Read Western Dani Wundeegwaarak 36 Bible Online

Wundeegwaarak 36 - Western Dani bible

Wundeegwaarak 36

¹Togop aret me, aap Mbetalen inom, Akoliyap inom, it aap Aliku ALA nen ineenggi amburu paga at awooliya wuruwak nduk, ineenu eeppiige, iniki koombunuk eeriyak mendek wogorage, eekerak nogo inom, abok aret at Aliku ALA nen wone lengganogo pegerak nogo ndak-ndak at awooliya wuko logowak o,” yinuk, yoragagerak.

²Yorage nagagerik, aap Mbetalen inom, Akoliyap inom, it aakumi iniki koombunuk ineenggi amburu paga eerit nogo logorak Aliku ALA nen wogoragagerak nogo inom, abok aret Aliku ALA awooliya wuri woroorak iniki aganabeegerak nogo Muta nen wiiragagerak wogo mbareegwa,

³it aakumi Iterali mendek nen, “Namendek yi, o magame logowam wuriyak ake pi na o,” yinuk, onggo lek we aret pi wogogwaarak nogo Muta nen wogorage mbareegi, ti paga wukwi iigak, it aakumi Iterali nen o kuubondendok ambinom Muta owagam pi wagak mban eekwi iinok,

⁴it aap ineenggi amburu paga o magame logowam wukwi nogo mbo punuk, abok aret

⁵Muta yori wogo logonet, “Aakumi inamendek wonok wogwe ti, at Aliku ALA nen kuwak eeriyak yegerak nogo kagak ambik lombok kuwak eeko agaarik o.”

⁶Yogo mbareegwa, it pi wogogwaarak nogo ti, pi woroorak yugu kagak nggwok aret pi wogogwaarak me, at Muta nen, “O magame logowam wuriyak ake pi wogwe nogo aap inom, kumi inom, ambinom pi woroorak mage o,” yinuk, aakumi inawooliyana wonogwe me yoranet nawak nduk yorage mbareegi, yoranet nogo mbareegwa, ambinom pi woroolik puk aret ogogwaarak.

⁸Puk ogwe iigak, aap ooliya wuka inenggela'me yum penggaaka ineenu nogo nen Aliku ALA awooliya wuriyak nduk, ligi yawenak amuni mbanak laanak inom, ndomba eeruwak laanak amu kunik inom, maa'ngga kunik inom, maa'ngga anggup kunik inom, nogo mendek waganggo nogogwaarik, kayin tabak 10 aret penggaakwi iigak, it aap malayikat negen kerub ogobakkigikwi ineenu nogo nen malayikat negen kerub ogut eerogo kayin tabak nogo paga nabenogo pereegwaarak.

⁹Kayin 10 tabak nogo apit aret ndak-ndak irip aru-ogwe ti, metet 12 eeppunuk ambi oolo kuli wakkogwe, ndi, ambe agi-ogu ti, metet mbere negen wakkogwe, eerogo penggaareegwaarak.

¹⁰Penggaarogo punuk, kayin tabak 5 penggaareegwaarak nogo irip ambit paga lambunogo penggaakwi, ndi, kayin 5 ando nogo togop mban aret irip ambit paga lambunogo penggaakwi, eerogo pogo nogogwaarik,

¹¹kayin tabak penggaareegwaarak ambi nogo paga eeben peenok mban keele enonggon waganggak yuwak nduk, ndomba eeruwak laanak amu kunik keele enonggon 50 pugunogo pugwi, ndi, ore nogo togop aret 50 kuli pugunogo pugwi, eeko logonet, keele nogo imbirak kuniyak nduk, abo ndak-ndak eerogo pogo nogogwaarik,

¹³ooliya wuriyak kayin penggaarak ti, ambit ando kunnaruwak nduk, mbuti emas paga enonggon 50 eerogo punuk, kayin tabak penggaarak nogo paga yilinogo pit nogogwaarak.

¹⁴Ndi, ooliya wuriyak oo'ngget negen kayin lenggenogo puurak nogo abena kagak obaga lenggenogo puwak nduk, yum tabak 11 kuli kambin eeruwak paga penggaako nogogwaarik,

¹⁵yum tabak 11 nogo apit aret ndak-ndak irip aru-ogwe metet 13 eeppunuk, ambi oolo negen kuli wakkogwe, ndi, ambe agi-ogu ti, metet mbere negen wakkogwe, eerogo punuk,

¹⁶yum 5 kambin eeruwak paga penggaareegwaarak nogo eebe ambit paga lambunogo penggaakwi, ndi, yum 6 nogo togop aret ambit paga lambunogo penggaakwi, eereegwaarak.

¹⁷Eeko nogogwaarik, yum tabak penggaarak ambi nogo paga eeben peenok mban keele enonggon waganggak yuwak nduk, ndomba eeruwak laanak amu kunik keele enonggon 50 pugunogo pugwi, ndi, kayin ore nogo togop mban aret eeben peenok paga 50 pugunogo pugwi,

¹⁸ndi, ooliya wuriyak ti, ambit ando kunik aruwak nduk, Mbuti tembaga paga enonggon 50 eerogo punuk, yum tabak kambin eeruwak nogo imbirak yilinogo pugwi, eerit nogogwaarak.

¹⁹Eerit nogo nogogwaarik, ooliya wuriyak nogo eebe paga lenggenogo pegak yum tabak ambi ndomba ngguunok agabolo paga maa'ngga warogo penggaarogo pugwi, ndi, ogombaga lenggenogo pegak yuurak nduk, lumba-lumba agabolo paga penggaarogo pugwi, eereegwaarak.

²⁰Eeko nogogwaarik, ooliya wuriyak owak mippit nogo logorak eyo liibu paga ogobakkigiko logonet,

²¹owak irip ogu nen agi metet 4 eeppunuk, ambi oolo kuli wakkanuk mbanogo pugwi, owak mbere mippuurak alom paga inom, irip nogo inom, eyo ambi karo-karo nappuurak metet ambi oolo negen wakkanuk mbanggwi, eerogo pit nogogwaarak.

²³Eerogo punuk, owak mippit nogo logorak nogo ambi mippuurak paga iyok mbere eerogo pugwi, ambi mippuurak paga iyok mbere eerogo pugwi, eerit mbuti perak paga iyok ogobakkigirogo pogo logonet, eeben peenok o ame pa'nggwe owak 20 ogobakkigirogo punuk, nogo paga iyok 40 kunogo pugwi, ndi, eeben abeenok o omarip paga pa'nggwe owak 20 ogobakkigirogo punuk, nogo paga iyok 40 kunogo pugwi, eerogo pereegwaarak.

²⁷Eerogo punuk, ooliya wuruwam ambo'me oonegen kilu yi nage menggim pa'nggwe paga owak togop mban 6 ogobakkigirogo pugwi,

²⁸unggut peenok-peenok paga owak mippuurak togop mban eerogo pugwi,

²⁹ndi, unggut peenok-peenok owak mippuwam alom me nen era'nggup ambit me lambuni nawam time mbutimanggen ambiret a komaarogo time aret nggelenogo pugwi, eereegwaarak.

³⁰Oonegen kilu yi nage menggim pa'nggwe mippuurak owak 8 ogobakkigirogo punuk, owak ambiret paga iyok mbuti perak paga mbere ogobakkigirogo pugwi, ambit paga togop mban ogobakkigirogo pugwi, eerit iyok 16 kuli aret eerogo pereegwaarak.

³¹Pogo nogogwaarik, ooliya eeben abeenok paga owak mippogo logonet, karo-karo nappegak eyo liibu paga 5 ogobakkigirogo pugwi,

³²eeben abeenok paga owak mippogo logonet, eyo karo-karo nappuurak 5 mban ogobakkigirogo pugwi, ndi, ooliya wuruwam irip ambo'me oonegen kilu yi nage menggim pa'nggwe paga owak mippogo logonet, eyo karo-karo nappuurak 5 mban ogobakkigirogo pugwi,

³³owak mippogo logonet, owak oolo muundak karo-karo endak nappuurak eyo nggorek ambi loonogo pugwi, eerogo punuk,

³⁴eyo owak mippit noorak inom, eyo karo-karo nappuurak inom, ti mbuti emas paga mban nabenogo pugwi, eyo karo-karo nappogo logonet, irip nggeleni nagak emas paga tenggen yarogo pugunogo pugwi, eereegwaarak.

³⁵Eeko nogogwaarik, it aap yum penggaako menggaarak abu ineenu nen ligi yawenak amuni mbanak laanak inom, ndomba eeruwak laanak amu kunik inom, maa'ngga kunik inom, maa'ngga anggup kunik inom, waganogo yum ambi tabak penggaakwi iigak, it aap malayikat negen kerub ogut ogobakkigikwi ineenu nogo nen malayikat negen kerub nogo ogut eerogo inom aret penggaarogo pugwi,

³⁶yum tabak ti, tugunogo pegak yuurak nduk, eyo liibu paga 4 ogobakkigirogo mbuti emas paga nabenogo punuk, mippuurak alom 4 mban mbuti perak amok mbanogo longgo warogo pugwi, yum tugunogo wuppi wagak mbuti emas paga ena yomonogo eyo nogo paga nabenogo pugwi, eereegwaarak.

³⁷Ndi, ooliya wuriyak tungga paga kayin tugunggak yuurak nduk, ligi yawenak amuni mbanak laanak inom, ndomba eeruwak laanak amu kunik inom, maa'ngga kunik inom, maa'ngga anggup kunik inom, nogo mendek waganggo nogogwaarik, it aap yum etenggen yabenggek-ndabenggek penggaako menggaarak ineenu nen penggaarogo pugwi,

³⁸ndi, yum nogo tugunggak yuwak nduk, eyo liibu 5 ogobakkigirogo punuk, mbuti emas paga ena yomonogo eyo nogo paga pugunogo pugwi, eyo irip-irip mbuti emas nogo paga nabenogo pugwi, eyo 5 nogo nuk-nuk ari kero, mbuti emas paga tek kunggun eerogo pugwi, alom kwippuwam mbuti tembaga paga eerogo pugwi, eereegwaarak.