Read Western Dani Ayup 22 Bible Online

Ayup 22 - Western Dani bible

Ayup 22

¹Yorage mbareegi, aap o Teman mendek Elipat nen wone onggo Ayup yoge logonet,

² “Aap iniki warak ambi nen, Ndogop eekkolaakit o, yinuk, eekkoloorak op kwe, At Ala ambi eekkolaawak nduk, aakumi nen, Yi eeru o, yinuk, Yoriyak op mbakop? Meek aret o.

³Kat kiniki abe koonak menggendak paga Omaawi Lombok Menggerak inikilom kombake, Ndi, maluk eeka'lek abe mban eeke paga at Ala ambi eekkolage, Eeriyak mbaken?

⁴Kat Ala kagabiti mbake paga at nen maluk onggo eeppagage, Ndi, kat aap obeelom aret o, yinuk, kowak loonogo aaninggin koba pagage, Eeke agaarik mbaken?

⁵Kat keraambe maluk lombok wonage, Ndi, maluk kunik aret eerit nage, Eeke menggendak nogo lek a?

⁶Alom lek kagak, kat nen, Ambi nabenggolaakit, mba'nuk, Kore kawu wogoge logonet, amendek wagangge, Aap ineenggi lek inayum wagangge logonet, inagap mbelanak teppiige,

⁷Niyo abu aganake kagak wogoraga'lek mbo piige, Mbi abu wonogwe iigak, wogoraga'lek teppiige,

⁸Kendage warak me, nggween unde eekkolage, It kinom kunik nogo time logowak nduk, wogorage, Eeke logonet kwe,

⁹Kumi nanu ineenggime lek we aret nappiige, Elege moono iinok, tebenogo piige, Eeke nagandak me,

¹⁰Kenggaanok nggerok yuwak nduk, Kenaagan-kambokan keele pugu wonage, Aaninggin alik negen abera'lek me koba age kenok, Kamineeri ne agan nage,

¹¹Kat kenegen kage keyo, eya eekkake nogo apit eerogo pagage, Niyo wu'nuk wage logonet lebeninake menggi kwak, eeppagage, Eeke agaarik o.

¹²Laaluguragan mbogut paga abu tiyarogon wonage ti, nikket o. Ti wonage kagak kwe, irimbaga Ala mondok tiyarogon wonage nogo lek a?

¹³Wonage menggerak aret kwe, kat nen ari logonet, Ala nano eenu menggerak mbakop? At mbogut wanggerak irimbaga nege kagak, Ndugwi yumaak enggela'me nobapporogo wonage me, at enegen nit pe'niige, O apit wonogwe niigak, ninowak liirogon loongge, Eeriyak op mbakop? Ari keegirak me,

¹⁵Aap maluk mendek tu nogo menggam maan mendek, Ti paga nage logokit, mbake agandik ya?

¹⁶It kambuurak eyom nogo, awo ari waga'lek kagak kanggwi, Yi wu'nuk wage logonet, o ndengganinuk nage menggi kwak, It togop aret ineebe lek ogwe, Eereegwaarak.

¹⁷It nen Ala yogo logonet, Nit ninobaalombok koonggologwe me, mbo pinaninuk nak o, yinuk, yogwi, At Omaawi Lombok Menggerak nen nit maluk eekwi onggo nogo, At eeppinaniyak mbakop? Meek o, yogwe, Eekwi iigak kwe,

¹⁸At Ala nen aret inamendek nogo iname yagabit eerogo piyareegerak kagak, It maluk eeka ti nen wone agan nugwi nogo, an e-wa inombarigin lek o.

¹⁹It aap abe iniki koonak mendek nen It maluk eeka inomaluk onggo inoba piige nogo, Inigen iinok inale'nggen mbakwi, It maluk eeka'lek ugun mendek nen It miyuk-meya eerogo piigo logonet,

²⁰Ninom ogoorak mendek lek eerogo piige, Inamendek abok aret kani nen nengge, Eekerak o, yinuk, yogwe, Eeko agaarik.

²¹Togop aret me, kat Ayup yi wae. At Ala kimbirak lambumbunuk kiniki ugun obeelom aret logot o. Ti eeke keenok, obeelom aret eeppagage kaamunggun o.

²²Ala lombok nen mamunggege nogo liirogon wagangge, At nen wone yokkege nogo kinikime porogo wonage, Eeke logot o.

²³Kat kiniki tebeppatinuk, komaluk mbo pege logomenggendik, At Omaawi Lombok Menggerak owagam wage, It kame kinom wonogwe nogo maluk eekwi iyo, Mage, yorage,

²⁴Kawu mbuti emas nogo, Yi nggween mendek aret o, yinuk, mbo pege, Mbuti emas abu abe o Opit mendek kat porogo wonage nogo, Yi yugum anggen kwak aret o, yinuk, niyo inikime mbo mambege, Eeppunuk,

²⁵At Omaawi Lombok Menggerak ti, mbuti emas kawu kwak eerogo pake, Mbuti perak onggo nggwok logonak kwak, eerogo pake, Eeke logomenggendik

²⁶Omaawi Lombok Menggerak kinikilom mbake, Kat kenggaanok pilarogon Ala pekkage, Eerumunggun o.

²⁷Tamban eeke keenok, Ala aruk konengge, Yogop eerigin o, yinuk, wone kumbuk mbanemenggendak nogo, A'me aret eeke logonok nduk eeppagage,

²⁸Eeriyak koonogo pemenggendak nogo, ndak-ndak aret ari nage, Kat nage keegak karu eya eerogo pagage, Eeke logogin o.

²⁹Aap iniki tiyappakwi iinok, Ala nen tebenogo piige, Ndi, iniki tebeppakwi iinok, at nen tiyappiige, Eeke menggerak me,

³⁰Aap maluk eeka'lek ugun wonage kenok, Ala nen agap ndake menggerak me, Kat maluk eeka'lek obeelom wonage keenok, Ala nen kagap ndarigin o,” yinuk, yoreegerak.