Read Western Dani Wundeegwaarak 37 Bible Online

Wundeegwaarak 37 - Western Dani bible

Wundeegwaarak 37

¹Eeko mbareegwa, aap Mbetalen nogo nen eyo liibu paga Ala aloobut ogobakkigike logonet, irip aru-ogwe metet ambit negen wakkage, irip agi-ogu inom, oolo mippuurak inom, nogo ti, metet oolo negen wakkage, eerogo punuk,

²endekem-akem paga etenggen ambit mendek mbuti emas at mendek paga mban nabengge, eebe mbanak eraaninu yendok-wandok mbuti emas paga muun negen a komaarogo nappege, eeke nagagerik,

³eyo eewu'nuk negak agale mbuti emas paga tenggen 4 yarogo irip agi paga mbere pugunogo pege, irip ogu paga mbere pugunogo pege, eeppunuk,

⁴eyo eewu'nuk negak yuwak nduk, eyo liibu loonogo punuk, Mbuti emas paga nabenogo pege,

⁵ndi, eewu'nuk negak yuwak nduk, tenggen yarak pugunik me time eyo nonggonogo mambege, eereegerak.

⁶Eeke nagagerik, Ala inom lambuni wambi wage logowam aloobut mbanak abit lenggenogo pegak ogobakkigike logonet, irip aru-ogwe metet ambit negen wakkagak ogobakkigike, eeben abeenok-abeenok paga metet oolo negen wakkagak ogobakkigike, eeppunuk, mbuti emas at mendek paga mban nabenogo pege nagagerik,

⁷abiringga obaga lenggenogo pegak irimbaga irip aru-ogwe paga malayikat negen kerub inogut mbere logowak nduk, mbuti emas aan libik-lebek eerogo ineebe ogobakkigirogo piige nagagerik,

⁸Ala inom lambuni wambi wage logowam abiringga ambit ando kunik inetenggen ambit me ina managik logowak nduk, ore ambi irip aru paga a'naabit wiganogo kenaarogo nippege, ndi, ore nogo irip ogwe paga a'naabit wiganogo kenaarogo nippege, eerogo piyareegerak.

¹⁰Ndi, oroti pegak eyo liibu paga ndoongge logonet, irip aru-ogwe ti, metet ambit negen wakkagak mbangge, irip eeben abeenok-abeenok ti, metet oolo negen wakkagak ndoongge, ndi, irimbaga abu'me ti, metet oolo irimbaga negen wakkagak pege, eeke nagagerik,

¹¹mbuti emas ti mendek paga mban enaagan-ambokan nabenogo punuk, eyo ndoonak nogo eraaninu yendok-wandok muun negen a komaarogo punuk,

¹²eyo irimbaga ndooneegerak nogo abo-abo paga ineenggi tabak wakkagak mbuti emas paga eyo ndoonak enaagan-ambokan nabenogo pege,

¹³mbuti emas paga tenggen 4 yarogo eyo ndoonak owak 4 mippereegerak irip agi kunik unggu'me eyo ndoonogo nappereegim irip paga eewu'nuk negak eyo mambuurak nduk, tenggen yarak nogo pugunogo pege,

¹⁵ndi, eyo ndoonak eewu'nuk negak yuwak nduk, eyo liibu loonogo mbuti emas paga nabenogo pege, eeke nagagerik,

¹⁶eyo ndoonak ti paga Ala ake pugu ndoonogo pegak pirin-pirin inom, niyo kombet waka inom, togolowak amburu tookak inom, niyo toologo nenggak inom, mbuti emas at mendek paga mban ogobakkigirogo pege, eereegerak.

¹⁷Ti'nuk, ndi wuninogo pegak ogobakkigiko logonet, mbuti emas at mendek nogo paga mban aan lebenogo ndi iyok inom, obate inom, ogobakkigirogo punuk, ten anggen yugu negen awo ambit-mbit wake pogom, abu ambit-mbit warak pogom, waganogo iyok-obate eerak nogo etenggen ambit mban eerogo pogo nogogwaarik,

¹⁸eno'mbak 6 aret warak eerogo punuk, eno'mbak 6 nogo ti, eebe ambit paga nen aru pa'nggwe kenagan eerogo wumbugwi, ogwe pa'nggwe kenagan eerogo wumbugwi, eereegwaarak.

¹⁹Eeko nogogwaarik, no'mbak 6 nogo inalitak lombok paga ten anggen yugu negen awo ambit-mbit wake negen, abu ambit-mbit warak negen, ndi alom me nen nok-nok era'nggup me kenagan obogum kunogo pugwi,

²⁰ndi, oolo eebe mippereegwaarak paga ten anggen yugu negen awo ambit-mbit wake pogom inom, abu ambit-mbit warak pogom inom, obogum 4 aret kunogo pugwi,

²¹eno'mbak iyaalok mbere wumbereegwaarak nogo paga ten anggen ambit-mbit negen obogum kunogo pugwi, eno'mbak oolo mbere wumbugu nogo paga ambi obogum kunogo pugwi, ndi, irip mbere wumbugu nogo paga togop mban obogum kunogo pugwi, eerit eno'mbak 6 wumbereegwaarak nogo paga abok togop mban eerogo pugwi, eereegwaarak.

²²Eno'mbak paga ambit-mbit negen obogum kunogo pereegwam nogome mbuti emas ti mendek paga mban etenggen ambit mban aruwak nduk, aan libik-lebek eerogo pereegwaarak.

²³Pogo nogogwaarik, ndi eebe paga eno'mbak 7 kuli eerogo wumbit nogogwaarak nogo inom, keele kani nengge kenok abo mbanggak inom, ndi wuninik logowak nduk, eeko menggaarak pegak tenggap inom, ti apit aret mbuti emas at mendek paga mban ogobakkigirogo pogo logonet,

²⁴ndi eebe inom, maluk age kenok ogobakkigikak yi mendek ndi mendek inom, mbuti emas at mendek paga mban aaninggin 34 wakkagak ogobakkigirogo pereegwaarak.

²⁵Obari abe kaga kani kunggak eyo liibu paga ogobakkigiko logonet, aanunggut aru-ogwe, agi-ogu abo ndak-ndak metet oolo negen wakkagak eebe ndoonogo pugwi, owak metet ambiret negen wakkagak irip mbangga'lek to eerogo mippugwi, eeko nogogwaarik,

²⁶eyo eebe ndoonak inom, kobat agi-ogu, aru-ogwe nabenak abok aret inom, owak mippereegwaarak irip to eerogo pugu inom, nogo ti, mbuti emas at mendek paga mban nabenogo pit nogo nogogwaarik, eebe ndoonak eraaninu yendok-wandok muun negen mbuti emas paga komaarogo punuk,

²⁷eyo mambunuk, eewu'nuk nugu logowak nduk, tenggen mbuti emas paga mbere yarogo muun negen yendok-wandok eerak abu'me eyo owak mippugu eraaninu peenok-peenok time pugunogo pogo nogogwaarik,

²⁸kani kunggak eewu'nuk negak yuwak nduk, eyo liibu loonogo Mbuti emas paga nabenogo pereegwaarak.

²⁹ Ogobakkigirogo pogo nogogwaarik, Ala ake leenogo puwak nduk, amburu kilirogo pogo logorak mendek ogobakkigikwi, ndi, yi mendek ndi mendek obari obeelom mendek waganggo nogogwaarik, it aap ineenu nen obari abu obeelom mendek ogobakkigiko mengga kwak obari abe kaga alik ambi inom enggela'me lek obari abe kaga ti mendek paga mban ogobakkigikwi, eereegwaarak.