logomenggerik, ti'nuk,

¹⁹mi'na'nuk, waanggun luk endekem nege kenok, waremenggerak onggo wariyak mage o. Ata, andi logonet, yabu eeke logolik onggo inom, at obeelom eeppugwi iigak onggo wogoroorak nogo inom, ti mban wogoruwak o.

²⁰Aap ambi nen at ayeloman kwe a, aap a, yawi waremenggerak paga mondok kangge kenok, onggo aaninggin mendek oba puwak o.

²¹Ndi, ayeloman waremenggerak nogo, ne mbere a, kenagan a, andi lek a'nuk, nege menggi kwak nege kenok, ogoba awu paga onggo kunggolegerak at unde aret me, onggo puurak lek o.

²²Aap ambi nen aap ambi imbirak ndugwi pit nogo logonet, kwe ambi abila me wogobelanak waremenggerak elege inikime aambiranogo pemenggaarak kwe, kwe eebe kangga'lek eenik wonage kenok, at ogonggelo nen, Onggo ndogop puwak o, yemenggerak nogo it inowak loongga nogo nen amburu mbambunuk, op mbakwi iinok, ndak-ndak aret puwak o.

²³Ndi, kwe nogo waremenggerak kangge kenok perak, onggo at aap waremenggerak eebe aret waruwak o.

²⁴ Enegen ndaganogo pege kenok, at enegen aret ndaganogo pugwi, eyak langgunogo pege kenok, at eyak aret langgunogo pugwi, eenggi mbanogo pege kenok, at eenggi aret mbanogo pugwi, ndi, iyok mbanogo pege kenok, at iyok aret mbanogo pugwi,

²⁵at eebe kani mbelanogo pege kenok, onggo at eebe aret kani mbelanogo pugwi, at awin kunogo pege kenok, onggo at awin kunogo pugwi, at arinon mbelanogo pemenggerak piike kenok, onggo at awin piiruwak nduk arinon mbelanogo pugwi, onggo-onggo togop aret eeko logowak o.

²⁶Aap ambi nen ayeloman aap a, kwe a, enegen ndaganogo pege kenok, at enegen ndaganogo pemenggerak onggo ayeloman ti, wondet aago nege logowak nduk teppuwak o.

²⁷Ndi, at ayeloman aap a, kwe a, yawi wake logonet, eyak langgunogo pege kenok, eyak langgunogo pemenggerak onggo ayeloman ti, wondet aago aret nege logowak nduk teppuwak o,” yinuk, yoraawak nduk, yoreegerak.

²⁸Yoge nagagerik, wone ambinom yoraawak nduk, yoge logonet, “Tapi ngguunok eyak paga aap a, kwe a, nibinogo pemenggerak kangge kenok, aap tapi unde nogo wariyak mage o. Ata, tapi ti mban yugum paga wappunuk, noorak lek mbo puwak o.

²⁹Ndi, tapi ambi nen eyak paga aakumi kulinik-kalinik nibininake menggerak kenok, tapi unde nogo liirogon arum logowak nduk, yorumonggotak kwe, arum wonaga'lek teppemenggerak paga aap a, kwe a, eyak paga nibinogo pemenggerak kangge kenok, tapi nogo yugum paga mondok warogo pogo logonet, at aap tapi unde nogo inom aret warogo puwak o.

³⁰Ndi, at aanggo unde nogo wariyak lek onggo wu puurak mbako logonet, Ninawot warak onggo wu ndogop aret wo'niroorak o, yogwe iinok, it yogwe nogo ndak-ndak aret onggo puwak o.

³¹Tapi nen aap ambi apuluk wulaga a, kolaga a, eyak nibinogo pege kenok, wone yugu yi ndak-ndak aret eeko logowak o.

³²Tapi ngguunok nogo nen aap ambi ayeloman aap a, kwe a, eyak nibinogo pege kenok, at tapi unde nogo nen mbuti perak paga eerak wu 30 aap ayeloman ogoba nogo wogoge logomenggerik, tapi nogo yugum paga mondok warogo puwak o.

³³Aap ambi nen nggween kabunik abit paarogo pege a, nggween kabunogo punuk abit waka'lek teppege a, eeremenggerak paga aap alik ambi aanggo lembu a, keledai a, time yobok togon wambemenggerak kangge kenok,

³⁴at aap nggween kabunemenggerak nogo nen at aap aanggo kambemenggerak nogo onggo wogoge logomenggerik, tapi kambemenggerak nogo at aret lakkolaawak o.

³⁵Ndi, aap aanggo tapi ngguunok ambi nen aap alik aanggo tapi ngguunok waremenggerak kangge kenok, tapi eenik wonage nogo kunggo logomenggaarik, wu nogo imbirak ndak-ndak tumbukkologwe, ndi, tapi waremenggerak nogo eebe mbanogo ndak-ndak tumbukkologwe, eeruwak o.

³⁶Togop kwe, tapi ngguunok nogo nen tapi alik nibininake menggerak ineenu kwe, at tapi unde nogo arum liirogon wonaga'lek paga aap alik ambi aanggo tapi waremenggerak kangge kenok, at tapi unde nogo nen waremenggerak nogo obaane'me tapi aret awi yake logomenggerik, warak nogo at aret lakkolaawak o,” yinuk, yoraawak nduk, yoreegerak.