Read Western Dani Wundeegwaarak 23 Bible Online

Wundeegwaarak 23 - Western Dani bible

Wundeegwaarak 23

¹ Yoge nagagerik, Iterali yoraawak nduk, Muta ambinom yoge logonet, “Wone pilit wone yugu kagak wiganit nogo logorak mage o. Aap ambi abet aret maluk eeremenggerak kagak, Eerulik o, yinuk, aana'le mbaniyak mage o.

²It aakumi apit maluk eeriyak koonit nugwi iinok, it inom koonit nugu logorak mage o. Aakumi inowak loonggwi me, it ambi nen nogo logomenggaarik, maluk abet aret eeremenggerak kagak, it aakumi nen, Maluk eerulik o, yogwe iinok, maluk onggo pugun lek me, at oone inom nabeniyak mage o.

³ Ndi, aap eenggi lek ambi nen maluk eeke kenok, owak loonggwi me, abuwa nen aana'le mbaniyak mage o.

⁴Aap ambi it inom ogoorak aanggo tapi a, keledai a, kobak aremenggerak inigen kogo logomenggaarik, mbo puurak mage o. Ata, mbet-mbet aret iyokan wonok aanggo unde nogo wogori nawak o.

⁵ At inom ogoorak aanggo keledai nogo aaninggin mendek wonok nage logonet, aaninggin nen ngginnaremenggerak inigen kogo logomenggaarik, ti kunduk mbo puurak mage o. Ata, kimbirak ogoorak aanggo nogo yeenggwaariyak nduk, piyanogo mippuurak o.

⁶ Aap eenggi lek mendek owak looniyak nduk wage kenok, Aap yi meek me, yinuk, awone ugun-ugun mbaniyak mage o.

⁷Aap ambi nen eerulik kagak, Eekerak aret o, yogwe iinok, inoone inom nabeniyak mage o. Aakumi maluk eekwi iinok, an teppiyaagin lek me, aap ambi maluk eerulik kagak warogo pugwi, ndi, An abet aret maluk ti eerulik o, ari kagak, Eekendak aret o, yinuk, warogo pugwi, eeriyak mage o.

⁸Maluk eerak onggo, Ndogop puurak o, yugu kagak, Puurak lek, yoruwak nduk, wu kote wogogwi nogo ti, aap inawone abe mbaniyak kagak inigen mbuk kwak liinggwi yogo logonet, kagaarogo pugwi, ndi, Ninawone op aret mbanugun, mba'nuk, nogwe nogo, wi-wi eeginako logonet, Maluk eerulik kagak yogotak o, yinuk, it aap obeelom nogo inenggali wappiigwi, eeko menggaarak me, togop eeruwak nduk, wu wogorogwe iinok, woorak mage o.

⁹ It maan o Metit aap nggiru kwak wonogwe iigak, aaninggin eerogo piigo nogogwaarak nogo ineenu me, it aakumi nggiru inenggela'me wonogwe iinok, aaninggin inobaga piigo logorak mage o,” yinuk, yoraawak nduk, yoreegerak.

¹⁰ Yoge nagagerik, yoraawak nduk, ambinom yoge logonet, “It nen awi yakwi, anggen mbanogo kuwak eekwi, eekwi iigak, tahun 6 eeko logomenggaarik,

¹¹tahun ambi ari wage paga perak, mbi yarumonggotak nogo waali age kenok, it aakumi ineenggi lek ndakkologo logomenggaarik, eegu pugu nogo wam nggwiya nunggwi iinok, iri'ngga wunduwak nduk, yabu wagangga'lek teppuwak o. Ndi, eyo anggur awi yarak inom, eyo tayitun inom, ndak-ndak togop mban aret eeko logowak o.

¹² Ne 6 paga yabu eeriyak op aret kwe, ko'lu paga perak, inaanggumi lembu-keledai nogo tat yonggonggologwe, ndi, it inom, inayeloman inaagalogwe inom, aap nggiru iniya woramenggerak wonogwe inom, iniki ale'nggen paga tat yonggonggo'net nugwi, eeruwak nduk, yabu eeka'lek puk aret logowak o.

¹³An nen yi wone ndi wone yorage minggirak nogo mbo puurak lek mondok liirogon aret woppunuk eeko logowak o. Ndi, aap alik inagugi nggino yogwi, inendage kunggwi, eeriyak mage o,” yinuk, yoraawak nduk, yoreegerak.

¹⁴Yoge nagagerik, yoraawak nduk, ambinom yoge logonet, “Tahun ambit eerak paga it nalut eeko logonet, ne kenagan inale'nggen paga laago nggwok lako logowak o.

¹⁵ Tut aa'nduk Abip penenak paga an o Metit nen wogoren wundi wage logonet, Laago endage Oroti Piika'lek Mendek lako logomunggup o, yinuk, koonogo pereegirak nogo inale'nggen paga lako logonet, an yoragagirak nogo ndak-ndak ne iyaalok nen nok, ne 7 paga oroti piiruwak nduk, ragi pega'lek kagak oroti worarogo nonggo logowak o. It an nalut eeriyak nduk, wogo logonet, an nake puurak ineenggime lek we aret nowagam woroorak mage o.

¹⁶ Yi mendek ndi mendek awi yappunuk, anggen iyaalok kole aremenggerak nogo mbanggo logonet, inale'nggen paga laago endage Anggen Iyaalok Mbanggwi nogo lakwi, ti'nuk, yi mendek ndi mendek anggen abu kole aremenggerak mbanogo kuwak eerogo pi wogwe iigak, tahun irip paga ari nage kenok, inale'nggen paga laago endage Anggen Mbanak Kuwak Eekwi nogo lakwi, eeko logowak o.

¹⁷Tahun ambit eerak ne kenagan paga it aap mban abok aret Naliku Nitok Minggirak kinogoba ALA an nowagam wogo logowak o.

¹⁸Nowagam wogo logonet, nake warogo wo'nugwi amiya nogo inom, yi mendek ndi mendek ragi punuk worarak inom, wo'niri woroorak mage o. Ndi, nalut eeruwok nduk, laago lako logonet, nake warogo wo'nugwi amok nogo awo laka'lek kagak, o weeriyak mage o.

¹⁹ Yi mendek ndi mendek anggen iyaalok yugu abu kole obeelom kenok mban waganogo Naliku an inogoba Ala nawi wurik me pi wogo logowak o. Ndi, kambin-ndomba aagalogwe warogo lariyak kenok, inagalo elak amburu paga lariyak mage o,” yinuk, yoraawak nduk, yoreegerak ti aret.

²⁰Yoge nagagerik, Muta ambinom yoge logonet, “At malayikat nen aa'nduk a'nuk, tu nikkiren nage logonet, enaani wokkiren o an nen pipuk eerogo pereegim nogome pinagi nawak nduk, an nayonggo malayikat ambi nappi wage neyaamunggun o.

²¹Nappi woraagin nogo ti, an noone aret wonok yokkira woraagin me, At yi nineebi o, yinuk, oone taganogo pugwi kiinok, at nen kit yogwe ti, lek eerogo pigin lek me, at oone yokkirage nogo mondok liippunuk, konenggo logomunggup o.

²²At nen yokkirage nogo liirogon konenggwi, ndi, an yokkirage nogo inom liirogon aret eekwi, eekwi kiinok, kit kinom wim nogo ti, an ninom wim aret age, ndi, it kinom ogoorak nogo ti, an kunduk ninom ogoorak aret age, eeke logogin o.

²³Ndi, an nayonggo malayikat nogo nen aa'nduk a'nuk, kit tu nikkiren aakumi Amori mendek inom, Ket mendek inom, Perit mendek inom, Kanan mendek inom, Kewi mendek inom, Yebut mendek inom, inanggween paga pinagi nage kenok, an nen it aap ti apit aret pup eerogo piyaagin o.

²⁴Kit nen an nalut eekwi obaane'me kinendobanggun yindumbunuk, inagugi ayuk wukwi, inagugi inendage tiyappiigo logobagip nduk, inawi wukwi, it kugi eeko logonet, eeko menggaarak nogo ndak-ndak eekwi, eeriyak ti mage o. Ata, inagugi ogut aago ogobakkigirik nogo kalenak-pugunik eerogo piigwi, inagugiwak telenak-mbelenak agago piigwi, eeko logomunggup o.

²⁵Naliku kinogoba Ala an nalik mban nalut eeko logomunggup o. Nalik mban nalut eekwi kiinok, nale'nggen kinoba pinagage logonet, kinambi inom, kinagi inom, wokkirage, yi andi ndi andi alom nogo apit aret kinenggela'me nen nggiginogo mbo nappege, eeke neegak,

²⁶kumi wubili wonogwe, inaagalogwe mburunogo piigwi, kit kiname time togop eerugun lek o. Ndi, kit mondok li a'nuk kanggo logobagip nduk, kinili agago pinagage logogin o.

²⁷Yi aakumi ndi aakumi inanebunu lombok nen kit nogwe nogo inaruk konembunuk, Wogwe yi o, yinuk, inagabiti mbakwi, iniki ma'nogwe, eeppunuk, kinogole nen mbaganuwak nduk,

²⁸an nen nggiin kundi ineyak andiigwi kombogonak nappiya woraminggirak inaa'nduk ineyak mbaninabit nogo logonet, it aakumi Kanan mendek inom, Kewi mendek inom, Ket mendek inom, mugogo wumbiyaagun o.

²⁹Wumbiyoorak yagarak ti, tahun ambit paga wumbiige neenok, nggween tenak aremenggerak paga yi mendek ndi mendek inigen mbolok kwi eyonggaame mendek nen inawi yagabit eekkola unggukwak nduk,

³⁰an nen mbawok ambitak-ambitak mugogo wumbiigak eeke neegak, kit kinapuri wiganak paga nen inanggween ti unde eekkologo logogun o.

³¹Kit logowam kinanggween nogo ti, ogu niyo nggwok yenggenak Laut Merah kuli nen nok, agi niyo nggwok Pilitin kuli inom, ndi, ogwe karume kuli nen nok, aru niyo Eparat kuli inom, mbanogo pigin me, unde eekko'net nogo logonet, mugogo wumbiyaabagip nduk, aakumi time wonogwe nogo kineenggime wokkiraagin o.

³²It aakumi ti, ineebe inom, inagugi inom, kinom lambunik logorak nduk, wone mbanubok o.

³³Kinom wonogo logonet, pagi keele pugu yilungge menggi kwak, inagugi eekwi mamunggologwe paga yilungginakwi iinok, an mbo paninuk, maluk eerukwak, kit kinanggween paga it kinom lambunik logomunggup nduk, teppiyaagup o,” yinuk, Ala nen Muta yoreegerak ti aret.