Read Western Dani Wundeegwaarak 35 Bible Online

Wundeegwaarak 35 - Western Dani bible

Wundeegwaarak 35

¹Ti'nuk, Muta nen aakumi Iterali wonogwe abok aret kuwak eeppiige nagagerik, yorage logonet, “At Aliku ALA nen kit eeko logobagip nduk, wone lengganogo yokkiragaarak nogo yi aret o.

² Ne aa'nduk nen nok ne 6 kuli paga ti, it yabu eerit nogo logorak op aret kwe, ko'lu paga perak, yabu eeka'lek tat yonggonggologo logonet, Naliku ALA nalut eeko logowak nduk, nake leenogo pateegirak me, ne ti paga aap ambi nen yabu eeke kenok, onggo at eebe warogo pogo logowak o.

³Ne ti paga it aakumi wonogo menggam time abok aret kani kumbunuk ka'luk eerit nogo logogwaarik o, yinuk, yegerak me, yokkiragi o,” yoragagerak.

⁴Ti'nuk, Muta nen aakumi Iterali wonogwe abok aret wone ambinom yorage logonet, “At Aliku ALA nen kit eeriyak wone yokkiragaarak nogo yi aret.

⁵It inalitik-inalitak lombok abok aret iniki nen, Namendek yi aret Aliku ALA ake pi naakit, mba'nuk, Naliku ALA nake leenogo pi woraawak o. Naliku ALA nake pi woroorak nogo ti, mbuti emas inom, perak inom, tembaga inom,

⁶ndomba eeruwak laanak mu kunik inom, maa'ngga kunik inom, maa'ngga anggup kunik inom, ligi yawenak amuni mbanak inom, kambin eeruwak inom,

⁷ndomba ngguunok agabolo maa'ngga kunik inom, lumba-lumba laut inikime menggerak agabolo inom, eyo liibu inom,

⁸ndi wuninggak eyo tayitun amburu inom, Naliku ALA nake leenogo amburu kilippiyoorak obari abe mendek inom, obari abe kaga inom,

⁹ndi, an neebe unde inowe ayum agale warak akem nggorek yirikak epod paga kunduk, ayum ko'no negen mendaarak amiguwak paga nabenak logorak kunduk, nabeniyak yugum yebibit mendek inom, yugum etenggen kere'li-kere'lo eerak inom, kuwak eerogo pi woraawak, yegerak me, yokkiragi o,” yoragagerak.

¹⁰Yorage nagagerik, ambinom yorage logonet, “At Aliku ALA nen yi mendek ndi mendek eeko logorak yegerak nogo eeruwak nduk, it aap yi mendek ndi mendek ineenggi amburu paga eeko menggaarak abok aret inenggela'me nen kuwak ari woraayok o.

¹¹Kuwak ogwe iinok, ooliya eebe inom, oo'ngget inom, yum tabak obaga lenggeniyak inom, enonggon inom, owak agi-ogu mippuurak inom, karo-karo nappuurak inom, owak oolo mippit noorak inom, owak mippit noorak iyok inom, ogobakkigirogo pugwi,

¹²ti'nuk, aloobut mbaniyak inom, eewu'nuk negak eyo inom, aloobut mbanak Ala inom lambungge logowam abiringga inom, aloobut mbanak taberak logorak yum tabak inom, ogobakkigikwi,

¹³ti'nuk, oroti pegak eyo ndooniyak inom, ndoonak eewu'nuk negak eyo inom, ti paga pegak yi mendek ndi mendek inom, Aliku ALA wonage mbaruwak nduk oroti inom, nogo ogobakkigirogo pugwi,

¹⁴ti'nuk, eya eeruwak nduk ndi wuninggak owak inom, ndi ti paga eekak yi mendek ndi mendek inom, ndi eebe wuninggak inom, wuninggak amburu inom, ogobakkigirogo pugwi,

¹⁵obari abe kaga kani kunggak inom, eebe eewu'nuk negak eyo inom, Ala ake leenogo pogo logonet amburu kilippiigak inom, obari abe kaga mendek inom, ooliya wuriyak tu unggwogo menggam yum tuguniyak inom, ogobakkigirogo pugwi,

¹⁶ti'nuk, Ala ake warogo kani kunggak inom, mbutimanggen tembaga paga yonggon-yonggon yariyak inom, eebe eewu'nuk negak eyo inom, kani kunggo logonet yi mendek ndi mendek eekak inom ogobakkigikwi, ti'nuk, ineenggi-iniyok kookak inom, ineenggi-iniyok kookak alom inom, mbuti tembaga paga ogobakkigirogo pugwi,

¹⁷owa'nagat paga yum tugunogo puurak inom, owak mippuurak inom, iyok inom, owa'nagat wuriyak tu unggwogo logowam yum tugunogo wuppi woroorak inom, ogobakkigikwi,

¹⁸ti'nuk, awooliya wuko logonet omaawi eekak mbuti owak inom, owa'nagat wuko logonet omaawi eekak mbuti owak wurakak inom, keele maariyak inom, nogo ogobakkigirogo pugwi,

¹⁹ndi, Karun apuri inom Ala unde mippiigwi iinok, yirik logonet, Ala awooliya wuriyak o magame unggwi nogo logorak Karun ayum inom, apuri inayum inom, penggaarogo pugwi, eeko logowak, yegerak me, yokkiragi o,” yinuk, yoragagerak.

²⁰Yorage mbareegi, aakumi Iterali nogo Muta wonage me kuwak ari wogogwaarak nogo iname nogo nogogwaarik,

²¹inalitik-inalitak iniki aganake kenok, mugurok mban Ala inom lambungge logowam awooliya wuriyak ake inom, o wuppunuk inikime eerit noorak ake abok aret inom, yum Ala ake leenak penggaariyak ake inom, abok aret waganggo nogogwaarik, at Aliku ALA ake pi wogwe,

²²ndi, kumi inom, aap inom, abok aret iniki nen aganake mugurok mban mbuti emas inogobak ayo inom, inaruk tiimba inom, inamberaarenggen inom, inagiinggen inom, mbuti emas paga ogobakkigirik yi mendek ndi mendek abok aret, Yi Aliku ALA ake o, yinuk, Aliku ALA titik eerogo punuk, wogogwi nogo mendek, wonok Aliku ALA titik eerogo wogori wogwe,

²³aakumi ando apit aret inageerok ndomba eeruwak laanak mu kunik inom, maa'ngga kunik inom, maa'ngga anggup kunik inom, yum yawenak amuni mbanak inom, kambin eeruwak inom, ndomba ngguunok agabolo maa'ngga kunik inom, lumba-lumba laut inikime menggerak agabolo inom, wonok pi wogwe,

²⁴it aap ando inalitak lombok nen mbuti perak inom, mbuti tembaga inom, Yi Aliku ALA ake o, yinuk, pi wogwe, ndi, aap ando inageerok eyo liibu wonage kenok, ti paga wuruwak nduk, wonok pi wogwe,

²⁵ndi, kumi ineenggi amburu yum penggaako menggaarak nogo nen ndomba eeruwak mu kunik inom, maa'ngga kunik inom, maa'ngga anggup kunik inom, ineenggi amburu laanak a, ligi yawenak amuni mbanak a, nogo pi wogwe,

²⁶kumi ando apit aret kambin eeruwak paga ligi laanggo menggaarak ineenu kenok, Ti mendek aret wonok pi noorak, iniki aganabeegerak me, ti mendek aret ligi laanogo wonok pi wogwe,

²⁷ndi, it aap inarum menggaarak inoweewi nen aap Ala unde inayum agale warak epod nogo paga nabenogo pugwi, ko'no mendaarak negen yirik logorak nogo paga nabenogo pugwi, eeruwak nduk, yugum yebibit mendek inom, yugum etenggen kere'li-kere'lo eerak inom, wonok pi wogwe,

²⁸it nogo nen mban ombat abe eekak inom, ndi wuninggak tayitun amburu inom, Ala ake leenogo pogo logonet eeppiigak amburu inom, obari abe kaga inom, pi wogwe, eereegwaarak.

²⁹Yi mendek ndi mendek eeriyak ake at Aliku ALA nen wone lengganogo Muta yoge kagak yoragagerak nogo, it aakumi Iterali kumi inom, aap inom, abok aret inalitik-inalitak iniki aganake mbareegi, “Aliku ALA ake pi na o,” yinuk, iniki ale'nggen paga pi wogo nogogwaarak.

³⁰Pi wogo mbareegwa, Muta nen aakumi Iterali yorage logonet, “At Aliku ALA nen aap Kut ombooluk aap Uri apuluk endage Mbetalen anebunu Yekura mendek nogo leenogo pegerak wonage nogo yokkira o.

³¹At nen mbuti emas paga inom, perak paga inom, tembaga paga inom, yi mendek ndi mendek eeriyak etenggen alitak lombok ogobakkigirogo pege, yugum abinak kere'li-kere'lo eerak loonogo punuk, obaanggi-obaangge eerogo pege, eyo paga yi mendek ndi mendek ogobakkigirogo pege, yi mendek ndi mendek abok aret etenggen alitak lombok eenggi amburu paga eeke, eeke logowak nduk, at Ala Aberiniki inom, eenggi amburu paga eeke logorak inom, at nen iniki koombunuk eeke logorak inom, eenu agak mendek inom, abok aret at Aliku ALA nen eeppereegerak o.

³⁴Ndi, aap alik ambi anebunu Ndan mendek endage Akitamak aput endage Akoliyap kunduk, it imbirak aakumi mamunirogo logowak nduk, iniki ngget wogorage,

³⁵it aakumi nen eyo paga yi mendek ndi mendek ogobakkigirogo pugwi, mbuti emas paga yi mendek ndi mendek ogobakkigikwi, ndomba eeruwak paga ligi laanak mu kunik inom, maa'ngga kunik inom, maa'ngga anggup kunik inom, ligi yawenak abu abe laanak inom, ti paga yi mendek ndi mendek etenggen yabenggek-ndabenggek eerogo ogobakkigikwi, ligi laanak paga kayin tabak penggaarogo pugwi, ineenggi amburu paga eeko mengga kwak, eeko logowak nduk, wogorage, eekerak o.