Read Western Dani Ayup 13 Bible Online

Ayup 13 - Western Dani bible

Ayup 13

¹Ti apit aret an lombok nenegen abe paga nen kage, Naruk abet aret konembunuk liippege, Eekirak o.

²Kit kineenu nogo an kunduk neenu mban wonage me, Kit mban iya lek o. Ninom ndak-ndak aret ogoorik o.

³Togop aret kwe, At Omaawi Lombok Menggerak nogo an nimbirak wone mbangge, Ala enggaanom paga naana'le mbanggolage, Eerikit mbake me,

⁴An wone abet aret ari neegak kwe, An ari nogo yaga-kaga eerogo pilit wone agan nogo monggotak me, Kit abok aret obeelom eerogo piiga mendek lek aanom warogo piiga mendek aret ogotik o.

⁵Kinoone yaga'lek puk logonetak en, It aap yi, iniki warak nen agaarik, kinomba'netak o.

⁶Togop aret me, kinaruk o. Naana'le mbanggolage nogo konenggwi, Wone nambe paga wunake nogo liippugwi, Ee'nip o.

⁷Ala ambi eekkolaawak nduk kinoone pilit yogwe, Ndi, Ala ambi eeppuwok o, yinuk, kinoone ugun-ugun agan nugwi,

⁸Ala ale'nggen kinoba pinagawak nduk eekwi, Inowak loongge me, kinom a'nuk, at Ala aana'le mbanggwi,

⁹Ala nen kit kiniki kwaake kenok, Op aret, yigin, mbakwi, Ndi, aakumi inambokan laganggo mengga kwak, at ambokan laganggwi, Eeriyak op aret mbakop?

¹⁰Kote at kinom ari nogwe kiinok, Ala nen oone omaawi paga ninaruk warigin, abet aret mbako logonip o.

¹¹At mondok iya tiyanak wonage kogwe kenok, kinamineeri ni'nek nage, Kinagabiti nen kinaganak nukkiranet nage, Eeriyak lek mbakop?

¹²Kinawoneelom mbininit wogwe ti, liirubu kwak aret agan wogwe, Ndi, wone kinaana'le mbanggologwe ti, purok kwak aret kagak yogwe, Eeko ogotik.

¹³Togop aret me, Nano mendek noba age kenok arigin nogo, Yokkirage me, kinoone puk logonip o.

¹⁴Maluk eerogo paniyak kagak, Woppunuk, niniki unde wakkolage logonet, Yoriyak ee'nake ti, nonggop nduk ee'nake o?

¹⁵An ambi eeriyak niniki lunik lek me, nooriyak mbake kagak kwe, Nawone nogo at enggaanom paga an nen aret naana'le mbanggolaagin o.

¹⁶Aap Ala abet mbaka'lek maluk mendek nen Ala owagam noorak inagabiti mbakwi me iigak, An nen at owagam nage neenok, Aap yi abe o, yinuk, nili yigin kwa?

¹⁷Togop aret me, an noone yokkirage yi, liirogon aret kinaruk konenggwi, Nawone amburu mbanggolage yi, liippunuk kinikime waganggwi, Eeko logonip o.

¹⁸An naana'le mbanggolage logonet, Ndogop yigin o, yinuk, wone koonogo pege, Aap yi maluk eeka'lek abe aret o, yinuk, at Ala nen yo'nirigin neenu age, Eekirak me,

¹⁹Aap ta nen, Ndogop eekendak o, yinuk, wone an noba paniyak mbakop? Maluk eekirak ambi abet aret wonage kenok, Noone lek logonet kambuurak op aret o.

²⁰Ala wae. Wone alom mbere yokkege yi, Konembunuk eeppanege keenok, An kumaarak logogin lek kenggaanom paga ungguurak nogo yi o.

²¹Kat keenggi pippanogo logonet, Aaninggin noba panege nogo tayoppege, Ndi, nagabiti mbarikit nen, Iniki ma'naruwak nduk eeppiige nogo mendek Noba panegak mban eeke nogo teppege, Eeru o.

²²Ti eeke logomenggendik, wiinege keenok, an nen, Wae, yokkege, Ndi, lek kenok, an nen wone ari me, kat nen onggo an yo'nege, Eeruwok o.

²³Wone yugu taganogo pege, maluk eeke, Eekirak ti, mande negen eekirak o? An maluk eeke, neraambe ninggin eeke, Eeke neegendak nogo mbininogo yo'niru o.

²⁴Alom nano paga kenete kumaakkolage, Ndi, Kat nawim o, yinuk, yo'nege, Eeke agandik?

²⁵An nogo ti, O wiya nen eyoongga wonok nage kwak me, nagabiti mbake, Ameneno wonok nage menggi kwak me, mu'neren wage, Eeke ti, op mbaken?

²⁶Niniki andi-pandi ee'nake kagak Ndogop eekendak o, yinuk, liiru negen mbanogo pege, An wulaga awo paga maluk eeke nagagirak nogo onggo eeppanege,

²⁷ Niyok mbuti keele paga maarogo panege, Noorak mbariminggim nage me, kenegen wo'neren nage logonet, At iyok a'lip nombake logonok nduk, niyok nomonogo panege, Eeke menggendak o.

²⁸Togop me, eyo pili a'nuk lek age pogom, Yum kutaabak nenggetak pogom, Nit aap togop aret ogo monggoorak o.