Read Western Dani Ayup 17 Bible Online

Ayup 17 - Western Dani bible

Ayup 17

¹Namiya lek tit ee'nabit unggwage, An nda'nagagim abu aret lek age, Taambanuwam ambe pan ari wonage, Eerak wonage me,

²An miyuk-meya eerogo panugwi nogo, nowagam ninggirik wonogwe, Nabuwa mbaka'lek noori wogwe, Eekwi nogo abet aret nenegen iige me,

³Ala wae. Aap ambi nen, Teppagarak onggo an aret arikit o, Yinuk, yigin lek me kat aret aru o.

⁴It wone kin kogwe iyo, iniki apit eerogo piigendak me, Inoone tiyak yogwe iyo, kat nen non mbanogo piige logot o.

⁵Aap ambi nen, Ambi kolaakit o, yinuk, Oreewi inabok wonok yora nage kenok, Apurilogwe aret nggelenogo piyaagin o!

⁶An noba agaarak yi, Yi aakumi ndi aakumi nen, Ha! yinuk, nagi'ndok kanggwi, Nenete paga inowoori lengge eerogo panugwi, Eekwi me,

⁷Niniki wakko'net unggwage paga nenegen ogut eerogo pangge, Neebe apit aret nowak neno eerogo aakumi inagalu'mak kwak eerogo panege, Ee'nakerak wonage neenok,

⁸Aap iniki koonak mendek nen, Iya! yogwe, It maluk eeriyak koongga'lek ugun wonogwe nogo nen, Aap yi iniki abet mbaka'lek nonggop nduk wonage, Yinuk, inanini mbakwi, Eeko agaarik kwe,

⁹Aap iniki abe koonak wonogwe nen it mugurok nogwe nogo aret mugurok nogwe, It aap maluk inikime kumaapporogo wonogolik kenok, iniki kole arit unggwage, Eeko logogun o.

¹⁰Togop aret me, Kit abok aret ambinom yo'nega'mban eeko logonip o. Yo'nega'mban eerumonggotak kwe, Aap ambi iniki warak kinenggela'me wonage an kaagin abu lek o.

¹¹An nda'nagagirak abu yobok yi wage, Koonogo pigirak nogo eeriyak abu meek age, Ndi eerikit, mbakitak nogo lek aret age, Eeke agaarik o.

¹²O apit aret kagak, noreewi nen, O liingge aret, yo'nugwi, O apit age kagak kwe, O eya ari wage agaarik, yo'nugwi, Eekwi kwe,

¹³Aakumi kambunuk nogo menggam ti, Name aret o, yinuk, niniki lunik wonage, O apit me an nogo yegak ogobakkigirogo pake,

¹⁴Nagabolo pili aruwam nggween kabunik nogo yoge logonet, Kat an nogoba aret o, yinuk, yoge, Nagabolo nunggwi puron nogo yorage logonet, Nagalo inom, niriwi inom, kit aret ogotik o, yinuk, yorage, Eeriyak kenok,

¹⁵Niniki lunik ambi wonage mbakop? Ko'lu ndogop eekkake kaamunggun o, yinuk, Ambi yo'niriyak wonage ilik lek a?

¹⁶An kambunuk nogo menggam nage logonet, Niniki lunik wonok lek ari noorak ilik lek a? Nggween ogo menggam time nagabolo inom, niniki lunik inom, time lek arigin lek mbakop? Ari nagin aret o!” yinuk, yoreegerak.