Read Western Dani Wundeegwaarak 27 Bible Online

Wundeegwaarak 27 - Western Dani bible

Wundeegwaarak 27

¹Yoge nagagerik, ambinom yoraawak nduk, yoge logonet, “An Ala nake warogo kani kunggak yuurak ogobakkigiriyak nduk, eyo liibu paga unggut agi-ogu aru-ogwe ndak-ndak metet mbere eeppunuk, ambi oolo abu'me negen wakkagak eerogo nappugwi, ndi, owak mippuurak ti, metet ambiret eeppunuk, ambi oolo abu'me negen wakkagak eerogo mbanggwi, eeruwak o.

²Eeko logomenggaarik, mbuti tembaga paga tapi eyak negen ogobakkigirogo eyo nappuurak unggut 4 nogome nabenogo mippit nanuk, eyo eebe apit tembaga paga nabenogo pit nogo logonet, tapi eyak negen nogo kunduk etenggen ambit kunnaruwak nduk, eeruwak o.

³Ndi, kani kunggo logonet, yabu eekak yi mendek ndi mendek wun ndoonogo wumbegak tenggap inom, wun ndooniyak elabe inom, niyo ndik-ndik eekak niyoowak inom, enggaanggum pelaakak paando inom, kaninggen ndoonggak inom, abok aret mbuti tembaga paga mban ogobakkigirogo pugwi,

⁴ndi, mbutimanggen tembaga paga yonggon-yonggon yarogo punuk, tenggen tembaga paga yarogo unggut-unggut 4 nogo paga pugunogo pogo logomenggaarik,

⁵eebe waganogo unggu nappuurak abu'me oolo muundak taati ndoonogo pugwi, eeruwak o.

⁶Kani kunggak tenggen abeenok-abeenok pugunik nogome mambunuk, eewu'nuk negak yuwak nduk, eyo liibu loonogo mbuti tembaga paga nabenogo punuk mambugwi,

⁸ndi, kani kunggak eyo paga ogobakkigiriyak inikime time ambe mbanogo pugwi, eeruwak o. Kani kunggak yuurak, Ndogop aret ogobakkigirumunggun o, yinuk, puut paga nen yokkigirak yi, ndak-ndak aret eeruwak, yegerak, yoret o,” yinuk, yoreegerak.

⁹Yoge nagagerik, ambinom yoge logonet, “Ooliya wuppunuk owa'nagat aret wuruwak o. Wuko logonet, owak mippuurak 20 nogo paga mbuti tembaga paga ogobakkigirogo iyok warak eeppugwi, mbuti perak paga ena yomonak inom, ndi, nggeleni nawak nduk, owak mi'ndak abo paga keele komaarogo puurak nogo inom, ogobakkigirogo owak 20 abo nogo paga maarogo pit nogwe, eerogo punuk, o ame pa'nggwe wuppit nogo logonet, kuli metet 46 paga pit nogo logomenggaarik, yum tabak kayin yawenak abu abe penggaariyak nogo tugumbit nogwe,

¹¹ndi, o omarip paga pa'nggwe ti, togop mban owak 20 nogo paga, mbuti tembaga paga iyok warak eeppugwi, mbuti perak paga ena yomonak inom, ndi, nggeleni nawak nduk, owak mi'ndak abo paga keele komaarogo puurak nogo inom, ogobakkigirogo owak 20 abo nogo paga maarogo pit nogwe, eerogo punuk, o omarip paga pa'nggwe time wuppit nogo logonet, metet 46 kuli paga pit nogo logomenggaarik, yum tabak penggaariyak nogo tugumbit nogwe, eeruwak o.

¹²Owa'nagat oonegen kilu yi nage menggim pa'nggwe paga owak 10 iyok warak eerogo mban wurabit nogo logonet, metet 23 kuli paga pogo logomenggaarik, yum tabak nogo tugunogo pit nogwe,

¹³ndi, oonegen lagi wage menggim pa'nggwe paga ti togop mban metet 23 kuli paga pogo logonet,

¹⁴tungga pelenuwam eraaninu abeenok paga owak 3 iyok warak mban eerogo mippunuk, kayin tabak nggorek metet 7 tugunogo wuppi wogwe,

¹⁵ndi, tu abeenok paga ti, togop mban owak 3 iyok warak mban eerogo mippunuk, kayin tabak nggorek metet 7 tugunogo wuppi wogwe, eeruwak o.

¹⁶Eeko logomenggaarik, tungga pelenuwam nogo ti, owak 4 iyok warak mban eerogo mippunuk, ligi yawenak abu abe laanak inom, ligi laanak mu kunik inom, maa'ngga kunik inom, maa'ngga anggup kunik inom, aap ambi yabenggek-ndabenggek penggaake eenu nen yum tabak nggorek metet 9 wakkagak penggaake kenok, owak 4 nogo paga tugunogo wuppi woraawak o.

¹⁷Owa'nagat yendok-wandok owak wurabemenggaarak nogo abok aret iyok warak eekwi, ena yomonak owak nogo paga keele maarogo pugwi, eeruwak o.

¹⁸Owa'nagat wuriyak irip ti, metet 46 paga wakkogwe, ambe agi-ogu paga ti, metet 23 paga wakkogwe, eerogo yum abu abe yabenggek-ndabenggek penggaarogo metet mbere eeppunuk, ambi oolo negen mbanogo pugwi, ndi, owak nogo abok aret iyok mbuti tembaga paga ogobakkigirogo pugwi, eeruwak o.

¹⁹Nawooliya wuriyak me nen yi mendek ndi mendek eekak yuurak inom, nawooliya owak mippit nogo logonet, omaawi eekak mbuti owak inom, owa'nagat wuko logonet, omaawi eerogo wurakak mbuti owak inom, abok aret ti, mbuti tembaga paga mban ogobakkigiruwak, yegerak, yoret o,” yinuk, yoreegerak.

²⁰Yoge nagagerik, ambinom yoge logonet, “Ndi mondok wuninik eya mban logowak nduk, aakumi Iterali nen eyo tayitun anggen amburu obeelom lombok aambiranogo kiri woraawak nen yoraamunggun o.

²¹An nawooliya wuriyak inikime naloobut mbanemenggaarak logowam akem pa'nggwe time wonage kagak, oolo yum tuguniyak endekem nggwe Ninom Lambungge Logowam Magame nogome Karun apuri inom nen an nenggaanom paga o kiyoma nen kuubondendok kuli, ndi wuninik mban logowak nduk, unde logowak o. Ti eeriyak ti, aakumi Iterali inapuri inombowologwe wiganit nogwe nogo inom mondok-mondok eeko logowak nduk wone yi koonogo pigi o,” yinuk, yoreegerak.