Read Western Dani Wundeegwaarak 25 Bible Online

Wundeegwaarak 25 - Western Dani bible

Wundeegwaarak 25

¹At Aliku ALA nen Muta yoge logonet,

²“It aakumi Iterali mendek inalitik-inalitak iniki nen wo'niriyak eeginake kenok, an nake leenogo pani woraawak nduk, yoramenggendak,

³pi wogwe iinok, kat nen kuwak eerogo pege logorak nogo yi o. Mbuti emas inom, perak inom, tembaga inom,

⁴ndomba eeruwak paga ligi laanak mu kunik inom, maa'ngga kunik inom, maa'ngga anggup kunik inom, kayin yawenak amuni mbanak inom, kambin eeruwak inom,

⁵ndomba ngguunok agabolo maa'ngga kunik inom, lumba-lumba laut inikime menggerak agabolo inom, eyo liibu inom,

⁶ndi wunanggak amburu inom, obari abe mendek inoba eekak amburu inom, kani kunggwi iinok obari abe kaga inom,

⁷yugum yebibit mendek inom, yugum etenggen kere'li-kere'lo eerak inom, nogo paga at an neebe unde inowe ayum nggorek agale warak epod nogo paga ko'no mendaarak negen amiguwak paga yirik logorak inom, kuwak eerogo punuk,

⁸an logowam nake wukwi iinok, an it ninom aret logogin o.

⁹Ndi, wuko logonet, eebe wuriyak inom, wurik me yi mendek ndi mendek eekak yuurak abok aret inom, Yogop aret eeko logowak o, yinuk, wakkagak yokkege neenok, ti ndak-ndak aret eeko logowak, yegerak, yoret o,” yinuk, yoreegerak.

¹⁰Yoge nagagerik, ambinom yoraawak nduk, yoge logonet, “Eyo liibu paga naloobut mbaniyak irip aru-ogwe metet ambit negen wakkagak wukwi, irip agi-ogu inom, oolo mippuurak inom, ti metet oolo irimbaga negen wakkagak wukwi, eeppogo logomenggaarik,

¹¹endekem-akem paga etenggen ambit mendek mbuti emas ti mendek paga mban nabenggwi, eebe mbanak eraaninu yendok-wandok mbuti emas paga muun negen agomaarogo pugwi, eeppunuk,

¹²eyo eewu'nuk negak yuwak nduk emas paga tenggen 4 yarogo irip agi paga mbere pugunogo pugwi, irip ogu paga mbere pugunogo pugwi, eeppogo logomenggaarik,

¹³eewu'nuk negak eyo liibu loonogo punuk, mbuti emas paga nabenogo

¹⁴tenggen yarak pugunik me nogome nonggonogo mambuwak o.

¹⁵Eyo eewu'nuk negak mambemenggaarak nogo ti, nggiginogo nappuurak lek nonggonak aret logowak o.

¹⁶Ndi, naloobut mbanemenggaarak inikime ti, Yogop ee'nu ndogop ee'nu, yinuk, wone yugu yugum paga liiru mbanogo wokkirigin nogo aret yonggologo puwak o.

¹⁷ An ninom lambuni wambi wage logowam naloobut mbanemenggaarak abit lenggenogo puurak ti, mbuti emas ti mendek paga mban irip aru-ogwe metet ambit negen wakkagak ogobakkigikwi, eeben abeenok-abeenok metet oolo irimbaga negen wakkagak ogobakkigikwi, eeppunuk,

¹⁸obaga lenggenogo puurak irimbaga irip aru-ogwe paga malayikat negen kerub ogut mbere mbuti emas paga ogobakkigirogo piinok,

¹⁹an ninom lambuni wambi wage logowam nogome inetenggen ambit me ina kumbunuk managik logowak nduk, koonogo piigo logonet, ambi irip aru paga a'naabit wiganogo nippugwi, ndi, ore nogo irip ogwe paga a'naabit wiganogo nippugwi, eeruwak o.

²¹Ti piigo logomenggaarik, Yogop ee'nu ndogop ee'nu, wone yugu yugum paga ayo waganogo wokkirigin nogo naloobut mbanemenggenom time yonggoppunuk, abit narogo pumunggun o.

²²Narogo pege keenok, naloobut mbanak me malayikat negen kerub ogut mbere wonogwe nogo irimbaga an nimbirak lambuni wambi wage logominggirik, it aakumi Iterali nen eeko logowak nduk, Yogop eeriyak, ndogop eeriyak, time nen aret yokkegak eeke logogin, yegerak, yoret o,” yinuk, yoreegerak.

²³Yoge nagagerik, ambinom yoge logonet, “Ndi, oroti pegak eyo liibu paga ndooniyak irip aru-ogwe ti, metet ambit negen wakkogwe, irip eeben abeenok-abeenok ti, metet oolo negen wakkogwe, ndi, irimbaga abu'me ti, metet oolo irimbaga negen wakkogwe, eerogo ndoonogo punuk,

²⁴mbuti emas ti mendek paga mban enaagan-ambokan nabenogo pogo logomenggaarik, eyo ndooniyak nogo eraaninu yendok-wandok muun negen agomaarogo punuk,

²⁵eyo irimbaga ndoonemenggaarak abo-abo paga ineenggi tabak wakkagak mbuti emas paga nabenuwak o.

²⁶Ndi, mbuti emas paga tenggen 4 yarogo eyo ndooniyak owak 4 mippemenggaarak irip agi kunik unggu'me eyo ndoonogo nappemenggaarak irip paga eyo ndooniyak nogo eewu'nuk negak yuurak mambuurak nduk, pugunogo pugwi,

²⁸ndi, eyo ndooniyak nogo eewu'nuk negak yuwak nduk, eyo liibu loonogo punuk, mbuti emas paga nabenogo pugwi, eeruwak o.

²⁹Eeko logomenggaarik, an Ala nake pugu ndoonogo pegak pirin inom, niyo kombet waka inom, togolowak amburu tookak inom, niyo toologo nenggak inom, mbuti emas ti mendek paga mban ogobakkigirogo pogo logomenggaarik,

³⁰ eyo ndooniyak nogo an naloobut mbanumonggo'nom eraanu time punuk, oroti worarogo an nake pi wogo logowak, yegerak, yoret o,” yinuk, yoreegerak.

³¹Yoge nagagerik, ambinom yoge logonet, “Ndi, ndi wuninogo pegak ogobakkigike logonet, mbuti emas ti mendek paga mban aan lebenogo iyok inom, obate inom, ogobakkigirogo punuk, ten anggen yugu negen awo ambit-mbit wake pogom inom, abu ambit-mbit warak pogom inom, waganogo iyok-obate eerak nogo etenggen ambit mban logowak nduk eerogo punuk,

³²eno'mbak 6 aret warak eerogo puwak o. Eno'mbak 6 nogo ti, eebe ambit paga nen aru pa'nggwe kenagan wumbugwi, ogwe pa'nggwe kenagan wumbugwi, eeruwak o.

³³Ndi, eno'mbak 6 wumbemenggaarak nogo inalitak lombok paga ten anggen yugu negen awo ambit-mbit wake pogom inom, abu ambit-mbit warak pogom inom, alome nen nok-nok era'nggup me kenagan obogum kunogo pugwi,

³⁴ndi, oolo eebe mi'ndak paga ten anggen yugu awo ambit-mbit wake pogom inom, abu ambit-mbit warak pogom inom, obogum 4 aret kunogo pogo logonet,

³⁵eno'mbak iyaalok mbere wunabak paga ten anggen ambit-mbit negen obogum kunogo pugwi, eno'mbak oolo mbere wunabak paga ambi obogum kunogo pugwi, ndi, irip mbere wunabak paga togop mban obogum kunogo pugwi, eerit eno'mbak 6 wunabak paga togop aret eeruwak o.

³⁶Ndi, eno'mbak paga ambit-mbit negen obogum kunogo pemenggam time mbuti emas ti mendek paga mban etenggen ambit aruwak nduk, aan libik-lebek eerogo ogobakkigiruwak o.

³⁷Ti eeko logomenggaarik, eno'mbak irip 7 tigitogon ndi wunanggak yuwak nduk, anobak negen ogobakkigirogo punuk, ndi enaame eya logowak nduk, kwippit nawak o.

³⁸Ndi, ndi wuninik logowak nduk eeko menggaarak pegak tenggap inom, keele kani nengge kenok abo mbanggak inom, mbuti emas ti mendek paga mban ogobakkigirogo puwak o.

³⁹Ndi eebe wunanggak inom, yi mendek ndi mendek abo mbanggak inom, tenggap inom, mbuti emas abu obeelom aaninggin 34 wakkenok ogobakkigirogo puwak o.

⁴⁰ Ti apit aret ogobakkigiko logonet, puut irimbaga nen wakkagak, Yogop aret ogobakkigirumunggup o, yinuk, yokkigi yi, ndak-ndak aret eeko logowak, yegerak, yoret o,” yinuk, yoreegerak.