Read Western Dani Wundeegwaarak 39 Bible Online

Wundeegwaarak 39 - Western Dani bible

Wundeegwaarak 39

¹At Aliku ALA nen Muta yoreegerak nogo ndak-ndak at Karun apuri inom Ala unde logonet, inayum alik leenak nogo mendek yirikko'nok, o mage logowam aakumi inake eeri unggwogo logowak nduk, ndomba eeruwak laanak mu kunik inom, maa'ngga kunik inom, maa'ngga anggup kunik inom, nogo paga aap Karun apuri inom inayum penggaareegwaarak.

²Penggaako logonet, mbuti emas aan libik-lebek eerogo mbuulogwe nggagik-nggogok eerogo pogo nogogwaarik, aap ineenu nen yabenggek-ndabenggek eerogo penggaako mengga kwak, ligi nogo paga perenogo punuk, nogo paga inom, ligi yawenak amuni mbanak laanak nogo paga inom, inayum agale warak akem yirikak epod nogo penggaarogo pugwi,

⁴inuum peenok-peenok inambo'me-inaame te'mulunggo logorak agale mbere eerogo penggaakwi,

⁵ndi, epod abo ogu paga kobee'le inaa'ndok me yonggon negen ineenggi amburu yarak yirik logorak nogo yum epod imbirak etenggen ambit kunnaruwak nduk, ligi ndomba eeruwak paga laanak mu kunik inom, maa'ngga kunik inom, maa'ngga anggup kunik inom, ligi yawenak amuni mbanak laanak inom, nogo ti paga mban, Penggaariyak o, yinuk, at Aliku ALA nen Muta yoreegerak nogo ndak-ndak aret penggaakwi, eereegwaarak.

⁶Eerogo punuk, yugum pugagi negen pindan-pindan eeke menggerak kiritolit nogo muun negen mbuti emas paga yengget-wangget komaarogo yugum nogo paga nabenogo pugwi, aap ineenggi amburu pegak cap ogobakkigiko mengga kwak, at aap Iterali apuri inendage yugum nogo paga ayo waganogo pugwi,

⁷eerogo pogo nogogwaarik, at Aliku ALA nen Muta yoreegerak nogo ndak-ndak aakumi Iterali aberinake logowak nduk, yum epod agale warak penggaarogo pereegwam nogo paga pugunogo pugwi, eereegwaarak.

⁸Eerogo punuk, yum ko'no negen mendaarak amiguwak paga nabenak logorak nogo penggaariyak nduk, ligi mbuti emas inom, ndomba eeruwak paga laanak mu kunik inom, maa'ngga kunik inom, maa'ngga anggup kunik inom, ligi yawenak amuni mbanak laanak inom, nogo paga it aap ineenu nen yum penggaako mengga kwak, ayum agale warak akem nggorek yirika penggaareegwaarak nogo ndak-ndak aret penggaareegwaarak.

⁹Penggaako logonet, kayin eebe yunggunogo irip aru-ogwe inom, ambe agi-ogu inom, nogo ti ndak-ndak mban 22 senti paga wakkogo nogogwaarik,

¹⁰yugum onggo nggwok permata nogo mendek paga mban nabenogo puwak nduk, ogowa 4 koonogo punuk, yugum maa'ngga kunik yatipit ambi waganggwi, yugum kiritolit ambi waganggwi, yugum malakit ambi waganggwi, eeppunuk, ogowa aa'nduk koonogo pugwi,

¹¹ti'nuk, yugum yi'mbaani kunik ambi waganggwi, yugum laturit ambi waganggwi, yugum yatipit mili ambi waganggwi, eeppunuk, ogowa ambo'me koonogo pugwi,

¹²ti'nuk, yugum ambat ambi waganggwi, yugum akik ambi waganggwi, yugum ketubuk ambi waganggwi, eeppunuk, ogowa ambo'me pugwi, eerit

¹³ogowa akombaga lombok ti, yugum pirut inom, yugum kiritoperat inom, yugum neperit inom, nogo paga koonogo pereegwaarak. Eeko nogogwaarik, yugum 12 koonogo pereegwaarak ti paga omaawi eerak logowak nen muun negen mbuti emas paga yendok-wandok komaarogo nabenogo punuk,

¹⁴yugum 12 koonogo pugu ti paga aap Iterali apuri 12 nogo inanebunu ambitak mban cap negen eerogo inendage ayo waganogo pereegwaarak.

¹⁵Eeppogo nogogwaarik, ko'no negen amiguwak paga nabenak logorak mbuti emas paga yonggon-yonggon yarogo pogo nogogwaarik,

¹⁶mbuti emas paga muun negen yengget-wangget eerogo pugwi, ndi, Mbuti emas paga tenggen mbere yarogo pugwi, eerogo punuk, tenggen mbere nogo waganogo yum ko'no negen amiguwak paga nabenak logorak irip peenok-peenok pugunogo pogo nogogwaarik,

¹⁷mbuti emas paga yonggon-yonggon yarak mbere nogo tenggen mbere yum ko'no negen irip paga pugunik nogo paga te'mulunogo pugwi,

¹⁸ndi, mbuti emas paga yonggon-yonggon yarak irip mbere nogo waganogo Mbuti emas paga muun negen yengget-wangget eerak yum epod paga nabenak enaame wonage nogo paga imbirak lambunogo maakwi, eereegwaarak.

¹⁹Eeppogo nogogwaarik, tenggen mbere ambinom mbuti emas paga yarogo yum epod abo ogu yum ko'no negen amiguwak paga nabeniyak peenok-peenok ambokan paga pugunogo punuk,

²⁰yum epod agale uum paga nen nugwa irip wonok yonggon yiriyak irimbaga pi nawam taati mbuti emas paga tenggen mbere ambinom yarogo pugunogo pogo nogogwaarik,

²¹yelek ponggok ari logokwak, omaawi eerak logowak nduk, yum ko'no negen abo paga tenggen pugunik nogo inom, tenggen yum akem yiriyak epod abo paga pugunik wonage nogo inom, imbirak lambunogo keele kibu-kibu nogo paga maarogo pereegwaarak. Ti eereegwaarak ti, at Aliku ALA nen Muta yoreegerak nogo ndak-ndak aret eereegwaarak.

²²Eerogo pogo nogogwaarik, aap Ala unde inayum akem yiriyak epod nogo endekem nggwe kagak, yum nggorek akem yiriyak nogo ti, it aap ineenu nen penggaako mengga kwak kayin kibu-kibu nogo paga penggaako logonet,

²³inenggaanok nggelenogo puwam kayin oolo eno mbanogo punuk, nibik yukwak, ambe paga yum ooragik negen penggaarogo pugwi,

²⁴ndomba eeruwak paga amu kunik laanak inom, maa'ngga kunik laanak inom, maa'ngga anggup kunik laanak inom, ligi yawenak amuni mbanak laanak inom, nogo paga eyo delima anggen ngginim wurogo yum abo paga pugunit nogo nogogwaarik,

²⁵enggela'me lobale eekak mbuti emas at mendek paga ogobakkigirik pugunogo pit nogwe, eereegwaarak.

²⁶Aakumi inake eeri unggwagak eeko logonet, yirikak yum abo paga eyo delima anggen nogo pugunogo wuppi wogwe, mbuti emas paga ogobakkigirik lobale eekak nogo pugunogo wuppi wogwe, eerit yum abo paga yendok-wandok pugunogo pit nogogwaarak. Ti eereegwaarak nogo at Aliku ALA nen Muta yoreegerak nogo ndak-ndak aret eereegwaarak.

²⁷Eerogo pit nogo nogogwaarik, Karun apuri inom inayum akem agi yirikak nggorek ti, kayin yawenak amuni mbanak paga it aap ineenu nen penggaako mengga kwak penggaarogo pugwi,

²⁸ndi, inabetagi perenogo puurak inom, perenogo punuk keele maariyak inom, yum ogu akem yirikak inom, nogo ti, ligi yawenak amuni mbanak lombok laanak paga penggaakwi,

²⁹inagabee'le ti, ligi yawenak amuni mbanak laanak inom, ndomba eeruwak paga amu kunik laanak inom, maa'ngga kunik laanak inom, maa'ngga anggup kunik laanak inom, nogo paga it aap yum etenggen yabenggek-ndabenggek penggaako mengga kwak, penggaarogo pugwi, eereegwaarak. Ti eereegwaarak ti, at Aliku ALA nen Muta yoreegerak nogo ndak-ndak aret eereegwaarak.

³⁰Ti eeppogo nogogwaarik, Ala ake leenak ayuk warak kogo logowak nduk, mbuti emas at mendek paga meeli negen ogobakkigirogo punuk, nogo paga wone, Aliku ALA Ake Leenak, eerogo cap negen ayo waganogo pogo nogogwaarik,

³¹at Aliku ALA nen Muta yoreegerak nogo ndak-ndak keele kibu-kibu nogo paga yum anobak me perenak wonage nogo paga nabenogo pereegwaarak.

³²At Aliku ALA nen, “An ninom lambungge logowam ooliya yogop aret wuriyak o,” yinuk, Muta yoreegerak nogo it aakumi Iterali nen ndak-ndak li'luk ogobakkigirogo pogo nogogwaarik,

³³Muta owagam pi wogogwaarak nogo ti, ooliya eebe wuriyak kayin tabak inom, inikime eekak yuurak yi mendek ndi mendek inom, enonggon waganggak inom, eyo owak mippuurak inom, eyo karo-karo nappuurak inom, owa'nagat owak mippuurak inom, iyok inom,

³⁴ndomba ngguunok agabolo paga maa'ngga warogo penggaarak obaga lenggenogo puurak inom, lumba-lumba yi inikime menggaarak agabolo inom, yum tabak o mage lombok logowam noberak logorak inom,

³⁵Ala wone yugu yonggolak logorak aloobut mbanak inom, eewu'nuk negak eyo loonak inom, Ala inom lambuni wage logowam abiringga nariyak inom,

³⁶oroti pegak eyo ndoonak inom, ti paga eekak yi mendek ndi mendek inom, Ala eebe wonage mbaruwak nduk, oroti inom,

³⁷ndi wuninggak mbuti emas at mendek paga ogobakkigirik owak inom, eno'mbak ogobakkigirik inom, ndi ti paga eekak yi mendek ndi mendek inom, wuninggak amburu inom,

³⁸obari abe kaga kani kunggak emas paga nabenak inom, Ala ake leenogo pogo logonet kilippiigak amburu inom, obari abe kaga inom, yum tabak tungga paga tugunggak inom,

³⁹ake warogo kani kunggak tembaga paga nabenak inom, mbuti tembaga paga mbutimanggen yonggon-yonggon yarak inom, eebe eewu'nuk negak eyo loonak inom, kunggo logonet, yi mendek ndi mendek eekak inom, ineenggi-iniyok kookak eebe inom, alom kwippuurak inom,

⁴⁰owa'nagat wuriyak paga yum tugunogo wuppi wagak inom, owa'nagat owak mippuurak inom, iyok eerak inom, tungga paga yum tuguniyak inom, omaawi eekak keele inom, omaawi eekak mbuti owak inom, Ala inom lambungge logowam wuriyak yi mendek ndi mendek eekak yuurak abok aret inom,

⁴¹Ala awooliya wuriyak o magame aakumi inake eeri unggwogo logonet, yirikak yum ake leenak at Karun ayum inom, apuri inayum inom, abok aret

⁴² at Aliku ALA nen Muta eeriyak yoreegerak nogo ambiriluk ambi wuppuulik abok ndak-ndak aret ogobakkigirogo Muta owagam pi wogogwaarak.

⁴³Pi wogo mbareegwa, Muta nogo at Aliku ALA nen eeriyak yoreegerak nogo ambiriluk ambi wuppuulik abok ndak-ndak lombok eereegwaarak kage nagagerik, ale'nggen inoba piyareegerak.