Read Western Dani Wundeegwaarak 26 Bible Online

Wundeegwaarak 26 - Western Dani bible

Wundeegwaarak 26

¹Yoge nagagerik, ambinom yoge, “An nawooliya wuriyak nduk eeko logonet, ligi yawenak abu abe laanak inom, ligi laanak mu kunik inom, maa'ngga kunik inom, maa'ngga anggup kunik inom, nogo waganogo it aap penggaako menggaarak abu ineenu nen kayin tabak 10 aret penggaako logowak nduk wogoramenggendak penggaako logonet, malayikat negen kerub ogut eerogo inom aret nabenogo penggaaruwak o.

²Kayin tabak 10 penggaariyak nogo apit aret ndak-ndak irip aru-ogwe ti, metet 12 eeppunuk, ambi oolo kuli wakkogwe, ndi, ambe agi-ogu ti, metet mbere negen wakkogwe, eerogo penggaaruwak o.

³Penggaako logomenggaarik, kayin tabak 5 penggaaremenggaarak nogo ambit paga lambunogo penggaakwi, ndi, 5 ando nogo togop aret ambit paga lambunogo penggaakwi, eerogo punuk,

⁴kayin tabak penggaariyak ambi nogo paga eeben peenok mban keele enonggon waganggak yuwak nduk, ligi laanak mu kunik 50 pugunogo pugwi, ndi, ore nogo togop aret 50 kuli pugunogo pugwi, eeko logonet, keele nogo imbirak kuniyak nduk abo ndak-ndak eerogo puwak o.

⁶Ti'nuk, ooliya wuriyak ti, ambit ando kunnaruwak nduk, Mbuti emas paga enonggon 50 eerogo punuk, kayin tabak nogo paga imbirak yilinogo pit nawak o.

⁷Ndi, an nawooliya kayin puurak nogo abena kagak, obaga lenggenogo puwak nduk yum tabak 11 kuli kambin eeruwak paga penggaarogo puwak.

⁸Yum tabak 11 nogo apit aret ndak-ndak irip aru-ogwe metet 13 eeppunuk ambi oolo kuli wakkogwe, ndi, ambe agi-ogu ti, metet mbere negen wakkogwe, eeppunuk,

⁹yum 5 kambin eeruwak penggaaremenggaarak nogo ambit paga lambunogo penggaakwi, ndi, yum 6 nogo togop aret ambit paga lambunogo penggaakwi, eeko logomenggaarik, yum 6 irip wonage nogo nawooliya wuriyak enaame nabeniyak nduk, irip iluk yunggunogo puwak o.

¹⁰Yum tabak penggaariyak ambi nogo paga eeben peenok mban keele enonggon waganggak yuwak nduk ligi laanak 50 pugunogo pugwi, ndi, ore nogo togop aret eeben peenok paga 50 pugunogo pugwi, eeppunuk,

¹¹ooliya wuriyak ti, ambit ando kunnaruwak nduk, mbuti tembaga paga enonggon 50 eerogo punuk, yum tabak kambin eeruwak nogo imbirak yilinogo pit nawak o.

¹²Yum kambin eeruwak tabak ndiinnage nogo ooliya wurik ambokan nok nobarogo wuppugwi,

¹³ndi, yum kambin eeruwak tabak nggorek penggaariyak ooliya wuriyak irip aru-ogwe ndiinnage nogo ooliya wuriyak irip aru-ogwe paga nobarogo wuppugwi, eeruwak o.

¹⁴Ndi, ooliya wuriyak eebe paga yum tabak ambi ndomba ngguunok agabolo paga maa'ngga warogo punuk, penggaarogo obaga lenggenogo pugwi, ndi, lumba-lumba laut inikime menggerak agabolo paga ogombaga Lombok tebenogo pugwi, eeppunuk, ta'mban-mban aret eerogo puwak o.

¹⁵An nawooliya wuriyak owak mippit noorak eyo liibu paga ogobakkigiko logonet,

¹⁶owak irip ogu nen agi metet 4 eeppunuk ambi oolo kuli wakkanuk pugwi, ndi, owak mbere mippunuk, alom paga inom, irip nogo inom, eyo ambi karo-karo metet ambi oolo irimbaga negen wakkanuk nappugwi, eerogo pit nogo logomenggaarik,

¹⁸owak mippit namenggaarak nogo ambiret mi'ndak paga iyok mbere eerogo pugwi, ambi mi'ndak paga iyok mbere eerogo pugwi, eerit mbuti perak paga iyok ogobakkigirogo punuk, eeben peenok o ame pa'nggwe owak 20 nogo iyok 40 kunogo mippit nogwe, ndi, eeben peenok o omarip paga pa'nggwe owak 20 nogo iyok 40 kunogo mippit nogwe, eeruwak o.

²²Ndi, oonegen kilu yi nage menggim pa'nggwe paga owak togop mban 6 ogobakkigirogo mippit nogwe,

²³ndi, unggut peenok-peenok paga owak togop mban eerogo mippit nogwe, eeppunuk,

²⁴owak mippemenggam unggu'me peenok-peenok nogo alome nen era'nggup ambit lambuk yi woramenggerak nogome mbutimanggen ambiret komaarogo time aret nggelenogo puwak o.

²⁵Owak ambit paga, mbuti perak paga iyok mbere ogobakkigirogo pugwi, ndi, ambit paga, togop mban eerogo pugwi, eerit iyok 16 aret pit nogo logomenggaarik, owak 8 nogo oonegen kilu yi nage menggim pa'nggwe mippit nawak o.

²⁶Ti eeppunuk, eyo liibu karo-karo nappuurak ti, owak eeben abeenok mippugu nogo paga eyo liibu 5 aret karo-karo nappugwi,

²⁷owak eeben abeenok mippugu nogo paga eyo nogo 5 karo-karo nappugwi, ndi, oonegen kilu yi nage menggim pa'nggwe owak mippugu nogo paga eyo 5 karo-karo nappugwi, eeruwak o.

²⁸Owak mippugu oolo paga eyo ambi nggorek ooliya wurik paga nok nappuwak o.

²⁹Eyo owak mippit noorak inom, eyo karo-karo nappuurak inom, Mbuti emas paga mban nabenogo pugwi, ndi, eyo karo-karo pugu nogo omaawi logorak nduk mambuurak nogo mbuti emas paga tenggen yarogo pugwi, eeruwak.

³⁰Ooliya ti, wuko logonet, puut yi paga nen, Yogop aret wuko logonu o, yokkigirak yi ndak-ndak aret wuko logowak o.

³¹Ligi yawenak abu abe laanak inom, ligi laanak mu kunik inom, maa'ngga kunik inom, maa'ngga anggup kunik inom, waganogo it aap penggaako menggaarak abu ineenu nen yum ambi tabak penggaako logowak nduk wogoramonggotak penggaako logonet, malayikat negen kerub ogut eerogo inom aret penggaarogo pugwi iinok,

³² ooliya inikime mage menggim inom, mage lombok menggim inom, kuli ogoorak logowak nduk, eyo liibu 4 mippuwam mbuti perak ogobakkigirogo punuk, eyo owak 4 mbuti emas paga nabenogo kwippuurak ogobakkigiriyak nogome mippunuk, yum tabak penggaariyak nogo mbuti emas ena yomonak eyo 4 mi'ndak nogo paga tugunogo pogo logomenggaarik, wone, Yogop ee'nu ndogop ee'nu, yugum paga ayo wogo nogo an naloobut mbaniyak me yonggologo punuk, yum tuguniyak nogo wungga wagak aken nggwe time pi ungguwak o.

³⁴Wone, Yogop ee'nu ndogop ee'nu, yugu nogo yugum paga ayo wogo naloobut mbanogo punuk yonggologo Mage Lombok Menggim logorak nogo, an ninom lambuni wambi wage logowam abit nogo narogo pugwi,

³⁵yum tuguniyak endekem nggwe ina ambit me koonak logowak nduk, eyo ndooniyak nogo, o omarip paga pa'nggwe pugwi, ndi, ndi wunanggak ogobakkigiriyak nogo, o ame pa'nggwe kwippugwi, eeruwak o.

³⁶Nawooliya wuriyak tungga paga kayin tuguniyak ti, ligi abu abe laanak inom, ligi laanak mu kunik inom, maa'ngga kunik inom, maa'ngga anggup kunik inom, waganogo it aap yum enete yabenggek-ndabenggek penggaako menggaarak ineenu nen penggaakwi iinok,

³⁷tugumbuurak nduk, eyo ena yomonak mbuti emas paga ogobakkigirogo pugwi, eyo liibu 5 waganogo Mbuti emas paga nabenogo pugwi, ndi, mippuwam mbuti tembaga paga 5 ogobakkigirogo pugwi, eerogo punuk eyo 5 nogo mippunuk, ena yomonak waganogo eyo nogo paga nabembunuk, yum nogo, eyo ti paga tugunogo wuppit woraawak, yegerak, yoret o,” yinuk, yoreegerak.