Read Western Dani Ayup 21 Bible Online

Ayup 21 - Western Dani bible

Ayup 21

¹Yoge mbareegi, Ayup nen wone onggo it yorage logonet,

²“Niniki eyak wappaniyak mbakwi kenok ti An yokkirage yi, koneniyak aret me, Yokkirage neegak kinaruk liirogon konenggwi,

³Ari neegak kiniki yanggoppunuk puk wonogwe, Eekwi kiigak, Abu ari neenok, meek eerogo paniyak op aret o.

⁴An niniki wakkolage logonet ari ti, Aakumi konenuwak nduk ari mbakop? Lek me, An nonggop nduk yanggo yinuk puk ariyak?

⁵An ari neegak, Ia! yogwe, Kineenggi kineyak mbanggologwe, Eerumunggup kwe, An ari mban neyaamunggup o.

⁶An yuurak mbakirak nogo, Yikit aret, mbake neegak, nagabolo kangge, Namineeri ne agan nage logonet, naganak nuk-nuk eeke, Eeke kagak kwe, yigin aret o.

⁷Aap maluk eeka mendek ti, ineenik nggorek wonogwe, Inanggok ari nogwe, inendage nggwok ogwe, Eeko menggaarak ti, Nonggop nduk eeko menggaarak?

⁸Inenggaanom paga inapuri-inombowologwe tawe ogwe, Piirogo iigak it paga wiganak iniki warak ogwe, Eeko menggaarak.

⁹It iname wonogo logonet, Inagabiti lek iniki ugun obeelom aret wonogwe, Ala nen aaninggin inoba piiga'lek aret wonogwe,

¹⁰It inaanggumi ngguunok ti, inayo maluk lek abe mban wonogwe, Inaanggumi kooli ti, inaagalogwe aambiranogo piiga'lek obeelom mban ndaganakwi wonogwe,

¹¹Kambin-ndomba kombogonak nugu mengga kwak, it aap maluk nogo Inapuri wumbiyamenggaarak nugu logonet, ku'mbo laganggak agan nugwi,

¹²Oone lobale paga inom, nggitat paga inom, oone eekugak ndawi wakwi, Iniki ale'nggen nen nggawiwak oone eekwi,

¹³Yi mendek ndi mendek abe mban nunggwi iigak, it nda'nogogwam kuli aret ari nage, Iniki ugun obeelom wonogo logonet, kambunuk nogo menggam wambi nogwe, Eeko logonet kwe,

¹⁴It nen Ala yogo logonet, Kat eeriyak ninombake nogo, nineenu ariyak nineebi me, Nak o, yogwi,

¹⁵At Omaawi Lombok Menggerak ti, Ta me nduk, at ake eekwi, At nano wo'nirage menggerak me, at nggino yogwi, Eeko logorak mbakop? Lek o! yinuk, yogo menggaarak.

¹⁶Ineenggi warak iniki ugun tayenak wonogwe ti, It nen eekkologwe paga wonogwe mbakop? Lek me, It aap maluk eeka ti nen wone agan nugwi nogo An e-wa inombarigin mondok lek o.

¹⁷Togop aret inombake kwe, Aap maluk eeka inandi ti, awo kagak noguk ari, Ala anini inombake logonet, Aaninggin inoba eeppiyoorak punik nogo, inoba ari wage,

¹⁸Wiiri anggen o wiya nen wonok nage menggi kwak, Eyoongga menenak nombok-kombok wonok nage kwak, it togop aganake, Eeke menggerak nogo ti, Kuluk aret aganake menggerak mbakop?

¹⁹Kit nen yogo logonet, It aap maluk eeko menggaarak onggo nogo Ala nen inapuri inoba kwippiige menggerak, yogwe ti, It maluk eekwi onggo inapuri inoba piyoorak lek o. Ata, Aap maluk eeka ti iniki liippuwak nduk, It lombok aret inoba kwippiyaawak o.

²⁰Tut it logorak punik nogo abok aret Lek age kenok kanggo logomenggaarik, Inaaganapuri nonggop logorak nogo, It koonogo piyaagun lek me, Inomaluk onggo ineebe lek eerogo piige nogo It lombok inigen abe paga nen kogwe, At Omaawi Lombok Menggerak anini nogo it aret inoba pakwi, Eeruwak o.

²²It o tiyarogon menggaarak nogo inowak looninake menggerak Ala aret kwe, Wone ambi eenggo'lek me, yinuk, aap ambi nen at mamuniriyak op mbakop?

²³Aap ambi nogo amiya wonage me omaawi ambik wonage, Iniki nu'lek ugun tayenak wonage,

²⁴Owak ako linik me agabolo ki wonage, Eeke kagak kwe, kangge,

²⁵Aap alik ambi abe mendek nengga'lek kagak iniki andi eekko'nok kangge, Eeko menggaarak kwe,

²⁶Imbirak ndak-ndak aret nggween me taambiigwi, Imbirak aret anggolenggen inoba nugut-tiyak yogwe, Eeko menggaarak.

²⁷Kit kiniki mbakwi nogo inom, Maluk eerogo paniyak koonggwi inom, An neenu aret nombako logonip o.

²⁸Kit nen an yo'nogo logonet, Aap nagawan awi wonagagim ngge o? It aap maluk eeka inawi wuppatinuk, wonogogwam nogo nggeeme wonage o? Yinuk, yo'nugwi kiigirak me,

²⁹It aap yi awi ndi awi nugu menggaarak nogo kin wogiigwi, Inigen kogo nogogwaarak mbininogo yokkirogwe nogo liippugwi, Eeka'lek ogotik ya?

³⁰Yorogwe kiinok, it maluk eeka aaninggin inoba age kagak woppakwi, Ala anini eeppiige kagak inagap ndakkologwe, Eeko menggaarak, yokkiraagun obak!

³¹It aap ineraambe maluk kenok, Kit maluk aret eekotak o, yinuk, Taani nen inoone lok togon yorogwe, It maluk eeko menggaarak nogo, taani nen onggo eeppiigwi, Eeko menggaarak mbakop?

³²Aap maluk eeka kanggwi iinok, taambiya nogo logonet, Ineenggi lingginiyak meek lombok inaa'nduk ogwe, Aakumi ambik lombok inambokan ogwe, Eeppunuk inaani aret nggween taambiya nogwe iinok, Nggween taambiigam arum wonogwe iigak, It nggween molo inoba lebenak wonogwe nogo nen, Aaninggin lek teeluk aret, mbako menggaarak o.

³⁴Togop aret me, Kit wone ugun agan nugu logonet yo'nugwi nogo Ti paga nonggoti niniki eyak wappaniyak? Kit wone onggo yo'nugwi nogo ti, We pilit-pilit aret yo'nogo ogotik o,” yinuk, yoragagerak.