Read Western Dani Wundeegwaarak 24 Bible Online

Wundeegwaarak 24 - Western Dani bible

Wundeegwaarak 24

¹Yoge nagagerik, at Aliku ALA nen Muta ambinom yoge logonet, “Kat inom, Karun inom, Narap inom, Abiku inom, it aakumi Iterali yo'nggok ineebe 70 inom, kit apit aret Naliku ALA nowagam lagi wogo logomonggotik, it ando ineebe tayorogon taati nen nalut eekwi iigak,

²kat Muta kalik mban Naliku ALA nowagam panggorogon neya woraamunggun o. It aap yo'nggok ineebe 70 nogo an nowagam panggorogon neya wogwe, ndi, it aakumi Iterali ti, puurom yime lagi wogwe, eeriyak mage o,” yinuk, yoreegerak.

³Yoge mbareegi, at Muta nogo wambi nage nagagerik, Aliku ALA nen wone yoreegerak nogo inom, “Yogop ee'nu ndogop ee'nu,” yinuk, lengganogo yoreegerak nogo inom, abok aret liirogon mbininogo it Iterali mendek yorage mbareegi, it apit inoone ambugwi aret, “Aliku ALA nen yo'niragaarak ti, eeko logowok aret o,” yinuk, yereegwaarak.

⁴Yogo mbareegwa, at Muta nen Aliku ALA yoreegerak nogo tigitogon aret liiru mbaneegerak. Liiru mbangge nagagerik, ko'lu kuubondendok eenik a'nuk puut abu'me taa'nogo aret Ala ake warogo kani kunggak yuwak nduk, yugum logonogo pege, ndi, it Iterali inanebunu 12 nogo ndak-ndak yugum 12 kuli aret mippege, eerogo pereegerak.

⁵Pege nagagerik, Muta nen aap tawe Iterali mendek yorage logonet, “At Aliku ALA ake warogo kani kunggwi, at ninom lambuniyak ake lembu ngguunok warogo wogogwi, eeruwok nduk, wa nanip o,” yoragagerak nogo, eeko mbareegwa,

⁶at Muta nen amiya nogo wagangge nagagerik, eegu togolowa'na toologo pege, ndi, eegu nogo Ala aanggo warogo kani kunggo menggam taati werenogo pege, eeke nagagerik,

⁷wone Ala inom eeko logorak abuk nggaruk togon yugu liiru mbanak nogo woppunuk, oone nggwok paga it aakumi Iterali inenggaanom mbininogo yorage mbareegi, it nen yogo logonet, “Aliku ALA nen yo'niragaarak abok aret konenggwi, eebe aret eekwi, eeko logowok o,” yereegwaarak.

⁸ Yogo mbareegwa, at Muta nen amiya togolowak paga wonage nogo wagangge nagagerik, it aakumi nogo inoba werenogo nappege logonet, “An wone yokkirage yi, Aliku ALA kinom lambumbinagaarak wone aa'nduk koonogo pereegerak nogo, Yi aret kogo, mbarubagip nduk, amiya yi kinoba werenogo pinagagi o,” yinuk, yoragagerak.

⁹Yorage nagagerik, Muta inom, Karun inom, Narap inom, Abiku inom, it aap Iterali yo'nggok ineebe 70 inom, it apit aret puurom paga lagi nogo nogogwaarik,

¹⁰yugum nilam mbogut mili ket yanggo aago ndik tabak ndoonak negen me, Iterali inogoba Ala iyok ti paga punuk mi'ndak wonage inigen kogogwaarak.

¹¹Ala inigen kogogwaarak kwe, eenggi paga nen aaninggin ambi inoba piiga'lek mbareegi, inagi-inambi nenok aret wambi wogogwaarak.

¹²Wambi wogogwaarak wonogwe me, Aliku ALA nen Muta yoge, “An nen, Yogop ee'nu ndogop ee'nu, wone yugu inom, eeko logorak wone inom, yugum tabak paga liiru mbanggirak yi, wokkege neenok, aakumi mamunirage a wambenok nduk, puut yi paga neya lagi mok o.”

¹³Yoge mbareegi, at Muta ayeloman Yotuwa imbirak puut paga Ala ka lagi nawok nduk, eeko logonet,

¹⁴Muta nen aakumi Iterali yo'nggok nogo yorage, “Nit lagi nogo logomonggoorik, kiniya wambi woraagun me, ya'i too'ninako logomunggup o. Nit lek niigak, wone ambi age kenok, Karun Kut imbirak kinom wonogwe me, it aakumi inawone mbaniyak nduk, inowagam wogo logowak o.”

¹⁵Yorage nagagerik, at Muta nogo alik puut paga lagangge kagak, puut nogo paga ndugwi nobarogo pege mbareegi,

¹⁶Aliku ALA eya nogo puut Tinayi paga lenggeni wambi wagagerak kagak, nogo 6 yippunuk, ko'lu paga Aliku ALA nogo ndugwi enggela'me wonage logonet, Muta wiireegerak.

¹⁷Ndi, Aliku ALA eya pindanggagagerak nogo ti, kani wunuk agan puut nogo kani nengge negen eeke nogo it aakumi Iterali inigen kogogwaarak.

¹⁸ Ti eeke kagak, at Muta nogo puut irimbaga ndugwi enggela'me lagi nage nagagerik, wonage kagak, nogo 40 yereegerak.