Read Western Dani Ayup 12 Bible Online

Ayup 12 - Western Dani bible

Ayup 12

¹Yoge mbareegi, Ayup nen wone onggo at Topat yoge logonet,

²“Kit aap ti mendek abet aret kiigi o. Nit kanggwi niinok, aap iniki warak wonogwe nogo, Lek aret arigin, mbakwi kiigirak kwe,

³Yi wone ndi wone liippogo monggotak ndak-ndak An kunduk liippege minggirak me, Kit mban iya lek o. Ninom ndak-ndak aret ogoorik o. Kit wone yogwe ti, Aap ambi ta nen eenggo'lek agaarik mbakop?

⁴Noreewi nen aret meek nombako logonet, nagi'ndok kanggwi, An maluk eeka'lek niniki abe koonak logonet, At Ala yoge neenok, Wone onggo yo'nege menggerak kwe, yogondak nagi'ndok kanggwi, Eeko agaarik o.

⁵Aap ambi eraabin paga nage me, Perak togon ngginnage menggi kwak, Aap ambi aaninggin oba age kenok, It aap iniki ugun tayenak wonogwe nen, Kayik a! Op eekkoligi, yinuk, mbako menggaarak.

⁶It aap o piyangga nogo iname op aret wonage, Inagugi yonggolak wonok nugwi nen Ala anini wunduwak nduk eeppugwi nogo, Iniki ugun tayenak aret wonogwe, Eeko agaarik o.

⁷Nggeewo-wam kin wogiigwi kiinok, it nen mamunggirogwe, Towe wiga agan nugwi nogo, Kin wogiigwi kiinok, it nen onggo yokkirogwe,

⁸O nggween paga yime wonage menggerak inom, Yi yenggenak laut inikime menggaarak yikwe inom Yokkiraawak nen yorogwe kiinok, it nen mbininogo yokkirogwe, Eerugun o.

⁹Yi mendek ndi mendek arit wage menggerak nogo, Aliku ALA nen aret eerit wage menggerak it ambi ineenggo'lek lek abok ineenu aret o.

¹⁰Yi mendek ndi mendek ineenik wonogwe nogo abok aret at eenggime wonage. Yi aap ndi aap ineenik logowak nduk, iniki unde wonage, Eeke menggerak o.

¹¹Ninamili paga mbi ombat wakkogo monggo kwak Wone yogwe nogo, ninaruk paga konembunuk, Yi abe aret kagi, yinuk, waganggo monggoorak nogo lek a?

¹²Aap inanggok kenok iniki warak logonet, wone koonogo yogwe, Aap ndarak iigak, tahun ambik eerak kenok, wone mbet-mbet liippugwi, Eeko menggaarak nogo lek a?

¹³Togop aret kwe, iniki warak inom, omaawi inom, Ti Ala paga mban wonage o. Ndi, wone abu koonogo punuk yorage, Yi wone ndi wone liippit nage, Eeke ti, at mban unde wonage me,

¹⁴At nen minogo pege kenok, aap ambi nen obaane'me wuke, Ndi, at keele maarogo pege kenok, aap ambi nen keele piinogo ame nappege, Eeriyak meek o.

¹⁵At nen mayu wage kero, tu narogo pegetak me, o kibi age, Ti'nuk, mayu woraawak nduk, tu kuurogo pegetak me, Mayu wangge logonet, niyo wu'nuk wage, Eeke menggerak o.

¹⁶At ti, omaawi wonage, Eeriyak mbaketak nogo aret eeke, Eeke menggerak me, Aap pilit wone yaga inom, Pilit wone oba pege nogo inom, Imbirak abu'me piirogo menggerak o.

¹⁷Aap nagawan inagap mbelanak iigak, at nen wogoren nege, It aap wone owak loongga nogo, at nen wi negen kunogo piige,

¹⁸Aap inendagembogut nogo, inayum abe yirik nggoorogo piinok, Aap we ugun mendek inayum yirippiige,

¹⁹It aap Ala unde nogo inagap mbelanak iigak wogoren nege, Aap inengga warak nogo tebenogo piige,

²⁰It aap inoone abe yaga nogo, inoone lek eerogo piige, Aakumi inoweewi iniki warak nen Yi wone ndi wone koonggwi nogo, iniki kobak eerogo piige,

²¹Aap inengga warak nogo meek eerogo piige, Inomaawi ambik nogo inomaawi lek eerogo piige,

²²Oonikiya paga wone kote koonggwi nogo, tena'me eerogo pege, O apit agaatak kenok, o eya eerogo pege,

²³Yi aakumi ndi aakumi ambik lombok eerogo piige, Ti'nuk, lek eerogo piige, Yi aakumi ndi aakumi ambik wiganogo piige, Ti'nuk, mak eerogo piige,

²⁴O nggween paga yime it aap inoweewi wone lengganinaka nogo, iniki apit eerogo piige, O anggu paga aakumi lek me time ugun kobak nugu logowak nduk nappiige,

²⁵Aap anggur amburu nenok, kumili kunggo nagaatik, Langgok-panggok nugu mengga kwak, O eya lek apit aago kenok, ineenggi nduk nugu logowak nduk eeppiige, Eeke menggerak at aret o.