Read Western Dani Ayup 2 Bible Online

Ayup 2 - Western Dani bible

Ayup 2

¹Ti'nuk, ne alik ambi paga it Ala inom menggaarak nen at Aliku ALA owagam kuwak eeri wogwe me, at Tile kunduk Aliku ALA owagam wage nagagerik, inom wonagagerak.

²Inom wonage me, Aliku ALA nen Tile yoge logonet, “Kat ngga nen wagan o?” Yoge mbareegi, Tile nen onggo Aliku ALA yoge logonet, “Lek o. An o nggween paga wanggerit nigi-nigi wagi o.”

³Yoge mbareegi, Aliku ALA nen Tile yoge, “An nayeloman Ayup aakumi o nggween paga menggaarak ndak-ndak lek alik mban iniki abu koonak me, aakumi inoone oba pega'lek wonogwe iigak, an Ala nayuk wuke, Maluk neebi o, yinuk, mbo pege, eeke menggerak nogo kat liippege agandik ilik, lek a? Alom lek kagak an nen Ayup maluk eerogo pikit nduk, nabenak mban yo'nirit unggwage mbaken, E, yokkigirak wakkagandak kwe, at iniki abe koonak nogo lek aga'lek mondok nu'lek aret wonage o.”

⁴Yoge mbareegi, Tile nen Aliku ALA yoge logonet, “Neebe ili o. Neenggi wonage o, yinuk, yogo menggaarak me, ineebe inooriyak eekwi iinok, inamendek abok aret kabelogo wogorogo menggaarak o.

⁵Togop me, aap Ayup eebe lombok maluk eeppege keenok perak, mondok lok togon pulunogo pagage kaamunggun o.”

⁶Yoge mbareegi, at Aliku ALA nen Tile nogo yoge logonet, “Ti yagandak kenok, eeppuurak mbakendak nogo eeppenok nduk, keenggime pagagi kwe, at eebe perak, wariyak mage o.”

⁷Yoge mbareegi, Tile nogo Aliku ALA owagam nen wundi nanuk, Ayup wonage me nage nagagerik, Ayup nogo iyok me nen nugwa anobak kuli aret piirik-kunik obari maluk lombok eeppereegerak.

⁸Eeppege mbareegi, wun inikime ndenen warak logonet, togolowak telenak wagangge nagagerik, agabolo paga nggibi-nggibi eeke nagagerak.

⁹Eeke wonage me, at akwe nen at yoge logonet, “Yogobi eeppagage kagak kiniki abe koonak mban logorak mbakendak ya? Ala pulunogo punuk kambu o.”

¹⁰Yoreegerak kwe, Ayup nen akwe nogo yoge logonet, “Kat kumi kumiligwe nen yogo mengga kwak ari agandik o. At Ala nen nit obeelom eeppinanege kenok waganggwi, ndi, maluk mendek eeppinangge kenok mbo pugwi, eeriyak nduk ari agandik ya?” yinuk, yoreegerak. Ti abok aret oba age kagak, Ayup nen wone ambi yereegerak paga maluk ambi eerulik aret o.

¹¹Aap Ayup aaninggin oba agagerak nogo oreewi kenagan aap Teman mendek Elipat inom, aap Tuwa mendek Mbilarat inom, aap Naama mendek Topat inom, inaruk konembunuk inawi inalitak lombok nen kuwak eeri wogo nogogwaarik, iniki ambit eeppunuk, “Ayup iniki eyak wappugwi, ninom le yogwe, eeri nawok o,” yinuk, at ka wogogwaarak.

¹²Ka wogo nogogwaarik, tayorogon nen inigen nakka woraanuk, “Yi Ayup aret ilik?” yinuk, at eebe liippuurak meek aret mbareegi, inayum nibinogo pakwi, wun inanobak irimbaga yumbunogo nippugwi, eeko nogogwaarik, inoone nggwok paga le yereegwaarak.

¹³Le yogo nogogwaarik, at inom ndak-ndak nggween paga kwi'ndak liingge-oonikiya wonogwe tit iigak, nogo 7 aret yereegwaarak. Yogo logonet, at andi-pandi lombok oba agagerak nogo kogo nogogwaarik, it ambi nen inoone ambiriluk ambi at yoga'lek aret wonogogwaarak.