Read Western Dani Ayup 16 Bible Online

Ayup 16 - Western Dani bible

Ayup 16

¹Yoge mbareegi, Ayup nen wone onggo at Elipat yoge logonet,

²“Wone ti mendek mban naruk konenit wundi wage me, Aap niniki eyak wappanega maluk mendek kit aap yi, Ao!

³Kit wone ugun agan nugwi ti, Lek aga'lek kunik aret agan nugwi ya? Nano eekkinake kenok, ninom wone wariyak eekkinake agaarik?

⁴An ee'nake kwak, kit togop eekkinake logonetak nen Kit yogwe ti ndak-ndak an ari, Noone abe koonogo kit kinoba pinagage, Pekkiige logonet neenggi neyak mbanggolage, Eeke logonetak kwe,

⁵Noone paga kiniki eyak wappinagage, Aaninggin kinoba wonage nogo tayok yuwak nduk, Kinabuwa mbake logonet, yokkirage, Eeke logonetak o.

⁶Togop aret kwe, An wone ari neenok, andi-pandi ee'nake nogo lek age, Noone yaga'lek puk wonage neenok, aaninggin noba wonage nogo lek age, Eeka'lek wonage mban aret o.

⁷Ala nen eeppanegak mban eeke paga an nomaawi lek age, Naaganapuri abok aret lek eerogo piige, Eekerak o.

⁸At keele maarogo panggerak paga, Aap maluk eeka o, yinuk, yogwe, An neebenowak ko eerak paga maluk aret neegwi, Eeko agaarik o.

⁹At Ala anini nen nagabolo nibinik-ndelenak eerogo panege, Eebi lombok nomba'nuk, eyak nggilik maake, Eeke kagak, Ninom ogoorak nen inigen abi worarogo panugwi,

¹⁰Aakumi nen, Kayik a! yinuk, nagi'ndok kanggwi, Meek eeppanggo logonet, nagandin telak nookwi, It apit nen inoone yi-wu yo'nugwi, Eeko agaarik o.

¹¹Ala nen neebe waganogo aap maluk mendek wogorage, Aap maluk eeppiiga ineenggime tek eerogo panege,

¹²Neebe-niniki ugun tayenak wonage neegak kwe, At nen nagabolo nibik-nobak eerogo panege, Nenggaanok nggerok togon eeppaninuk, yombak togon eerogo nappanege, Omaale paga nabut mbangge,

¹³At awuri ineegin warak nen Nenaagan-nambokan karugum ne eerogo paniyak koongge, Nabuwa mbaka'lek napenggen polonogo panege, Nambiki tubunogo nggween paga nappege, Eeke logonet,

¹⁴Aap wim kalu-kalu menggi kwak, Ko'lu-kii'me noori wagak mban eeke menggerak o.

¹⁵Ti ee'nake kenok, Nayum nibinik maluk mendek penggaarogo yikkolage, Nanobak liirubu enggela'me mambunuk wonage,

¹⁶Nale ari me nenegen amiya aago wonage, Nenegen amberagap piirogo panege, Eeke kwe,

¹⁷Maluk eekirak ambi kumaapporogo lek aret me, Niniki abe paga tamban eeke agarik o.

¹⁸Kat nggween yi wae. Namiya wangge ti, kagaarogo pege, Nawone amburu mbanuwak nduk ari ti, taganogo pege, Eeriyak mage o.

¹⁹ O yogondak aret an ee'nake nogo, At enegen abe nen kenok yokkiroorak ti, mbogut paga wonage o. An naana'le mbaniyak ti, agi tiyarogon time wonage o.

²⁰Noreewi nen meek eerogo panugwi iinok, Nali-nale wambit wage logonet Ala yoge neenok, Aakumi wone inoba agaatak me, Inoreewi nen inaana'le mbanggo mengga kwak, An aap aret kwe, nore ti nen Naana'le mbanogo Ala yoge menggerak o.

²²Nanuk iniyokan wogolik me nogome Tahun mande negen eeppunuk, an nagin aret o.