Read Western Dani Wundeegwaarak 5 Bible Online

Wundeegwaarak 5 - Western Dani bible

Wundeegwaarak 5

¹Ti'nuk, Muta Karun imbirak Pirawun owagam nogo nogogwaarik, at yogo logonet, “At Aliku Iterali inogoba Ala nen ari logonet, An napuri o karume time nalut eeri noorak nappiyaawak nduk, aap Pirawun yori nanip o, ari mbaki, yokkiri wogo o.”

²Yogo mbareegwa, Pirawun nen ari logonet, “Aliku ALA ti, ta me nduk at oone konembunuk it Iterali ti nappiyoorak yogop? Aliku ALA ti, an abu neenggo'lek o. Ndi, aakumi Iterali nawak nen teppiyaagin mondok lek mban.”

³Yorage mbareegi, at yogo logonet, “Aakumi Iberani inogoba Ala nogo ti, muk ninom lambunggoorak me, nogo kenagan yippegak o karume time nogo logomonggoorik, at Aliku ninogoba Ala ake warogo wogori nawok nduk, yokkiri wogo o. Togop eeri nogwe lek niinok, andi nggwok ninoba pinanege, wim paga nen ninookwi, eerukwak me nduk yokkogo o.”

⁴Yoreegwaarak kwe, Pirawun nogo nen Muta Karun imbirak yorage logonet, “It aakumi Iterali yabu eekwi ti, nonggop nduk kit meek eerogo punuk, wogoren noorak nduk yogo ogotik? Kit kunduk kinom aret yabu eeri nanip o.”

⁵Yorage nagagerik, ambinom yorage logonet, “It aakumi Iterali mendek ineebe ambik a'nuk yabu eekwi me, kit nen it yabu eekwi nogo non mbambiya wogotak me, mage o!” yinuk, yoragagerak.

⁶Yorage nagagerik, ne ti eyom paga Pirawun nen at awuri Metit mendek yabu eekwi unde inom, it Iterali mendek inawuri yabu lengganinako menggaarak nogo inom, wone lengganogo yorage logonet,

⁷“It aakumi Iterali mendek ti, ineenggi tanep logonet, Ninogoba Ala ake warogo wogori nawok nduk, E, yo'niret o, inoone nabenak mban yo'nugwi me, wiiringga negen mbanogo nggween nggabok inom nenggelak-kenggelak agago woraruwak nduk wogorogo monggoorak nogo, yogondak kuli wogoroorak mage o. Ata, it inalik nen kuwak eerogo aa'nduk, Yi kuli worariyak o, wone yugu worako nogogwaarak nogo ndak-ndak worako logowak nduk, yoraanip o.

⁹It aap Iterali mendek ti, pilit wone agan wogwe inaruk konembunuk, yabu eekwi nogo mbo pugwi iyo, ineebi mbakugak yabu aaninggin ambinom inoba piigo logonip o,” yinuk, yoragagerak.

¹⁰Yorage mbareegi, Pirawun awuri yabu eekwi inarum wonogwe nogo inom, it aap Iterali mendek inawuri yabu lengganinaka nogo inom, wundi nogo nogogwaarik, aakumi Iterali yorogwe, “At Pirawun nen ari logonet, An wiiringga ambinom wogoraagin lek me,

¹¹inalik nen kwaari nogo logomenggaarik, wonok woraanuk, yabu aa'nduk eeko nagaarak ti ndak-ndak aret eeko logowak, yegerak o.”

¹²Yorogo mbareegwa, it aakumi Iterali nogo o Metit irip-irip time wiiringga mbanak lek age kenok, alom pugu ti aret kuwak eerogo wonok wogo nagaatik worakaatak kwe,

¹³Yi kuli worariyak o, wone yugu ndak-ndak worakwi lek mbuuluk mban worakwi at Pirawun awuri nen iigo nogogwaarik, Wokkirogwe niigak worako nogotak nogo ndak-ndak eeka'lek me, ambinom worako logonip o, yinuk, inoone nabenak mban yorogo nogogwaarik,

¹⁴it Iterali inawuri yabu lengganinaka nogo yorogo logonet, “Kit aa'nduk nggween yugum, Yi kuli worariyak, wone yugu nogo yogondak inom, kobit inom, ndak-ndak eerulik me, nonggop nduk eekotak?” yinuk, yawi inooko nogogwaarak.

¹⁵Inooko mbareegwa, it aap Iterali awuri yabu lengganinaka nogo nen Pirawun owagam nogo nogogwaarik, yogo logonet, “Ninogoba Pirawun wae. Nit kayeloman mini yi, nonggop nduk togop eeppinanege agandik? Kawuri nen wiiringga wo'niraga'lek logonet kwe, Yugum aa'nduk worako nogotak nogo ndak-ndak aret worako logonip o, yinuk, yawi ninookwi ti, alom nit lek o. Alom kat kawuri aret kagak, ninooko agaarik o.”

¹⁷Yogo mbareegwa, Pirawun nen it yorage, “Kit kineenggi tanep aret kiigi o. Kineenggi tanep wonogo logonet, Aliku ALA ake warogo wogori nawok o, yinuk, yo'niri wagak mban eekwi yi,

¹⁸yogondak aret yabu eeri nanip! An wiiringga wokkiraagin mondok lek me, kinalik nen kwaarogo, Ne ambi paga yugum yi kuli worariyak, yugu nogo ndak-ndak aret worako logonip o,” yinuk, yoragagerak.

¹⁹Yorage mbareegi, Ne ambi paga yi kuli worariyak, wone lengganak nogo ambi mbo puurak lek ndak-ndak aret eeko logorak yoragagerak nogo it aap Iterali inawuri yabu lengganinaka nogo nen konenggo nogogwaarik, “Aaninggin lombok ninoba pinanege yi, iya!” yinuk,

²⁰Pirawun nogo mbo punuk, Muta Karun imbirak endekem toginakwi me, iniya wunggo nogogwaarik,

²¹yorogo logonet, “Kit eekotak paga Pirawun awuri inom nen iri'ngga pili agaatak obari ndi wuke menggi kwak, ninendage maluk eerogo pinanogotak paga ninooruwak nduk paloowi wogorogwe negen eekotak me, at Aliku ALA nen kit eekotak nogo liippinagage logomenggerik, kinowak loongginabigin o,” yinuk, yorogogwaarak.

²²Yogo mbareegwa, Muta nen Aliku ALA ambinom yoge logonet, “Nogoba wae! Kat nonggop nduk aakumi Iterali yi, aaninggin inoba luurogo piige agandik? An ti aret eeppiyaakit nduk nappani wagandak ya?

²³Kat wone yo'negendak nogo wonok Pirawun yori nagarak kuli paga nen kapuri abunuk aaninggin inoba piige kagak, inagap ndaka'lek keegi o,” yinuk, yoreegerak.

²⁴Yoge mbareegi, at Aliku ALA nen Muta yoge logonet, “An nen yogondak Pirawun eeppege nogo kenegen neyaamunggun o. An neenggi omaawi paga eeke neenok, at Pirawun nen aakumi Iterali mendek wundi nawak nduk, teppiige, an neenggi omaawi paga eeke neenok, aakumi Iterali o Metit nen wumbiige, eerigin aret o,” yinuk, yoreegerak.