Read Western Dani Wundeegwaarak 40 Bible Online

Wundeegwaarak 40 - Western Dani bible

Wundeegwaarak 40

¹Ale'nggen inoba piige mbareegi, at Aliku ALA nen Muta yoge logonet,

²“Tut iyaalok penenak tanggal 1 yi paga aret an ninom lambungge logowam mage logorak nawooliya nogo wuru o.

³Wuke logomenggendik, noone yugu naloobut mbanak me yonggolak nogo pi unggwage logomenggendik, nobarak logorak nduk, yum tabak tugunogo wuppi wage,

⁴eyo oroti pegak ndoonak nogo pi unggwage logomenggendik, ti paga eekak yuurak yi mendek ndi mendek nogo koonogo obaga pege, eeke logomenggendik, ndi eebe pi unggwage, ndi eno'mbak koonogo kwippit nage,

⁵obari abe kaga kani kunggak ake mbuti emas paga ogobakkigirik nogo wonok an noone yugu naloobut mbanak me yonggolak akem wonage kagak, ena endekem nggwe taati pege, yum tungga'nggi paga tugunogo pege, eeru o.

⁶Ndi, nake warogo kani kunggak ogobakkigirik nogo wonok ninom lambungge logowam tungga paga endekem nggwe taati pege,

⁷ineenggi-iniyok kookak ogobakkigirik nogo wonok ninom lambungge logowam aken nggwe kagak kani kunggo logowam endekem nggwe kagak oolo taati punuk, niyo a'ne korok togon toologo pege,

⁸owa'nagat wuriyak owak yendok-wandok mippit nage logomenggendik, yum tabak penggaarak nogo tugunogo wuppi wage, owa'nagat tu unggwogo logowam nogo paga yum tugunogo wuppi wage, eeru o.

⁹Eeke logomenggendik, an nake leenogo pege logonet, kilippiyoorak amburu nogo wagangge logomenggendik, nawooliya wurik inom, yi mendek ndi mendek inikime wonage inom, yi eekak ndi eekak ake inom, abok aret nake leenak logowak nduk, amburu labunogo pit na'nuk, nake leenogo pege,

¹⁰ndi, nake mondok alik leenak logowak nduk, nake warogo kani kunggo logowam paga inom, ti eeko logonet eekak yuurak yi mendek ndi mendek paga inom, amburu labunogo pit na'nuk, nake leenogo pege,

¹¹ndi, ineenggi-iniyok kooko logowam paga inom, kwippuurak iyok paga inom, amburu ti labunogo pit na'nuk, nake leenogo pege, eeru o.

¹²Ti eeke logomenggendik, Karun inom, apuri inom, wogoren an ninom lambungge logowam nawooliya wurik tungga'nggi paga taati piinok, niyo paga inabin koorogo piige logomenggendik,

¹³at Karun ti, an neebe unde logonet, nake eeke logowak nduk, yum yirikak abu leenak nogo Karun yirippege logomenggendik, amburu anobak paga kilirogo punuk, nake leenogo pu o.

¹⁴Ti eeppunuk, Karun apuri nogo kowagam piya wage logomenggendik, inayum akem agi yirikak nggorek nogo yirippiinok,

¹⁵an neebe unde logonet, nake eeko logowak nduk, inogoba amburu kilippegendak ti ndak-ndak aret amburu inoba kilippiyet o. Amburu inoba kilippiyamenggendak ti, it inapuri nda'narit wundi wogwe nogo an Ala neebe unde logonet, mondok-mondok eeko logowak nduk, togop aret eerogo piyaamunggun o,” yinuk, yoreegerak.

¹⁶Yoge mbareegi, at Muta nen at Aliku ALA nen yoreegerak nogo ambi wuppuulik mondok ndak-ndak eeke logonet,

¹⁷it Iterali o Metit nen wundi wogogwaarak kuli nen tahun ambiret abu eeppunuk, ambi eeke paga tut ambi Penenak tanggal 1 ti paga aret

¹⁸at Muta nen ooliya ti wuke logonet, eyo owak mippuurak nogo paga iyok kunogo pege, owak mippuurak nogo paga eyo karo-karo nappit nage, eeke nagagerik, mippit nagagerak.

¹⁹Mippit nage nagagerik, yum oo'ngget tabak nogo lenggenogo punuk, obaga yum tabak lumba-lumba agabolo paga penggaarak nogo lenggenogo pereegerak. Ti eereegerak ti, at Aliku ALA nen yoreegerak nogo ndak-ndak aret eereegerak.

²⁰Eeke nagagerik, at Aliku ALA nen Muta yoreegerak nogo mondok ndak-ndak Ala wone yugum paga mbanak nogo waganogo aloobut mbanak me nogome yonggologo punuk, abiringga narogo pege nagagerik, eewu'nuk negak eyo loonak nogo tenggen yarak me nogome mambunuk, aloobut mbanak wonok ooliya wurik mage lombok logowam nogome pi unggwagagerak. Pi unggwage nagagerik, aloobut mbanak me Ala wone yugu yonggolak nogo taberak logowak nduk, yum tabak nogo tugunogo wuppi wagagerak.

²²Wuppi wage nagagerik, at Aliku ALA nen Muta yoreegerak nogo ndak-ndak oroti pegak eyo ndoonak nogo Ala inom lambungge logowam ooliya wurik yum tugunik kagak magame o omarip paga pa'nggwe time pege nagagerik, oroti worarak nogo eyo ndoonak ogombaga Aliku ALA enggaanom paga taati pereegerak.

²⁴Pege nagagerik, at Aliku ALA nen Muta yoreegerak nogo ndak-ndak ndi nogo owak waganogo Ala inom lambungge logowam ooliya wurik magame o ame pa'nggwe eyo ndoonak nogome ena koonogo Aliku ALA enggaanom paga pege nagagerik, nogo paga eno'mbak nogo kumbit nagagerak.

²⁶Kumbit nage nagagerik, at Aliku ALA nen Muta yoreegerak nogo ndak-ndak kani kunggak mbuti emas paga ogobakkigirik nogo waganogo, Ala inom lambungge logowam ooliya wurik magame yum tugunik me eraaninu endekem nggwe taati pege nagagerik, obari abe kaga nogo waganogo kani kumbunuk, yum tabak nogo waganogo ooliya wurik tungga nogo paga tugunogo pereegerak.

²⁹Ti'nuk, at Aliku ALA nen Muta yoreegerak nogo ndak-ndak Ala ake warogo kani kunggak nogo waganogo, Ala inom lambungge logowam ooliya wurik magame tu unggwogo logowam taati punuk, Ala ake warogo kani kungge, gandum anggen yigirogo Ala ake wogoge, eeke nagagerak.

³⁰Ti eeke nagagerik, at Aliku ALA nen Muta yoreegerak nogo ndak-ndak aret Muta inom, Karun inom, apuri inom, nen Ala inom lambungge logowam ooliya wurik me time unggwi nogwe, ake warogo kani kunggwi, eeruwak nduk, ineenggi-iniyok kookak yuurak ooliya wurik me aken nggwe kagak, ake warogo kani kunggo logowam endekem nggwe kagak, oolo taati punuk, niyo toologo pereegerak.

³³Ti eeke nagagerik, ooliya wurik nogo inom, kani kunggo logowam nogo inom, mangga wagak eyo owa'nagat owak yengget-wangget wuppit nage nagagerik, ti paga yum tabak tugunogo wuppit nage, owa'nagat wurik tungga'nggi paga yum tugunogo wurabit wage, eereegerak. Aliku ALA nen yoreegerak nogo Muta nen mondok li'luk eerogo pereegerak nogo ti aret.

³⁴ Eerogo pege mbareegi, ndugwi nogo wambi wage nagagerik, Ala inom lambungge logowam awooliya wurik nogo paga apit eerogo punuk, at Aliku ALA abinak nogo Ala awooliya wurik o magame inikime nogome eya kwindagala eerogo pereegerak.

³⁵Ndugwi nogo Ala inom lambungge logowam awooliya wurik paga apit eerogo pege, at Aliku ALA abinak o magame nogome kwindagala eerogo pege, eereegerak me, Muta time ungguurak meek aret agagerak.

³⁶Ala awooliya wurik magame ndugwi lenggenak wonage nogo lagi nanuk, nage kenok, it aakumi Iterali nogo mugurok nogwe,

³⁷ndi, lagi nage lek lenggenak mban wonage kenok, it aakumi Iterali nogo puk wonogwe, eerit wogwe iigak,

³⁸o liingge kenok, Aliku ALA andugwi nogo awooliya wurik magame irimbaga lenggenak wonage, ndi, oonikiya age kenok, ndugwi nogo aret ndi wuninik pogom eya eerogo pege, eeke kagak, it aakumi Iterali yagak-ndagak nugu logonet, kogo nogogwaarak.