Read Western Dani Ayup 18 Bible Online

Ayup 18 - Western Dani bible

Ayup 18

¹Yoge mbareegi, aap o Tuwa mendek Mbilirat nen wone onggo Ayup yoge logonet,

²“Kat wone agan nage yi, ngge kuli pi namunggun? Kiniki liippu o. Liippege keegak, wone ambi yokkiruwi o.

³Nano nduk nit wam pogom ninombake, Aap wiilu pogom eerogo pinanege, Eeke agandik?

⁴Kalik nen aret kanini eekko'nok kiniki wakkolage me, Kalik kake nen it nggween paga wonogwe yi, mbo punuk mbaganggwi, Kat kake puut-puut obaane'me nen alik me ari nage, Eeriyak op me nduk, ari agandik?

⁵ Aap maluk mendek andi noguk ari, Aga'ni wunuk ari nogo lengge agan unggwage,

⁶Awi paga eya aago wonage nogo yumaak age, Ndi wuninik ame tiyarogon pugu nogo noguk ari,

⁷Amiya wonage paga tu mbe agan nage nogo lek age, Aakumi yoroorak mban koombunuk yorage paga yigeebu wuppake,

⁸Towe pigagangga keele yarak me, At iyok nen wonok eebe aret yilunggola nage, Nggwiya ndalok pugu me at aret ndalunggola wangge,

⁹Ta'na pugu nen at eebe lebenogo pege, Keele pugu nen iyok irip nggeronggage,

¹⁰At ake keele pugu nggween abu'na taanak wonage, At tu nawam ta'na pugu wonage,

¹¹Agabolo nirik-kirik eerogo puurak mendek enaagan-ambokan wonage, At nage kenok, mugurok aret nage,

¹²Mbi abu nen omaawi lek age, Nage me, yigeebu wambuwak nduk, at lek eeppuurak mendek enaarak wonage,

¹³Agabolo paga awin aaga'ne nen nenet unggwi nage, Andi abu alik mendek nen eenggi-iyok nenet unggwage,

¹⁴Awi ugun obeelom aret wonage me, obaak yabok togon eerogo wumbege, Inamineeri naga unde wonage me, pi nage,

¹⁵At ame wonage lek kenok, aakumi ugun unggunuk wonogwe, At menggim kwi yubunogo pit nage,

¹⁶Eyo omanggen nggween abu'na mbuk age, Eno'mbak wiganak teebat age, Eeke menggi kwak, At togop aret arigin o.

¹⁷O nggween paga yime at oba abekwi, Yi o ndi o at endage kunggwi, Eeka'lek aret wonage.

¹⁸O eya me nen mugogo o apit me nappege, O nggween paga yime nen, Nak o, yoge, Eerigin me,

¹⁹At apuri ilik, ombowologwe a? owe-awot inenggela'me wonogwe, At wonagagim kunduk, aap ambi wonage, Eeka'lek aret logogin o.

²⁰At eeppuurak koonak nogo paga Aakumi oonegen kilu yi nage menggim mendek nen inogut nage, Aakumi oonegen lagi wage menggim mendek nen inagabolo kangge, Eerugun o.

²¹Aap maluk mendek inom, Ala ineenggo'lek mendek inom, It ti togop aret wonogo menggaarak o,” yinuk, yoreegerak.