Read Western Dani Ayup 19 Bible Online

Ayup 19 - Western Dani bible

Ayup 19

¹Yoge mbareegi, Ayup nen wone onggo Mbilirat yoge logonet,

²“Niniki andi eerogo panege, Kat koone paga nen niniki wakkolaakit nduk eerogo pangge, Eeke keegak, ne mande arigin o?

³O yogondak ne 10 kuli meek eerogo panege, Kenggali lek aret maluk eerogo pangge, Eekendak o.

⁴An abet aret tu nomoninuk nagarak kenok, Nomaluk ti, nobaalombok koonggolage logogin o.

⁵Ndi, kit nen yogo logonet, Nit ti, iya, ndi, at ti, meek, nomba'nuk, Nenggali mbakak nege logorak eeppanegerak yi paga nen, Kat maluk eekendak keego, yo'nugwi kiinok perak,

⁶Ala nen aret maluk eerogo panege, Towe yiluk yaga nen yarogo pereegerak nogo paga yilunogo panege, Eekerak kineenu a'nip o.

⁷Le ari logonet noone nggwok paga, Yeenggwa nirinip o, ari neegak kwe, It ambi nen yeenggwa nega'lek aret wonogwe, Ndi, an noone nggwok paga, Nawone mbaninip o, ari kwe, Nawone mbangga'lek aret wonogwe, Eeko agaarik o.

⁸An tu nage me, Ala nen naru non mbanogo panege, Yi tu ndi tu nege minggim o apit eerogo pege, Eekerak me, An noorak meek aret age,

⁹Nendage tiyanak nogo tebek togon eerogo panege, Nenggare-nggare nanobak paga yirik nogo, At nen aret ndinggolage,

¹⁰O minggo logonet, punggagak, punggagak, eeko mengga kwak, An eeke minggirak abok aret at nen lek eerogo pegak, lek eerogo pegak, eerit unggwage, Eyo kinogo nappogo mengga kwak niniki lunik nogo togop aret kinogo nappege,

¹¹Anini kani omoonuk negen noba panege, At ti, nawim aret o, yinuk, ari, Eeke logonet,

¹²Awuri ineegin warak aago nappiya wage, Kota oonda mbani ungguwok nduk, Ya'na wurit laganggo mengga kwak An togop aret eerogo panege, Nawi yendok-wandok kwi'nari ungguurak eeppiige,

¹³Nowe-nawot nen an mbo paninuk, mbaganuwak nduk, eeppiige, Eekerak o. It ninom minggirak nen aap nggiru kwak eerogo panugwi,

¹⁴It an mendek abok nen kole mbaganggwi, Ninom niniki kunik nen mari eerogo panugwi,

¹⁵Pe'neya wogo menggaarak inom, nayeloman mini nogo inom, nen, Aap ti, nineenggo'lek o, yogwe, Aap alik nggiru negen eerogo panugwi, Eeko agaarik o.

¹⁶Nayeloman o, yinuk, wiige, Ndi, noone abe paga inikime manake, Eeke neegak kwe, At nen onggo yo'nega'lek aret wonage o.

¹⁷Nambe obari kenok nakwe nen, Kambe obari o, yinuk, yo'nege, Nowe-nawot lombok nen, Kogole o, yinuk, yo'nugwi,

¹⁸Mi'na'nuk nage neenok, wologwe nen meek eerogo panugwi, Nagi'ndok kambit nogwe,

¹⁹Noreewi ninom niniki kundugu nen noba peyak wurogo panugwi, It an niniki kunik mendek nen ineebi nen inena nomok yogwe, Eeko agaarik o.

²⁰Nenggaanggum lek age logonet, Nagabolo nowak paga nabenogo pi unggwage, Kambuurak kugi aret kungge, Eekirak kwe, neenik agi o.

²¹Togop aret me, noreewi yi wae. Ala nen yombak togon nookerak me, nabuwa nombakwi, narigi mbakwi, Ee'nip o.

²²Ala nen mu'neren wage menggi kwak, Kit nonggop nduk mu'neren wogo ogotik? Neebe nibinogo nenet mban nugwi yi, Ndonggoppinaga'lek ya?

²³An noone ari yi, liiru mbanogo pugwi, Mbuku pirik-perek paga mbanogo pugwi,

²⁴Ndi, itok logowak nduk, Mbuti liiru yugum paga ayo waganogo punuk, Mbuti tembaga paga nabenogo pit nugwi, Eeko logowak lak, Ao, mbake agarik.

²⁵Naana'le mbangga ti, eenik wonage, Ndi, o age yobok paga at nggween paga mi'na'nuk, Nawone nggaruk togon mbanogo pege, Eerigin an neenu aret o.

²⁶Nagabolo pili age kagak, neebe Ala nenegen kaagin aret o.

²⁷It aap alik nen mban lek o. An kunduk nenegen abe nen aret kaagin me, Kaakit lak, Ao, mbarit unggwage agarik o.

²⁸Kit nen yogo logonet, Eekerak alom inikime wonage me, Nit nonggop agago yorit unggwi? yinuk, yogwe kiinok,

²⁹Ala anini mbake logonet, maluk eekwi onggo wooluwak paga inooke kenok, Ti paga it maluk eeko menggaarak nogo inowak loonigin kineenu ariyak me, Kit togon wooluwak paga kinooke kero, kinagabiti mbako logonip o,” yinuk, yoragagerak.